Օլգա Բուզովայի գնահատականը Անահիտ Սիմոնյանի հավաքածուին, Յուլյա Ավագյանի 33-–ամյակն ու երևանյան խնջույքի մյուս հետաքրքիր դրվագները

13:21 • 22.10.18

Շոուբիզնես

Անահիտ Սիմոնյանի ու «Միսիս Աշխարհ 2014» տիտղոսակիր Յուլյա Ավագյանի ընկերությունը մոտ կես տարվա պատմություն ունի։ Աղջիկները ծանոթացել են ամուսինների միջոցով, սակայն շեշտում են, որ մտերմացել են առաջին իսկ վայրկյանից։ Նրանց մտերմությունը հասցրել է այնքան խորանալ, որ ընկերուհիներին միավորել է նաև համատեղ միջոցառման շուրջ։

Հոկտեմբերի 20–ին Երևանի ժամանցի կենտրոններից մեկում տեղի ունեցավ Յուլյայի 33-ամյակի խնջույքն ու Անահիտ Սիմոնյանի զգեստների հավաքածուի ցուցադրությունը։ Tert.am Life–ը ներկայացնում է երեկոյի ֆոտոշարքն ու զրույցը Անահիտի հետ։

Միջոցառումը վարելու համար Հայաստան էր ժամանել հայտնի հաղորդավարուհի Քսենյա Բորոդինան: Յուլյային և Անահիտին շնորհավորելու էին եկել մի շարք հայտնի մարդիկ։ Երեկոյի ընթացքում նախ երգեց Արամ MP3-ն, ապա բեմ բարձրացավ երեկոյի անակնկալ հյուրը` Օլգա Բուզովան` կատարելով մի քանի հիթ իր երգացանկից։ Օլգայի և Քսենյայի ժամանումը Հայաստան եղել է Յուլյայի նախաձեռնությունը։

Համատեղ միջոցառում անցկացնելու գաղափարն էլ եղել է Յուլյայինը։ Անահիտն ասում է` մերժել չէր կարող։ Ասում է` վաղուց էր մտածում փոքրիկ ցուցադրություն անելու մասին, հասկացան, որ այսպես շատ հետաքրքիր միջոցառում կարող են ունենալ, ինչը նրանց հաջողվեց։

Երգչուհի–դիզայներին ոգևորել է նաև այն փաստը, որ միջոցառումը լուսաբանվելու է ռուսական առաջատար ժամանցային ալիքներով։ «Սա շատ լավ առիթ է, որ մեր մշակույթը, հայկական ապրանքանիշը տարածվի նաև արտերկրում,- նկատեց Անահիտը, որն իր հավաքածում օգտագործել է նաև հայկական տարրեր, որոնք ձեռքի աշխատանք են։ –Հայկական զարդանախշերն իմ հավաքածուներում մեծ տեղ ունեն։ Շատ եմ սիրում նաև բախրամաներ, որոնք ներառել եմ այս փոքրիկ ցուցադրության մեջ»։

Դիզայները ցուցադրության համար ընտրել էր 20 զգեստ, թեև կային տարբեր գույների աշխատանքներ, գերակշիռ դիրքում սևն ու սպիտակն էին։ Երգչուհու զգեստների ցուցադրությունն ուղեկցվում էր ամուսնու` Հայկոյի հեղինակած երաժշտությամբ։ Երգահանը ոգեշնչվել էր կնոջ հավաքածուով և երաժշտություն գրել հատուկ այս ցուցադրության համար։

Անահիտը ոգևորված է, որ հյուրերից դրական կարծիքներ է լսել իր հավաքածուի մասին։ Մասնավորապես Օլգա Բուզովան ասել է, որ Անահիտն իր ամենասիրելի հայ դիզայներն է, որի հեղինակած զգեստները մեծ հաճույքով կկրեր։ Անահիտն ու Օլգան հետագայում կհամագործակե՞ն, թե՞ ոչ, ցույց կտա ժամանակը։ Առայժմ Անահիտն իր փոքրիկն նվերն է մատուցել հյուրերին։