«Աղջիկս կյանքս շատ է փոխել». Ավետ Բարսեղյան

Ընկերներն ասում են Ավետ Բարսեղյանի տեսակն իրապես հասկանալու համար պետք է լսել  նրա բանաստեղծությունները։ Նոյեմբերի 25-ին Մհեր Մկրտչյան արտիստական թատրոնում Ավետն իր լսարանին կներկայանա իր բանաստեղծություններով։ Բեմում նա կլինի միայնակ։

Իմպրովիզների մեծ սիրահարն այս երեկոն կանցկացնի անսպասելիության սկզբունքով։ Գրված բոլոր բանաստեղծությունների թղթերը կլինեն բեմում։ Tert.am Life–ի հետ զրույցում հեղինակն ասաց, որ տեղում կորոշի որը կարդալ` կախված մթնոլորտից, ցանկությունից։

Ավետ Բարսեղյանը մինչև այս բանաստեղծությունների երեկոն ներկայացնում էր «Իմ լռությունը» խորագրով, այս անգամ ընտրել է «Մեր կյանքը», ունի նաև համանուն բանաստեղծություն։

Երեկոյի պոստերի վրա երկուսով են` ինքն ու 2–ամյա դուստրը` Լուսեն։ Փոքրիկի ներկայությունը պատահական չէ։ Հայրիկի երեկոյին նրա մասնակցությունը մեծ է։ Իր ծննդից հետո Լուսեն Ավետի ամեն բանաստեղծության մեջ է` ճիշտ այնպես, ինչպես պոստերում` անուղղակի։

«Երբ ես համեմատում եմ իմ գրվածքները մինչև Լուսեն ու Լուսեի ծննդից հետո, բավականին տարբեր են։ Լուսեն իմ կյանքը, տեսակն է փոխել։ Հիմա շատ ավելի հասուն եմ։ Կյանքի ամեն վայրկյանն այլևս անխնա չեմ ծախսում։ Հնարավոր ամեն րոպեն իր հետ եմ անցկացնում։ Ինքն է տնօրինում իմ ժամանակը»,– ասում է հայրիկը։

Այնուամենայնիվ, Ավետը շարունակում է ցույց չտալ դստերը։ Պոստերի համար հատուկ ֆոտոշարք չեն արել։ Ընտանեկան ալբոմից մի նկար է ընտրել, որտեղ Լուսեն և՛ կա, և՛ չկա։ Ավետն ասում է`չի ցանկանում երեխայի լուսանկարի հաշվին լայքեր ու հետևորդներ հավաքել, թեև ինքը հաճույքով է հետևում գործընկերների երեխաների լուսանկարներին։

Բանաստեղծական երեկոյի ժամանակ Ավետի ստեղծագործությունները նրա մասին կպատմեն ավելին, քան ինքը երբևէ խոսել է։ Անկեղծության մեջ չհասկացված լինելու մտավախություն հաղորդավարը չունի։ Ասում է` սա այն դաշտն է, որտեղ խնդիր չունի ապացուցելու, թե ինքն ով է։ Որպես կանոն, իր երեկոներն անցնում են փոքրիկ, բայց ջերմ մթնելորտում։

«Իմ բախտը միշտ բերել է, մինչև այս եղած 3 երեկոյի ժամանակ էլ մարդիկ ինձ ընկալել են այնպես, ինչպես ես եմ պատկերացրել։ Եթե հեռուստատեսությունում, ռադիոյում ներկայացող Ավետն ունի ավելորդ խնդիր` բացատրելու, թե ինքն ով է, այս պարագայում, ես մերկանում եմ իմ տողերում և ավելորդ ճիգ չեմ գործադրում հասկանալի լինելու համար»,– ասում է նա։

Հեղինակը չունի այնպիսի ստեղծագործություն, որն այնքան անձնական է համարում, որ չի ցանկանա ներկայացնել։ Բոլոր թղթերը կլինեն բեմում։ Ասում է` այս փոքրիկ երեկոները հենց նրա համար են, որ հանելուկ չլինի, որևէ բան թաքուն չմնա։

Նախորդ երեկոների ժամանակ Ավետը մի նկատողություն էր ստացել, որը հաշվի է առել  և այս անգամ կփորձի շտկել. «Ինձ ասացին, որ շատ արագ եմ մի բանաստեղծությունից մյուսն անցնում։ Ինձ համար դա հասկանալի էր, թվում էր դիմացինին էլ պետք է ընկալելի լինի, բայց այս անգամ պետք է փորձեմ ճիշտ դադարներ ունենալ»։

Իր երգերի հեղինակային երեկոն անելու մասին մտածել է, սակայն քայլեր չի ձեռնարկել։ «Պահը հուսունացել է, անցել... երգերիս քանակն այնքան շատ է, ամեն արտիստի կատարմամբ տասնկյակից ավելի երգ ունեմ։ Երևի, պետք է ձևաչափ մտածել, թե որ երգերը կհնչեն, որոնք դուրս կմնան։ Մի ժամանակ մտածում էի չլսված երգերի երեկո անել, որովհետև կան երգեր, ամեն երգիչ ունի հետաքրքիր երգ, որը հիթ չի դարձել։ Կլիներ չտեսնված Ավետ, չլսված երգ, սակայն այդպես էլ չարեցի։ Հեղինակային երեկոս դեռ բանաստեղծությունների ձևաչափով  եմ պատկերացնում»,– եզրափակեց նա։