«Այս երգից սպասելիքները մեծ են». Կարեն Ասլանյանն ու Մաշ Իսրայելյանը հանդես կգան զուգերգով

Դերասան Կարեն Ասլանյանն ու երգչուհի Մաշ Իսրայելյանը շուտով լսարանին կներկայանան զուգերգով: Երգի պրեմիերան կլինի միանգամից տեսահոլովակով: Tert.am Life-ի հետ զրույցում նրանք պատմել են՝ ինչպես ծնվեց զուգերգով հանդես գալու գաղափարը և ինչ երգով են հանդես գալու:

«Քեզ գրկում, խելագարվում եմ» վերնագրով երգի՝ թե՛ երաժշտության, թե՛ խոսքերի հեղինակը Կարենի և Մաշի երաժշտական պրոդյուսեր, երգահան Արման Անտոնյանն է, գործիքավորումը կատարել է Արթուր Ավետիսյանը: «Շատ սիրուն երգ է ստացվել սիրային թեմայով: Այն և՛ մեղեդային է, և՛ ռիթմիկ: Հուսով ենք, որ լսարանը կհավանի: Նախատեսել ենք շուտով նկարահանել տեսահոլովակը և հավանաբար, մինչև նոյեմբերի վերջ կհանձնենք հանդիսատեսի դատին»,-ասաց Կարենը:

Նա նշեց, որ Մաշի հետ մտերիմ ընկերներ են և զուգերգով հանդես գալու գաղափարը ծնվել է ընկերական շրջապատում հերթական խոսակցության ժամանակ: Իր հերթին Մաշը նկատեց, որ զուգերգով հանդես գալ նախատեսել էին գալիք տարվա համար, սակայն հանգամանքների բերումով ավելի շուտ է ստացվել:

«Երբ ընկերական միջավայրում քննարկում էինք նոր նախագծերը, որոշվեց Կարենի հետ զուգերգով հանդես գալ: Առաջարկ որպես այդպիսին ոչ մեկիս կողմից չի եղել, ուղղակի իմ և Կարենի երաժշտական պրոդյուսերը նույն մարդն է՝ Արման Անտոնյանը, ու նրա կարծիքով այս երգը երկուսիս ձայնային տվյալներին էլ հարմար է և այդպես եկանք փոխադարձ համաձայնության: Մեր համատեղ երգը գեղեցիկ սիրո մասին է՝ էստրադային ոճում: Դանդաղ մեղեդային երգ է՝ համեմված իսպանական տաք ռիթմերով»,-ասաց նա:

Մաշը նշեց, որ Կարենի հետ աշխատելը բավականին հետաքրքիր, միաժամանակ բացահայտումներով լի է եղել. «Կարենը չափազանց հետաքրքիր անձնավորություն է: Վաղուց ենք շփվում և լավ ընկերներ ենք, բայց համատեղ երգի շուրջ աշխատելիս՝ ինձ համար բացահայտումներ եմ արել: Նա ունի գեղեցիկ ձայնային տեմբր ու ի զարմանս ինձ, գեղեցիկ երգեցողություն: Իհարկե, շատ հաճելի էր համատեղ աշխատանքը ու դեռ մի ողջ տեսահոլովակ պետք է աշխատենք միասին ու վստահ եմ ավելի հետաքրքիր պահեր բոլորիս սպասվում են նկարահանման ժամանակ»:

Կարենը իր հերթին նկատեց, որ Մաշի հետ համատեղ աշխատանքը բացի հետաքրքիր լինելը նաև որոշ չափով պատասխանատու է եղել իր համար և անհամբերությամբ սպասելու են լսարանի արձագանքին: «Ես միշտ ասել եմ՝ ես դերասան եմ և երգիչ չեմ հանդիսանում, ուստի ցանկացած պրեմիերայից առաջ առաձնապես սպասելիքներ չեմ ունենում, բայց այս երգի դեպքում այլ է, քանի որ այստեղ հանդես եմ գալիս Մաշի հետ, որը պրոֆեսիոնալ երգչուհի է: Այս երգից արդեն սպասելիքները մեծ են»,-ասաց նա:

Լսարանի արձագանքի ու իրենց ակնկալիքների մասին խոսելիս՝ Մաշը ևս հույս հայտնեց, որ նոր աշխատանքը լսարանը կհավանի. «Չեմ ուզումա սածս մեծամտություն հնչի, բայց ինչ-որ ներքին համոզմունք կա, որ լսարանի արձագանքը դրական կլինի, քանի որ և՛ երգն է  գեղեցիկ, և՛մ գործիքավորումը և կարծում եմ ես ու Կարենն էլ վատ չենք երգել:):  Մեր ընկերներից շատերը լսել են երգը և հավանության են արժանացրել: Հուսանք մեր սիրելի լսարանին ևս դուր կգա»,-եզրափակեց երգչուհին: