Yerevan Jazz Fest–ի բացումն ու Արթուրո Սանդովալի երևանյան ելույթը

14:21 • 08.11.18

Շոուբիզնես

Yerevan Jazz Fest 2018-ն արդեն իրականություն է։ Ջազի սիրահարներն այս օրերին հնարավորություն ունեն վայելելու ջազային երկոներ Երևանում, Գյումրիում և Շուշիում։ Փառատոնի բացումն ազդարարվեց անվանի երաժիշտ Արթուրո Սանդովալի և Հայաստանի պետական ջազ նվագախմբի համատեղ ելույթով։

Tert.am Life–ը ներկայացնում է Ալեքսանդր Սպենդիարյանի անվան Օպերայի և բալետի ազգային ակադեմիական թատրոնում կայացած համերգի մանրամասներն ու ֆոտոշարքը։

Սանդովալն ասում է` հասցրել է սիրել հայերին, այստեղ մարդիկ շատ ջերմ են։ Հայաստանի պետական ջազ նվագախմբին Սանդովալն արագ ընտելացավ, նույնիսկ հասցրեցին նոր ստեղծագործություն նվագել։ Նվագախմբի գեղարվեստական ղեկավար Արմեն Հյուսնունցը պատմեց, որ 2000 թվականին, երբ Լոս Անջելեսում նշում էին Ալեքսանդր Հարությունյանի 80-ամյակը, մեծ ցանկություն է եղել հրավիրելու Արթուրթ Սանդովալին, որը կոմպոզիտորի «Շեփորի կոնցերտի» մեծ սիրահարն է։

«Քանի որ մաեստրո Սանդովալն այդ ստեղծագործությունը կատարելու վարպետն է, նրան հրավիրեցին։ Բանակցությունների փուլում, երբ նա իմացավ, որ հեղինակն անձամբ ներկա է լինելու միջոցառմանը, ու ինքը կատարելու է դեռ պատանեկության տարիներից ամենասիրելի ստեղծագործություններից մեկը, սիրով համաձայնեց գալ ու իր կատարումը նվիրել սիրելի կոմպոզիտորին»,– պատմեց Հյուսնունցը։

Սանդովալն էլ նշել էր, որ դա իր համար կարևոր մարտահրավեր էր, քանի որ երաժշտի համար մեծ պատիվ է ստեղծագործությունը նվագել հեղինակի համար։ Նա իրեն հաջողակ է համարում, քանի որ կոմպոզիտորը հավանել էր իր կատարումը։

Հյուսնունցը հայտնեց,, որ երբ իմացել են, որ ունեն սանդովալի հետ նվագելու բացառիկ հնարավարություն, նրան խնդրել են կատարել Ալեքսանդր Հարությունյանի ևս մի շատ սիրված կտավ` «Քարավանը», որը շատ կարճ ժամանակում նոր մոտեցմամբ են գործիքավորել են արել։

Երեկոյի մեկ այլ անակնկալ էր Լևոն Մալխասյանի և Արթուրո Սանդովալի համատեղ ելույթը։ Միջոցառման հանդիսավար Արման Մարգարյանը հայտնեց, որ Լևոն Մալխասյանի համար ևս անակնկալ էր այս ելույթը։ Առաջարկը հնչեց հենց բեմից։ Միտքը Սանդովալինն էր, որը նախօրեին իր տարեդարձի երեկույթի ժամանակ է ծանոթացել ջազմենի հետ և մտահղացել համատեղ ելույթ ունենալ։

ՀՀ մշակույթի նախարարության աջակցությամբ Ջազի հայկական ասոցիացիայի և «Մեցցո փրոդաքշնի» կազմակերպած Yerevan Jazz Fest-ն այս տարի կհյուրընկալի նաև հանրահայտ Չայնա Մոսեսին։