«Որքան էլ երջանիկ լինես, մասնագիտական բացը ոչնչով չես լրացնի». Լիլի Միքայելյանը՝ 3 տարվա դադարից հետո եթեր վերադառանալու և «Ես տեսնում եմ» սերիալի մասին

17:41 • 09.11.18

Շոուբիզնես

Դերասանուհի Լիլի Միքայելյանը 3 տարվա դադարից հետո հեռուստաեթեր վերադարձավ «Ես տեսնում եմ» 25 մասանոց սերիալով, որն ամեն շաբաթ և կիրակի Ucom ցանցում գործող «Արմենիա պրեմիում» հեռուստաալիքի եթերում է։ Լիլիի աշխատանքային դադարի պատճառն ամուսնությունը, մայրանալն ու բալիկի խնամքն է եղել։ Նրա խոսքով, այս ժամանակը իսկապես երկար էր:

Tert.am Life-ի հետ զրույցում Լիլին խոսել է իր մարմնավորած կերպարի, արձագանքների ու առաջիկա ծրագրերի մասին:

Լիլիի խոսքով, տևական դադարից հետո գլխավոր հերոսուհու դերով հանդես գալուց առաջ մտավախություններ ուներ, որոնք հաղթահարել է նկարահանման առաջին իսկ օրը: «Երեք տարի չէի նկարահանվել, կարծում եմ՝ այդ դադարը շատ մեծ է դերասանի համար: Վախենում էի, որ ինչ-որ բանից հետ եմ մնացել, գուցե, չկարողանամ, այսպես ասած, «տակից դուրս գալ»: Ինձ թվում էր՝ երկար ժամանակ չխաղալուց հետո կդժվարանամ միանգամից գլխավոր դեր խաղալ։ Բարդ է, երբ ամբողջ ֆիլմը գրեթե քեզ վրա է, բայց ինձ շատ էին օգնում, ինքս էլ հասկացա, որ այդքան էլ վատ չի ստացվում»:

«Ես տեսնում եմ» միստիկ դրամայում Լիլին մարմնավորում է Մարիին, որը պայծառատես աղջիկ է, տեսիլքների միջոցով կանխազգում է մոտալուտ վտանգները կապված թե՛ իր, թե՛ շրջապատող մարդկանց հետ: «Սա ինձ համար տարբերվող ֆիլմ է այն պատճառով, որ ֆանտաստիկ տարրեր է պարունակում իր մեջ, շատ բաներ ռեալ չեն,- ասաց դերասանուհին և նկատեց, որ Մարիի հետ որևէ ընդհանրություն չունի, թեև կերպարն իր համար շատ հետաքրքիր է,- Նա մռայլ, ինքն իր մեջ փակված աղջիկ է, իսկ ես սիրում եմ աղմկոտ վայրեր, ընկերներիս հետ շփվել, բացի այդ, երբեք չեմ կարողանում որևէ բան կանխազգալ, եթե ինչ-որ բան էլ զգում եմ, ճիշտ հակառակն է լինում»:

Թեև հիմա Լիլին էկրաններին է գլխավոր դերով, սա լիարժեք վերադարձ առայժմ չի համարում. «Ինձ համար վերադարձ կլինի, երբ նկարհանվեմ իմ երազած գեղարվեստական ֆիլմերում, խաղամ թատրոնում իմ երազած ներկայացման մեջ, այս դերով կարելի է ասել փոքր-ինչ լրացրեցի բացը»:

Թատրոն վերադառնալու մտադրություն Լիլին առայժմ չունի, քանի որ դա ժամանակատար է և կխանգարի 3-ամյա դստերը՝ Արմինեի խնամքին, սակայն նշեց, որ հեռուստադիտողներն իրեն տեսնելու այլ առիթներ էլ կունենան։

«Թատրոն դեռ չեմ կարող վերադառնալ, որովհետև դա ավելի շատ ժամանակ է պահանջում քեզնից, բայց իմ դերասանական գործունեությունը երբեք մի կողմ չեմ դնի, որովհետև սա ինձ համար այն մասնագիտությունն է, որը ոչնչով չես կարող լրացնել, ինչքան էլ երջանիկ լինես անձնական կյանքում, ամուսին, երեխա ունենաս,-ասաց Լիլին և հավելեց, որ թեև իր ամուսինն արվեստի ոլորտից չէ, իր մասնագիտական գործունեության առումով երբևէ արգելքներ չի դրել,- Արգելքներ չկան, բայց մենք միասին ենք քննարկում իմ ստացած առաջարկները ու որոշում՝ արժե՞ ընդունել, թե ոչ ։ Քննարկում ենք թե՛ ժամային գրաֆիկը, թե՛ կերպարը»:

Լիլին նշեց, որ ամուսինը երբևէ իրեն դիտողություն չի անում և խորհուրդներ էլ չի տալիս մասնագիտական առումով, իսկ հարցին հետևո՞ւմ է արդյոք իր խաղին հեռուստաէկրանից, դերասանուհին ժպիտով պատասխանեց. «Ինքն ասում է իբր չի նայում, բայց գիտեմ, որ աչքի տակով մեկ-մեկ նայում է»: