Հայկ Պետրոսյանի քաղաքական ներկայացումը, նմանակումը Հայկ Մարությանին և մյուս հետաքրքիր մանրամասները

Քաղաքական հումոր, նմանակումներ, երգ ու պար. Հայկ Պետրոսյանի էներգիան բեմում անսպառ է։ Հակոբ Պարոնյանի անվան երաժշտական կոմեդիայի թատրոնում երեկ կայացավ Հայկ Պետրոսյանի «Ամեն ինչ լայվ ա լինելու» մոնոներկայացումը, որում տեղ են գտել Հայաստանի քաղաքական իրադարձությունները սկսած թավշյա հեղափոխությունից։

Tert.am Life–ը լուսանկարել է մոնոներկայացման ամենահետաքրքիր դրվագները և զրուցել Հայկի հետ։

Այս ներկայացման սցենարը դերասանը գրել է 5-6 օրում` հեղափոխության փուլում։ Ասում է` այդ օրերին իրադարձություններն այնքան բուռն էին, որ շատ արագ է կառուցել սցենարը։ «Ինչպես այսօր է ընդունված ասել, էյֆորիա կար։ Իրականում էլ հումորային շատ բաներ եղան։ Ներայացնան մեջ էլ եմ ասում, որ սա աշխարհի ամենաուրախ  հեղափոխությունն էր։ Ես մասնագիտությամբ քաղաքագետ եմ, աշխարհում ոչ մի հեղափոխություն չի եղել, որ այսքան ուրախ, զվարթ, խորոված անելով, փողոց փակելիս երգել–պարելով անցնի»,– ասաց Հայկը։

Դերասանի խոսքով` քաղաքական թեմաների անդրադառնալու հարցում երբեք կաշկանդված չի եղել։ Նախկին իշխանությունների օրոք էլ անում էր ներկայացումներ, որոնց  մեջ կային քաղաքական շատ շեշտադրումներ, այս անգամ խաղում է ամբողջությամբ քաղաքական ներկայացում, որովհետև օրվա թեման է այդպես թելադրում։

Առաջնախաղից հետո դերասանը որոշ փոփոխություններ է արել սցենարում։ Ասում է` սա օրվա ներկայացում է։ Առաջնախաղից հետո եղած քաղաքական նոր իրադարձությունները, քաղաքապետի ընտրությունները չէին կարող դուրս մնալ իր տեսադաշտից։ «Յուրաքանչյուր ներկայացման ժամանակ սցենարի մոտ 30 տոկոսը թարմացնում եմ, բայց հիմքը մնում է նույնը։ Հաջորդ ներկայացումները դեկտեմբերի 20-ին և 21–ին են լինելու։ Այդ ժամանակ էլ պետք է փոփոխություններ լինեն, որովհետև արտահերթ ընտրություններին չանդրադառնալ չեմ կարող»,– ասաց դերասանն ու հավելեց, որ այդ օրերին իր հետ բեմում կլինի նաև բենդը, կխաղա այս ներկայացման լավագույն կտորները, կլինեն նաև ամանորյա թեմաներ։ Ըստ նրա` սպասվում է ամանորյա արտահերթ ներկայացում, որով կամփոփի հեղափոխական թավշյա տարին։

Իր ներկայացման մեջ Հայկն անդրադառնում է նաև Երևանի քաղաքապետ Հայկ Մարությանին, նմանակում նրան ու նոր իրականության համար գրված խոսքերով կատարում «Ես լավ տղա եմ» հայտնի երգը։ Դերասանի խոսքով` նախկին գործընկերոջն անդրադարձը հատուկ նրբանկատություն չէր ենթադրում, քանի որ յուրաքանչյուր գործչի անդրադառնալիս կարևորում է չվիրավորելու սկզբունքը։

«Քաղաքապետի ընտրությունների ժամանակ իրադարձությունների կիզակետում Հայկ Մարությանն ու Նաիրա Զոհրաբյանն էին։ Նրանց չանդրադառնալ չէի կարող։ Բեմում իմ վերբերմունքի առումով որևէ տարբերություն չկա` ես նմանակում եմ Նիկոլ Փաշինյանին, Ռոբերտ Քոչարյանին, Սերժ Սարգսյանին, թե  Հայկ Մարությանին։ Ըստ իս` սա շատ բարի ներկայացում է։ Մեր ազգը միշտ քաղաքականացված է  եղել, հիմա` առավել ևս, սա էլ քաղաքական թեմայով ներկայացում է, դրա համար փորձել եմ սուր անկյունները մի քիչ կլորացնել, որպեսզի լինի մեղմ, բայց շատ ուրախ։ Հնարավոր է` սուր բան ասեմ, սակայն  դա միշտ հումոր է, երբեք չի կարող անձնական վիրավորանք լինել։ Գուցե կատակ ես անում ինչ–որ մեկի մասին, որի ընկերը, բարեկամը կամ հենց ինքը նստած է դահլիճում։  Չվիրավորելու սկզբունքը կարևոր է։ Ներկայացմանը հաճախ գալիս են մարդիկ, որոնց մասին կատակներ եմ անում, բայց իրենք էլ բոլորի պես ծիծաղում են»,– ընդգծեց դերասանը։

Հայկի ներկայացումը նայելիս դժվար է տարբերակել որտեղ իսկապես իմպրովիզ արեց, որն էր ծրագրված։ Նա դրանք այնպիսի անմիջականությամբ է մատուցում, որ հավատում ես` սցենարից դուրս էր։ Դերասանը փաստում է` ամեն ներկայացման մեջ 2-3 չնախատեսված իմպրովիզ էլ է անում, հնարավոր է` թեմայի շրջանակում շեղվի սցենարից, սակայն հիմնականում նախապես ենթադում է, որտեղ ինչ իմպրովիզ կարող է անել։ Դրանք կանի՞, թե ոչ՞, կհուշի հանդիսատեսը։ Ասում է` ամեն դահլիճ յուրահատուկ է։

Հայրը` դերասան Վարդան Պետրոսյանը, չի տեսել որդու նոր ներկայացումը, սակայն կարդացել է սցենարը, արել իր նկատողություններն ու հուշումները։ «Հայրս իմ առաջին խորհրդատուներից է` լինի ներկայացմա՞ն, թե՞ կյանքում որևէ որոշում կայացնելու հարց։ Նա ինձ համար և՛ ավագ ընկեր է, և՛ ուսուցիչ, և՛ վարպետ, և՛ օրինակ», ասաց դերասանն ու նկատեց, որ ափսոսում է, որ հայրը հնարավորություն չի ունեցել տեսնելու ներկայացումը, քանի որ այդ դեպքում խորհուրդներն ավելի շատ կլինեին։

Լուսանկարները՝ Էլեն Գասպարյանի