«Ինձ համար սկզբունք է, որ ես պահեմ ընտանիքս, մայրս ու հայրս չաշխատեն». Անատի Սաքանյան

Բլից հարցազրույցների շարքում Tert.am Life–ն այս անգամ զրուցել է դերասանուհի Անատի Սաքանյանի հետ` տարբեր հարցերի միջոցով փորձելով բացահայտել նրա առօրյան և պատկերացումները կյանքի, ընկերության, սիրո մասին։

Անատին զրույցի ընթացքում մի քանի անգամ շեշտեց, թե որքան է կարևորում ծնողների դերն իր կյանքում։

Ամեն առավոտյան ես կինդեր եմ ուտում։

Մի բաժակ սուրճ երբեք չեմ խմում, թեյ եմ նախընտրում։

Կինը ոճային է, երբ խնամված է։

Կինը տհաճ է դառնում, երբ լուրջ չի վերաբերում իր արտաքնին։

Գեղեցիկ աղջիկ լինելու առավելությունը երևի այն է, որ շատ չես շպարվում։ Կարծում եմ` մարդն առաջնահերթ հոգեպես պետք է գեղեցիկ լինի։

Գեղեցիկ աղջիկ լինելու թերությունն այն է, որ մտածում են դու էլ ես լցրել շուրթերդ, դիմել պլաստիկ միջամտությունների, ինչպես բոլորը։ Ես պլաստիկ միջամտությունների չեմ դիմել, բայց ինձ վերագրում են։

Սոցցանցերում ակտիվ չեմ, որովհետև ժամանակս չի ներում։ Ժամանակին իմ էջերը գողացան, Ֆեյսբուքի էջ այլևս չբացեցի, Ինստագրամում էլ վերջերս եմ էջ բացել, բայց շատ ժամանակ չունեմ ակտիվության համար։

Ատում եմ, երբ ստում են` նայելով աչքերիդ մեջ, կեղծավոր են։

Ես լավ տրամադրություն ունեմ, երբ մեքենայի ղեկին շատ բարձր երաժշտություն եմ լսում։

Տրամադրությունս կարող է փչանալ, երբ ինչ որ բան ծրագրում եմ, տրամադրվում ու հանկարծ խափանվում է։ Տրամադրությունս միանգամից ընկնում է ու չի բարձրանում։

Լավ սովորություն ունեմ` միշտ ուրախ եմ ու փորձում եմ կողքիններիս ուրախացնել։

Վատ սովորություն ունեմ` շատ շուտ նեղանում եմ, շատ շուտ էլ բարիշում։ Երկուսն էլ վատ է։

Ապրելու լավագույն կանոնն է` ապրել այնպես, ինչպես դու ես ուզում, որովհետև մի անգամ ես ապրում, պետք է ոչնչից չզրկես քեզ։

Ամենամոտ ընկերս մայրս է։

Ընկերության մեջ ամենակարևորը մաքրությունն է։

Սիրում ես, նշանակում է... ապրում ես քո կեսի կյանքով։ Երկուսիդ կյանքը մեկ է դառնում։

Ամուսնությունը երջանկություն է։ Շատ երկար թեմա է, հակիրճ խոսել չեմ կարող։

Կյանքիս բեկումնային փուլը «Քարե դարդում» նկարահանվելն էր, այն ամբողջությամբ փոխեց կյանքը։ Մյուսը «Անատի լաբ»–ն է, որի շնորհիվ հիմա ամբողջովին այլ կյանքով եմ ապրում։ Այլ հայացքով եմ նայում կյանքին։

Աշխատանքը մարդու երկրորդ ընտանիքն է, որովհետև առօրյայիդ մեծ մասը զբաղեցնում է։

Ես «գերազանցիկ» չեմ, որովհետև կարծում եմ չի կարող մի մարդն ամեն ինչ լավ անել։ Ճիշտ էլ չի լինի, եթե ինքս ինձ գնահատեմ։

Սիրում եմ մարդկանց, որոնք դրական էմոցիաներ են փոխանցում ինձ։

Նյարդայնանում եմ, երբ... աշխատում եմ չնյարդայնանալ։

Անատիի 3 բնորոշիչներն են` շատ ուրախ, թեթև, ներողամիտ։

Երբեք չեմ դավաճանում այն սկզբունքին, որ ես պետք է պահեմ իմ ընտանիքը։ Իմ մաման ու պապան չպիտի աշխատեն, ես պետք է իրենց պահեմ։

Փոշմանել եմ նրա համար, ինչ չեմ արել։ Այդպիսի բաները շատ են, բայց փակագծերը չեմ բացի։

Երբեք չեմ հրաժարվի իմ ընտանիքից։

Միանգամից ժպտում եմ, երբ դուռը  բացում եմ, շունս վազում է ինձ մոտ, աշխարհով մեկ եմ լինում այդ պահին։ Ժպտում եմ, երբ ծաղիկներ եմ նվեր ստանում ու ամենակարևորը` անսահման կինդերներ եմ ունենում։

Ամենավատ հուշ չունեմ։

Ամենալավ հուշս ամեն օրվա մեջ է։ Փորձում եմ ամեն օրվա մեջ հուշ առանձացնել։ Շատ–շատ են։

Ամենամեծ երազանք չունեմ, որովհետև երազանքի տարիքից դուրս եմ եկել։ Ավելի շատ նպատակներ են։

Մանկական չիրականացած երազանք չունեմ։  Ծնողներս հնարավորինն ու անհնարինն արել են ինձ համար։

Կյանքիս ամենամեծ նվերը… ծնողներս են։ Դա ամենամեծ նվերն է, որ երբևէ կարող էի ունենալ։