Մենչը` ընտանիքի հետ ԱՄՆ տեղափոխվելու լուրերի և այնտեղ բիզնես հիմնելու մասին

EXCLUSIVE

Պրոդյուսեր, դերասան, շոումեն Արմեն Պետրոսյանը` Մենչը, տևական ժամանակ է` ԱՄՆ–ում է։ Նրա հետ ԱՄՆ են մեկնել նաև կինը՝ Քրիստինան և 3 երեխաները՝ Էլինան, Մարիան և Աշոտը։ Երեխաներն այնտեղ դպրոց են հաճախում, կինն էլ բիզնես է սկսել։ Սա ենթադրությունների տեղիք է տվել, որ Մենչը մշտական բնակության է տեղափոխվել Միացյալ Նահանգներ։

Tert.am Life–ն այս մասին զրուցել է դերասանի հետ և ստացել հանրությանը հուզող հարցերի պատասխանները։

«ԱՄՆ-ում եմ 2 ամսից մի քիչ ավելի։ Եկել եմ գործուղման։ Քանի որ մի փոքր երկար պետք է մնայի այստեղ, առաջարկ ստացա նկարահանել «Մենչ Challenge» հաղորդումը, որի աշխատանքներով էլ զբաղված էի այս ընթացքում»,– ասաց նա և հավելեց, որ ընտանիքն իր հետ է, քանի որ այս անգամ գործուղումը երկար էր տևելու։

«Երեխաներս այստեղ են  դպրոց հաճախում։ Բնականաբար, դասերը բաց թողնել չէին կարող։ Սա նաև լավ առիթ է նրանց համար խորացնելու անգլերենի իմացությունը։ Ուզում եմ  մի ամբողջ տարի երեխաները հաճախեն այստեղի դպրոց։ Ոչինչ կիսատ չմնա»,– ասաց նա։

Մենչի խոսքով` ընտանիքի վերադարձը Հայաստան նախատեսվում է մայիսին։ Ինքը Երևան կվերադառնա ձմռանը։

«Այստեղ կմնամ մինչև փետրվարի վերջ, որից հետո կվերադառնամ Հայաստան` մասնակցելու «Ֆուլ հաուսի» նոր եթերաշրջանի նկարահանման և կազմակերպչական աշխատանքներին»,– ասաց նա ու հավելեց, որ փետրվարին «Ֆուլ հաուսի» ամբողջ անձնակազմն է լինելու ԱՄՆ–ում, քանի որ  ամերիկյան համերգներն այդ փուլում կմեկնարկեն։

Շոումենից հետաքրքրվեցինք, թե ինչպես են ադապտացել ամերիկյան ապրելակերպին։ «Այստեղ միշտ տուրիստի կարգավիճակում եմ։ Ամբողջական չեմ էլ փորձում ադապտանալ,– ասաց նա ու հավելեց, որ ԱՄՆ մշտական բնակության տեղափոխվելու մտադրություն դեռ չունի։ – Հաջորդ տարվա ծրագրերս դեռ կապված են Հայաստանի հետ։ Ժամանակը ցույց կտա։ 2 եթերաշրջան ունենք, որը պետք է նկարահանենք ամբողջ տարվա համար։ Նաև շատ համերգներ ունենք տարբեր երկրներում»։

Մենչի ընտանիքն ԱՄՆ–ում բիզնես էլ ունի։ Նրա կինը` Քրիստինան, գործընկերոջ հետ զբաղվում է Fasion Inn խանութի ղեկավարմամբ։

«Բիզնեսը նոր չենք հիմնադրել, կինս ու ընկերոջս կինը փետրվարից Գլենդելում բացել են Fasion Inn բուտիկը, որտեղ վաճառվում են միայն հայ դիզայներների աշխատանքները։ Խանութում ներկայացված է մոտ 35 դիզայների ապրանք, որոնք, ի դեպ, էքսկլյուզիվ են,– ասաց դերասանը, իսկ հարցին, թե որքանով է շահավետ ամերիկյան բիզնեսը, պատասխանեց,– Յուրաքանչյուր տեղ խելացի և յուրահատուկ բիզնես ունենալը շահավետ է»։