«Միջազգային ժյուրիի կողմից բազմաթիվ արձագանքներ ենք ստացել Լևոնի կերպարի մասին». «Մանկական Եվրատեսիլ 2018»–ում Հայաստանի մասնակցության մանրամասները

Նոյեմբերի 25–ին Բելառուսի մայրաքաղաք Մինսկում կկայանա «Մանկական Եվրատեսիլ 2018»–ը, որին Հայաստանը կներկայացնի Լևոնը` համանուն երգով։ 12-ամյա երգիչն այսօր ունեցել է իր առաջին հանդիպումը լրագրողների հետ ու պատմել սպասվող ելույթի մասին։ Ասուլիսի մյուս բանախոսները Եվրատեսիլի հայաստանյան պատվիրակության նորանշանակ ղեկավարներ Դավիթ Ծերունյանն ու Անուշ Տեր–Ղոկասյանն էին։

Վաղը Հայաստանի պատվիրակությունը կմեկնի Մինսկ։ Սա նրանց առաջին ճանապարհն է «Եվրատեսիլ»` պատվիրակության ղեկավարի կարգավիճակում։ Ասում են` երկար են աշխատել Հայաստանը մրցույթում հավուր պատշաճի ներկայացնելու համար։

Մրցույթի հայաստանյան պատվիրակ Լևոնը 12 տարեկան է, ծնվել է Արցախում, սակայն 4 տարի է` ապրում է Մոսկվայում։

«Ես շատ եմ սիրում խաղալ ֆուտբոլ, երգել ու պարել։ Երգում եմ 3 տարեկանից, պրոֆեսիոնալ երգով զբաղվում եմ 6 տարեկանից»,– իրե ներկայացրեց Լևոնն ու հավելեց, որ ի տարբերություն նախորդ տարվա մասնակցի` Միշայի, «Մանկական Եվրատեսիլ» մեկնում է առանց թալիսմանի։ –Թալիսմանը մի բան է, որը մարդն է պատրաստում իր ձեռքով։ Դա ոչինչ չի փոխում։ Ես թալիսման չունեմ»։

Մրցույթում Լևոնը կներկայանա այն կերպարով, որով ներկայացել է «Դեպի մանկական Եվրատեսիլում»։ ««Դեպի մանկական Եվրատեսիլի» ժամանակ միջազգային ժյուրիի կողմից ստացանք բազմաթիվ արձագանքներ կապված Լևոնի կերպարի ու երգի հետաքրքրքրության հետ։ Սա մեզ համար ցուցանիշ էր, որ կերպարը սիրվել է, և այն պետք է պահել։ Իհարկե, շոուն կունենա իր հետաքրքրությունը։ Այս տարվա բեմը գերհագեցած է։ Լեդ էկրաններն ու լուսային հետաքրքիր լուծումները  փորձելու ենք  օգտագործել։ Բեմում Լևոնը լինելու է մենակ, սակայն էկրանները շատ հետաքրքիր ձևով ենք օգտագործելու»,– ասաց Դավիթը։

Դավիթը հայտնեց, որ «Դեպի մանկական Եվրատեսիլի» մասնակիցները ֆլեշմոբ են նախաձեռնել և տեսանյութ նկարահանել, որում իրենք կատարում են Լևոնի երգը, պարում նրա պես։

Անուշն էլ նկատեց, որ մրցույթի մասնակիցների միջև լավ ընկերություն է ձևավորվել։ Նրանք մշտապես աջակցում են Լևոնին։ Ի դեպ, մրցույթի մասնակիցներից ոմանք ներկա էին նաև ասուլիսին։ Իր հերթին` պատանի երգիչն ասում է, որ ազգային մրցույթի ժամանակ երգել է ինքն իր համար, չէր եկել, որպեսզի անպայման հաղթի։

Բանախոսները շեշտեցին, որ «Մանկական Եվրատեսիլի» քվեարկության կարգը նախորդ տարվանից փոխվել է. ամեն երկիր կարող է ձայն տալ իր մասնակցին օնլայն քվեարկության միջոցով։

«Քվեարկության մեկնարկը կտրվի նոյեմբերի 23–ին www.junioreurovision.tv կայքով։ Յուրաքանչյուր օգտատեր կարող է քվեարկել 1 անգամ` նվազագույնը 3, առավելագույնը 5 մասնակցի օգտին։ Երկրպագուները երկրորդ անգամ քվեարկելու հնարավորություն կունենան մրցույթի բոլոր ելույթներից հետո` 15 րոպեի ընթացքում»,– ասաց Դավիթն ու կարևորեց, որպեսզի հայերն ակտիվ լինեն և աջակցեն Լևոնին, քանի որ հաղթողը կընտրվի ժյուրիի և օնլայն քվեարկության միասնական արդյունքով` 50/50 հարաբերակցությամբ։

Tert.am Life–ի հարցին, որ նախորդ տարի այս կարգով անցկացված քվեարկության ժամանակ տեխնիկական խնդիր էր առաջացել և շատերը չէին կարողացել քվեարկել, Դավիթն արձագանքեց, որ տարբեր երկրների, այդ թվում` Հայաստանի Հանրային հեռուստաընկերությունները  բողոքի նոտա էին բարձրացրել։ «Եվրոպական հեռարձակողների միությունը քվեարկության կարգի փոփոխությունը բացատրում է նրանով, որ մրցույթի թիրախային լսարանը երեխաներն ու պատանիներն են, որոնք առավել ակտիվ են օնլայն  տիրույթում։ Նախորդ տարի, երբ «Մանկական Եվրատեսիլն» անցկացվեց Թբիլիսիում, գրանցվել էր երբևէ եղած առավելագույն վարկանիշը, 3 մլն հեռուստադիտող ամբողջ աշխարհից դիտում էր մրցույթը։ Այս փորձն ապացուցեց, որ հետաքրքրությունն ավելի մեծ էր, ինչը, սակայն, առաջացրեց տեխնիկական խնդիր։ Մենք ստացել ենք հավաստիացումներ, որ նման խնդիր չի առաջանա»,– ասաց Դավիթը։

Լուսանկարները՝  Էլեն Գասպարյանի