«Որդիս հրաժարվեց երաժշտական կրթություն ստանալ». Նունե Եսայանը` ընտանիքի, իր նորաստեղծ բլոգի և Սիրուշոյին հյուրընկալելու մասին

Երգչուհի Նունե Եսայանը Youtube–ի իր էջում վարում է Favorite Songs բլոգը, որի շրջանակում հյուրընկալում է հայտնի գործընկերներին, նրանց հետ հետաքրքիր զրույց ունենում և կատարում սիրված երգեր։

Tert.am Life–ի հետ զրույցում Նունեն ասաց, որ որոշել է ընկերական հանդիպում ունենալ երգիչ–երգչուհիների հետ, քանի որ իրենց հաճախ են տալիս մասնագիտական գործունեության ընթացքին վերաբերող հարցեր։ Ըստ երգչուհու` այս նախագիծն իրեն հնարավորություն է տալիս լինել «մարզավիճակում», կապ պահել լսարանի հետ և ժամանակին համընթաց քայլել։

«Մարդկանց հետաքրքիր է` երգարվեստում աշխատանքային ընթացքն ինչպես է լինում։ Որոշեցի ցույց տալ դա։ Սյուժե, որպես այդպիսին, չկա։ Մենք նստում ենք, միացնում հեռախոսի տեսախցիկն ու ամեն ինչ տեղի է ունենում այդ պահին։ Հաճախ հենց հետևորդներն են  առաջարկում, թե ինչ երգենք»,– ասաց Նունեն ու հացվելեց, որ նախկինում ձայնագրում էին թողարկումները։ Այս շաբաթ նա հյուրընկալել էր Սիրուշոյին, որի հետ եղել են ուղիղ եթերում։ Երգչուհիներն Ինստագրամի ուղիղ եթերում են եղել մոտ 2 ժամ։ Առաջին մասի ձայնագրությունը Նունեն տեղադրել է նաև Youtube–ում։ Երկրորդ մասը կթողարկի շուտով։

Սա Նունեի ամենաերկար եթերն էր, ասում է` Սիրուշոյի հետ շատ հետաքրքիր զրույց են ունեցել, որի երկրորդ մասը ևս շուտով կթողարկեն։  Նունեն հյուրերին ընտրում է երկրպագուների առաջարկով։ Խոստովանում է` եղել են դեպքեր, երբ հետևորդներն առաջարկել են ինչ–որ մեկի թեկնածությունը, որի հետ զրույցը չի պատկերացրել։ Նրանց անունները չի նշում, բայց ասում է, որ հյուրընկալում է բացառապես այնպիսի մարդկանց, որոնց հետ որոշակի մտերմություն ունի։

«Չի եղել դեպք, որ հրավիրեմ մեկին, ում չեմ ճանաչում։ Բոլորի հետ էլ մտերիմ եմ։ Այդ մտերմությունն օգնում է, որ հյուրին բացահայտենք այն տեսանյունից, որից հասարակությունն իրենց չէր ճանաչում։ Թողարկումներից հետո շատերը գրում են, որ այս կամ այն մարդուն այդքան անմիջական չէին ճանաչում»,– ասաց Նունեն ու նշեց, որ մինչև այս բոլոր թողարկումներն էլ իր համար շատ հետաքրքիր են եղել։

Անդրադառնալով ստեղծագործական գործունեությանը` Նունեն նշեց, որ մի քանի երգահան իրեն խոստացել են նոր երգեր գրել, սպասում է արդյունքներին, ինչից հետո արդեն կմտածի տեսահոլովակի մասին։

Երգչուհին հիմա ավելի շատ ժամանակ է անցկացնում տանը ընտանիքի հետ, բայց շեշտում է` աշխատանքն աչքաթող չի անում. «Տարիների ստեղծածն աչքաթող անել չի լինի։ Պետք է  շարունակել։ Երկրպագուներս էլ են պահանջում դա։ Հիմա աշխատանքս ֆիզիկական  զբաղվածություն չի ենթադրում, ծրագրերը մշակման փուլում են։ Ավելի շատ ընտանիքիս հետ եմ լինում։ Ես դրանից մեծ հաճույք եմ ստանում։ Այնպես չէ, որ ստիպված եմ տանը լինում»,– ասաց նա։

Նունեի և Ավոյի  որդին 11 տարեկան է,  դուստրը` 4։ Նրանք լրացնում են երգչուհու ամբողջ ժամանակը։ Երեխաներից յուրաքանչյուրն անհատական ժամանց է պահանջում, որը մայրիկը սիրով է ապահովում։ Նա նշեց, որ որդին լողի և նկարչության է գնում, դուստրը` քոլեջ։ Նունեն շեշտում է, որ երեխաների համար ընտրում են իրենց հետաքրքրող զբաղմունքներ։

«Երկու երեխաներս էլ սիրում են երաժշտություն, բայց, օրինակ, որդուս առաջարկեցինք երաժշտական կրթության տալ, հրաժարվեց։ Մենք ստիպողաբար ոչինչ չենք անում։ Եթե ցանկանա, կգնա։ Աղջիկս դեռ փոքր է։ Կմեծանա, կորոշի ինչ խմբակների է ուզում գնալ։ Հիմա լեզուներ է սովորում, ինչն անհրաժեշտ է»,– ասաց մայրիկը։