«Քննադատությունները հաշվի եմ առնում». Վահե Զիրոյանը` «Կարմիր բլուրում» աշխատանքն ավարտելու և Womens club–ի մասին

Դերասան Վահե Զիրոյանի կերպարային գիծը ATV հեռուստաընկերության «Կարմիր բլուր» հեռուստասերիալում ավարտվել է։ Վահեն այժմ զբաղված է «Շանթ» հեռուստաընկերության  Womens club հումորային նախագծի և Կամերային թատրոնի իր աշխատանքներով։

Tert.am Life–ի հետ զրույցում դերասանն ասաց, որ հեռուստասերիալներից նոր առաջարկ չունի, հավանաբար, մինչև տարեվերջ այլ հեռուստասերիալում չի նկարահանվի։

«Կարծում եմ, տարեվերջին նոր նախագծեր չեն սկսի նկարահանել։ Ենթադրում եմ, որ նոր առաջարկներ կլինեն տարեսկզբին։ Նոր հեռուստասերիալում նկարահանվել–չնկարահանվելը, սակայն, պայմանավորված է նաև ժամանակի գործոնով։ Womens club–ում աշխատանքը ծավալուն է, գրեթե ամեն օր փորձերի ենք լինում։ Մեծ զբաղվածություն պահանջող դեր ստանձնել չեմ կարող։ Կնախընտրեմ շարունբակել աշխատանքս Womens club–ում»,– ասաց դերասանը։

Անդրադառնալով հումորային ակումբում իր աշխատանքին` Վահեն նկատեց, որ այս ժանրն իր համար նոր չէ։ Ժամանակին իր գործունեությունը սկսել է КВН–ից, այնուհետև խաղացել է «32 ատամ» ակումբում։ Womens club–ում ներկայանալը դերասանի համար նախ ժանրային բազմազանությունը ցույց տալու, երկրորդ հետաքրքիր աշխատանքով զբաղվելու հնարավորություն է։

«Ամենօրյա փորձերը դերասանին լավ մարզավիճակում են պահում։ Երբ կա լավ սցենար ու լավ նախապատրաստություն, բեմում ավելի ինքավստահ ես, ինչը նկատելի է հանդիսատեսի կողմից»,– ընդգծեց Վահեն։ Նախագծի մասին կան ինչպես դրական, այնպես էլ բացասական կարծիքներ։ Վահեի խոսքով` հետևում է բացասական կարծիքներին, դրանք իր համար շատ կարևոր են. «Ընկերներս, գործընկերներս հաճախ անում են նկատառումներ, որոնք շատ օգտակար են։ Մեծ քննադատություն, որպես այդպիսին, չի եղել, սակայն կան մանրուքներ, որոնց վերաբերյալ եղել են դիտարկումներ։  Դրանք անպայման հաշվի եմ առնում»,– ասաց նա։

Դերասանի եկամուտը հիմնականում գոյանում է հեռուստատեսային աշխատանքներից, քանի որ թատրոնի աշխատավարձն ավելի համեստ է։ Շատերն ասում են, որ սերիալում նկարահանվելն իրենց համար զուտ եկամուտի աղբյուր է։ Մասնագիտական բավարավածություն ստանում են թատրոնից։ Վահեն համամիտ չէ այս կարծիքի հետ։

«Ես համամիտ չեմ, որ սերիալը դերասանին ոչինչ չի տալիս։ Ես շատ լուրջ եմ վերաբերում իմ աշխատանքին։ Ծաղրածուի կմարմնավորեմ, թե այլ կերպարի, կարևոր չէ, սա իմ մասնագիտությունն է, որին վերաբերում եմ ամենայն պատասխանատվությամբ։ Ես չեմ անում իմ աշխատանքը զուտ անելու համար,– ասաց նա ու հավելեց, որ «Կարմիր բլուրն» էլ իրեն շատ բան է տվել,– «Կարմիր բլուրն» ինձ տվեց նախ` շատ լավ ընկերներ։ Բացի այդ, սերիալում աշխատանքն իր հետաքրքրությունն ունի։ Դու աշխատում ես դերիդ վրա, քննարկում տեսարանը գործընկերներիդ հետ, նորը սովորում։»։

Ինչպես արդեն հայտնել էինք, Վահեն դերասանուհի Հասմիկ Դանեիլայանի հետ շուտով կներկայացնի տեսահոլովակ:Նրանք կներկայացնեն երաժշտական պոպուրի` հայտնի հայկական ու արտասահմանյան երգերի cover տարբերակ: Դերասանը նկատեց, որ այս փուլում չի հասցնում ներկա լինել մոնտաժին, սակայն հույս հայտնեց, որ մինչև ամսվա վերջ նոր աշխատանքը պատրաստ կլինի և կներկայացնեն լսարանի դատին։