Գեղանկարիչ Էդուարդ Իսաբեկյանի ցուցասրահը վտանգի տակ է. ահազանգում է Արամ Իսաբեկյանն ու հրավիրում քաղաքապետի ուշադրությունը

Գեղանկարիչ Էդուարդ Իսաբեկյանի ցուցասրահը գտնվում է անմխիթար վիճակում, որոշ նկարներ վնասվել են և ունեն ռեստավրացիայի կարիք: Խնդրի մասին ահազանգում է Իսաբեկյանի որդին՝ ՀՀ արվեստի վաստակավոր գործիչ, Գեղարվեստի պետական ակադեմիայի ռեկտոր Արամ Իսաբեկյանը:

Այօր հրավիրված մամուլի ասուլիսին Արամ Իսաբեկյանն ասաց, որ դեռևս 2004-ին Կառավարությունը որոշում էր կայացրել հիմնելու Էդուարդ Իսաբեկյանի թանգարան, որտեղ կցուցադրվեին արվեստագետի աշխատանքները, սակայն ավելի ուշ՝ 2013-ին,  նույն հասցեում բացվել է ցուցասրահ, որը գտնվում է  «Հայարտ»-ի առաջին հարթակում: Իսաբեկյանի որդին նկատում է, որ որպես արվեստագետի` սա իր համար պիտի ուրախության առիթ լիներ, մինչդեռ վերածվել է հոգսի: Վերջինիս խոսքով, պատկան մարմինների անուշադրության հետևանքով, ցուցասրահն  այսօր հայտնվել է վթարային վիճակում՝ տանիքը վնասված է, անձրաևաջուրը հոսում է ներս:

«Դա հարցերի հարցն է իմ ու իմ ընտանիքի համար: Երկար տարիներ ձգվող ու կնճռոտ մի հարց է դարձել: Հայրս ողջ էր, երբ քննարկում էին նրա թանգարանը հիմնելու հարցը: Ինքն ինձ անձամբ ասաց՝ ես չեմ ուզում: Սկզբում չհասկացա, ասացի՝ պապ ջան, ինչո՞ւ չես ուզում, չէ՞ որ կարևոր է քո ժառանգությունը, եթե կա նման առաջարկ, ուրեմն վատ չէ: Մի ուրիշ առիթով խոսում էինք, ասաց, որ ինձ համար է անհանգստանում՝ մտածելով, որ հետագայում ինձ համար դժվարություններ կլինեն ու այդպես էլ եղավ»,-ասաց նա:

Իսաբեկյանը նշեց, որ ցուցասրահին նվիրաբերել է Էդուարդ Իսաբեկյանի 28 նկար, մի քանիսն էլ Ազգային Պատկերասրահն էր տրամադրել ժամանակավոր ցուցադրության համար: Նա նշեց, որ ցուցասրահի բացման առաջին իսկ ձմեռվանից է առաջացել տանիքի հետ կապված խնդիրը, որը հնարավոր է լուծել ոչ թե կոսմետիկ միջամտությամբ, այլ հիմնանորոգմամբ:

«Սա վաղուց դիմանալու վիճակ չէ: Ցուցասրահն անտարբերության չի մատնվել մեր կողմից: Ես և իմ ընտանիքը 30 հազար դոլարի միջամտություն ենք արել, ջեռուցման ու անվտանգության համակարգերը մենք ենք ներդրել,-ասաց Իսաբեկյանն ու ավելացրեց, որ ցուցասրահում ներկայացված նկարների պատշաճ պահպանման գործառույթը, ըստ պայմանագրի, վերապահված է Երևանի քաղաքապետարանին,- Մենք ունենք 2012-ին Երևանի քաղաքապետարանի հետ կնքված պայմանագիր, որտեղ սևով սպիտակի վրա գրված է, որ իրենք պարտավոր են պահպանել պատշաճ ձևով և ապահովել նկարների անվտանգությունը, բայց դա չի արվել: Չնայած ես մի քանի անգամ դիմել եմ որպես նվիրատու նախորդ քաղաքապետին՝ Տարոն Մարգարյանին, բայց ինձ պատասխանել են, որ քաղաքապետարանը համապատասխան ֆինանասկան միջոցներ չունի: Միջոց չլինելն անհավատալի  բան է, որովհետև բոլորս գիտենք՝ այդ միջոցներն ինչի վրա են ծախսվում: Ավելի ուշ ես հասկացա, որ այս խնդիրը չլուծելը կապված է իմ անձի հանդեպ իրենց ունեցած վերաբերմունքի հետ, իհարկե, շատ փակագծեր չեմ ցանկանում բացել»:

Նա  նշեց, որ նոր քաղաքապետի Հայկ Մարությանին ևս դիմել են այդ հարցով և հույս հայտնեց, որ խնդիրը վերջապես լուծում կստանա:

Անդրադառնալով Գեղարվեստի ակադեմիայի գործունեությանը՝ ռեկտորը նկատեց, որ ուսումնական գործընթացին առնչվող բազում խնդիրներ այս տարվա ընթացքում լուծվել են. «Կարելի է ասել՝ ակադեմիան 90 տոկոսով համպատասխանում է այն պահանջներին, որ կարող է լինել մեր ժամանակներում ուսանող դաստիարակելու համար՝ տնտեսական պայմանները, լաբորատորիաների վիճակը, իսկ դասախոսների որակը բավարար է և մի բան էլ ավելին: Մենք համահունչ ենք քայլում եվրոպական մի շարք երկրների հետ, մեր ուսանողները մասնակցում են փոխանակման ծրագրերի, տարբեր մրցույթների, համատեղ ցուցահանդեսներ են ունենում»,-ասաց ռեկտորը:

Իսաբեկյանի դիտարկմամբ, խնդիրներն ավելի շատ ֆինանսական են և ակադեմիան կարիք ունի պետական ներդրումների. «Մենք ներդրումների կարիք ունենք, որովհետև արվեստով զբաղվել ցանկացող երեխաների ընտանիքներն այդքան էլ  հնարավորություն չունեն վճարովի համակարգում սովորելու: Ֆինանսական առումով թե՛ ակադեմիան և թե՛ նմանատիպ արվեստի այլ բուհերն ունեն պետական աջակցության կարիք: Դա ընդունված է եվրոպական մի շարք երկրներում: Նմանատիպ բոլոր բուհերն աշխատում են պետական դոտացիայիով»,-եզրափակեց նա: