«Ո՞նց կարելի է քեզ հետևողներին հիմարի տեղ դնել, խաբել, որ արտաքին փոփոխություն չես արել». Էվա Խաչատրյանի նոր ֆոտոշարքն ու մտքերը՝ կանացի գրավչության, սիրված լինելու մասին

Կնոջ գրավչության համար նախապայմաններ չկան, դա առաջին հերթին ներքին զգացողություն է.  համոզված է դերասանուհի Էվա Խաչատրյանը: Նրա կարծիքով գրավչության մեջ ամփոփվում են կնոջ ցանկալի ու սեքսուալ լինելը: 

Դերասանուհին Tert.am Life-ին է տրամադրել Գյումրիում արված նոր ֆոտոշարքն ու խոսել կնոջ գեղեցկության, սիրված լինելու և այլ հարցերի մասին:

Էվան պատմեց, որ ֆոտոշարքին հատուկ չի պատրաստվել: Նկարահանվելու առաջարկը ստացել է Գյումրի գնալու ճանապարհին: «Բախտս այնքանով բերեց, որ մեկնել էինք երկու օրով և ինձ հետ մի քանի հագուստ էի վերցրել: Նկարահանման համար գեղեցիկ փողոցներ էինք ընտրել, պարզապես ժամանակի խնդիր ունեինք, նաև անձրև սկսվեց, ինչը փոքր-ինչ խանգարեց ընթացքին: Ֆանտաստիկ հյուրախաղեր ունեցանք, իսկ լուսանկարները հուշ մնացին»,-ասաց նա:

Ֆոտոշարքում Էվան ուղիղ հարդարված վարսերով է, թեև ասում է` թե՛ իր, թե՛ շրջապատի կարծիքով ինքն առավել հետաքրքիր է գանգուր մազերով: «Միանշանակ իմ բնական խուճուճ վարսերն են ինձ հոգեհարազատ: Դրանք ընդգծում են իմ տեսակը, բայց փոփոխություններ հաճախ եմ անում: Դա կապված է նաև աշխատանքիս, իմ մարմնավորած կերպարների հետ»:

Էվայի կարծիքով կանացի գրավչությունը տաղանդի պես մի բան է, այն կնոջ մեջ կամ կա, կամ ոչ. «Դա պարզապես ներքին զգացողություն է և կապված է նաև բնության, ինտելեկտի, ներքին աշխարհի հետ։ Դա չեն սովորում, հղկում: Բնությունից լինում է, տարիների ընթացքում քեզ հետ հասունանում է,- ասաց դերասանուհին և ավելացրեց, որ հակառակ սեռի ուշադրությունը կարող է բարձրացնել կնոջ ինքնագնահատականը,- Կինը բնությունից է այդպիսին. միշտ ցանկանում է նկատված, շոյված, ուշադրության կենտրոնում լինել, բայց սեքսուալ ու գրավիչ լինելն ի ծնե  է տրվում: Այնպես չէ, որ 120 տղամարդ կոմպլիմենտ արեց, գրավիչ կդառնաս»:

Ասում են, երբ կինը սիրված է կամ սիրում է, լրացուցիչ հմայք է հայտնվում նրա դեմքին ու աչքերում: Էվան կարծում է, որ ամեն մեկի մոտ դա յուրովի է դրսևորվում: Դերասանուհին նշեց, որ չափից շատ սիրված լինելու և հակառակ սեռի կողմից տրվող ուշադրության դեպքում ինքը դադարում է ջանքեր գործադրել առանձնահատուկ լինելու համար և փոքր-ինչ ալարկոտ է դառնում:

«Այդ պարագայում ես չեմ ձգտում ավելի լավը լինել, ավելի հանգիստ, պասիվ, առօրյա վիճակներում եմ լինում, իհարկե խոսքը խնամված կամ չխնամված լինելու մասին չէ: Երբեմն լինում է, որ ինչ-որ մեկի համար ուզում ենք ցանկալի ու տպավորիչ լինել, իսկ երբ չափից շատ սիրված ես ու արդեն կա մեկը, որի համար հետաքրքիր ես, կոնկրետ ինձ մոտ գալիս է ալարկոտություն՝ թե՛ հագուկապի, թե՛ զարդարվելու առումով»,-ասաց նա:

Թե այս փուլում ո՞ր տարբերակն է իր կյանքում, Էվան չցանկացավ մանրամասնել՝ նշելով, որ անձնական կյանքի մասին չի սիրում բարձրաձայնել. «Եթե գա մի պահ, որ ցանկություն կունենամ որևէ բան բարձրաձայնելու, ամեն ինչ այնքան բուռն կլինի, որ ցանկանամ դրա մասին խոսել, կխոսեմ։ Այս դեպքում դա միայն իմն է»:

Էվայի խոսքով, հակառակ սեռի կողմից տրվող ուշադրությունը, իրեն երբեմն կարող է վանել. «Երբեմն ինձ վանում է ուշադրությունը, եթե դա արվում է գռեհիկ կամ անհանգստություն պատճառելու միտումով: Եթե մարդիկ կիրթ են, գիտեն իրենց միտքը արտահայտելու ճիշտ ձևն ու միջոցը, դա ինձ չի կարող խանգարել, ի վերջո, ես գիտակցված եմ ընտրել իմ մասնագիտությունը և հասկացել եմ, որ այն իր հետ բերում է որոշակի դրսևորումներ, որոնց հետ պետք է հաշվի նստես»,-նշեց դերասանուհին:

Անդրադառնալով գեղեցկության մերօրյա չափանիշներին՝ նա նկատեց, որ եթե կինն ունի հնարավորություն առավել գեղեցիկ, պահպանված տեսք ունենալ, պետք է օգտվի այսօր հասանելի տարբերակներից՝ իհարկե պահելով չափի զգացողությունը: Խոսքը նաև պլաստիկ միջամտությունների մասին է: Էվան 3 տարի առաջ է քթի պլաստիկ վիրահատություն արել: Ասում է՝ դա իրեն ազատեց տեսախցիկների հետ աշխատելիս ունեցած բարդույթներից:

«Ես հիմա տեսախցիկի ռակուրսներից չեմ խուսափում, իսկ նախկինում կենտրոնացած էի, որ ճիշտ կողմից նկարվեմ, գլուխս շատ չկախեմ, հիմա ձերբազատվել եմ այդ խնդրից: Հանգիստ աշխատում եմ բոլոր ռակուրսներից ու բացարաձակ մտավախություն չունեմ՝ ինչպիսին կլինեմ: Կարծում եմ, երբ մարդը խուսափում է իր փոփոխության մասին խոսել, ավելի վտանգավոր է: Բարեբախտաբար, այսօր էլ եթերում կան սերիալներ, որտեղ դեռ փոփոխություն չեմ արել, մարդիկ կույր չեն, տեսնում են այդ փոփոխությունը: Շատ հայտնի մարդիկ կան, որոնց ինքս էլ հետևում եմ, և live անելու ընթացքում ապշում եմ, երբ նմանատիպ հարցերին պատասխանում են, որ ոչ մի միջամտություն չեն արել: Դա պարզապես հիմարություն է, ո՞նց կարելի է քեզ հետևող 8 հարյուր հոգու այդ տարբերակով խաբել, հիմարի տեղ դնել: Նրանք կույր չեն, տեսնում են այդ փոփոխությունները»,-եզրափակեց դերասանուհին:

Լուսանկարները՝ SWAG STYLE Photography-ի