Նաիրա Մովսիսյանի դստեր 3–ամյակն ու դերասանուհու փոխված կյանքը

Դերասանուհի Նաիրա Մովսիսյանի դուստրը՝ Մարիան, երեկ դարձել է 3 տարեկան։ Փոքրիկի տարեդարձը տոնել են նախ մանկապարտեզում` իրեն արդեն հարազատ դարձած միջավայրում, այնուհետև ժամանցի կենտրոններից մեկում ընտանեկան ընթրիք են ունեցել։

Երեկոյի ժամանակ Tert.am Life-ը լուսանկարել է Նաիրային և դստերը ու ներկայացնում է, թե ինչպես են տոնել փոքրիկի 3–ամյակը։ Մարիայի համար պատրաստված տորթը Բարբիի տեսքով էր։ Աղջիկ երեխաների մեծամասնության պես նա էլ սիրում է խաղալ տիկնիկներով։

«Այս տարի որոշեցի մեծ խնջույք չանել, նախորդ տարիներին մեծ միջոցառում էի կազմակերպում, բայց ինքը չէր հասկանում, որ իր ծնունդն է։ Քանի որ իր շրջապատը մանկապարտեզում է, այնտեղ շատ գեղեցիկ ու ուրախ նշեցինք իր ծնունդը։ Արդեն երեկոյան միայն ես, մայրս և աղջիկս գնացինք ժամանցի կենտրոններից մեկը,– ասաց դերասանուհին ու հավելեց, որ կարող է մեկ օրում որոշել խնջույք անել, մեկ օրում ամեն բան չեղյալ համարել,– Իմ ընկերները գիտեն, որ ես բնավորության մարդ եմ, ինչ–որ բան անել–չանելը պայմանավորված է իմ այդ պահի ցանկությամբ, ոչինչ պարտադրված չեմ անում»։

Թեև Մարիայի ծնունդը նշել են փոքր միջավայրում, ուրախ ու դրական օր են ունեցել։ Նաիրայի համար դեկտեմբերի 10–ն առանձնահատուկ է։ 3 տարի առաջ դստեր ծննդով կյանքը գլխիվայր փոխվեց։ Դերասանուհու խոսքով` դստեր ծնունդը կյանքը ոչ թե փոխվել է, այլ նոր սկսվել, ամեն ինչ իմաստավորվել է ու նոր գույն ստացել։

Դերասանուհին միշտ շեշտում է, որ խիստ մայրիկ է։ Ասում է` երեխայի ճիշտ դաստիարակության համար դա շատ կարևոր գործոն է։

«Որքան աղջիկս մեծանում է, այնքան խստությունս ավելանում է։ Ես ատում եմ լկստված երեխաներին և չեմ ուզում աղջիկս լկստված լինի։ Միաժամանակ կարևորում եմ, որպեսզի խստությունը վախ չձևավորի երեխայի մոտ։ Կարծում եմ` ինձ մոտ ստացվում է պահել բալանսը։ Այստեղ ինձ օգնության է հասնում հոգեբանի մասնագիտությունս։ Ինձ հաչախ են ասում, որ զարմանում են, թե աղջիկս որքան դաստիարակված է։ Ասում են` հայտնիների երեխաներին լկստված են պատկերացնում, բայց իմ դեպքում այդպես լինել չի կարող։ Իմ աղջիկը չի կարող այդպիսին լինել, ի վերջո, նա նաև հայտնի մարդու երեխա է և իր նիստուկացը պետք է չափված–ձևված լինի»,– ասաց Նաիրան, ապա նկատեց, որ ինքն էլ է իր քայլերը վերանայել դստեր ծննդից հետո։ Հիմա ամեն ինչ հարմարացնում է մայրիկի կարգավիճակին։

Հիմա Նաիրայի երազանքներն ու նպատակները մեծապես կապված են դստեր հետ։

Երեխայի խնամքը դերասանուհին կիսում է մայրիկի հետ։ Միաժամանակ, նա ընդգծեց, որ հասցնում է բավականաչափ ժամանակ տրամադրել երեխային։ Անկախ զբաղվածությունից աշխատում է երեկոները տանը լինել և Մարիայի հետ անցկացնել։

«Երբ ես տանն եմ, անգամ եթե հոգնած եմ և չեմ խոսում, հանգիստ եմ։ Երրբ երեխայիս հետ եմ, ամեն ինչ խաղաղվում է։ Դրա համար հիմա ժամանակս ավելի շատ տանն եմ սիրում անցկացնել»,– ասաց նա։

Լուսանկարները` Էլեն Գասպարյանի