«Նեմրայի» լավագույն համերգներից մեկը, խմբի հաջողությունները 2018–ին ու ակնկալիքները 2019–ից

«Նեմրայի» հանդիպումը երկրպագուների հետ դեկտեմբերի 10–ին վերջինն էր այս տարվա համար։ Թեև խումբը համերգներին ներկայանում է գրեթե նույն ծրագրով` մի քանի երգի փոփոխությամբ, նրանց համերգները միշտ սպասված են։ Տոմսերը սպառվում են մեծ արագությամբ, իսկ երկրպագուներն ապահովում են փոխադարձ էներգետիկայի մեծ չափաբաժինը։

Tert.am Life-–ը ներկայացնում է, թե ինչպես է անցել «Նեմրայի» վերջին համերգը 2018–ին և ինչ սպասել խմբից 2019–ին։

«Նեմրացիները», ինչպես երկրպագուներին անվանում են խմբի անդամները, այնպես էին երգում բոլոր ստեղծագործությունները, որ Վանը երբեմն դադարում էր երգել ու հետևում էր նրանց կատարմանը։ Connection Lost, Daisy, I'm a Liar, Sad Reality, Last Chance To Love և մյուս սիրված երգերն ամեն անգամ ընդունվում են նույն ջերմությամբ։ «Նեմրայի» նոր երգը, որի տեսահոլովակի պրեմիերան օրեր առաջ կայացավ, ևս ընդունվեց մեծ ոգևորությամբ։ Because–ը երկու անգամ հնչեց, երկու անգամն էլ մեծ ոգևորությամբ ընդունվեց։

Համերգը բաղկացած էր երկու մասից։ Ընդմիջման ժամանակ ելույթ ունեցավ The Hiwave բենդը։ «Նեմրայի» հետ ելույթ ունեցան Անդրե Սիմոնյանն ու Արսեն Բոյաջյանը։ Համերգից հետո խմբի անդամները ոգևորված էին։ Սա խմբի լավագույն համերգներից մեկն էր։ Ասում են` երկրպագուներից միշտ էներգիա են ստանում, բայց այս անգամ չափաբաժինն այլ էր։ «Այս անգամ էներգիան մինչև վերջ բավականացրեց, այնքան, որ վերջում ցանկացանք ևս մի երգ կատարել։ Միշտ շատ էներգիա ենք ծախսում, բայց այս անգամ էներգետիկան շատ ուժեղ էր, մեծ ուժ ստացանք»,– ասաց խմբի մենակատար Վանը։

Այն, որ խմբի հիմնական ծրագիրը նույնն է, պահանջարկին չի վնասում։ Սրա համար Վանն օբյեկտիվ պատճառ է առաջ բերում. «Մեր երկիրը փոքր է։ Ես չեմ գտնում այլ խումբ, որը, լինելով սկսնակ, 6 տարվա ընթացքում ունենա 26 երգ։ Մենք շատ երգեր ունենք, ուղղակի շրջագայությունները քիչ են, հաճախ հենց Երևանում ենք նվագում։ Ստացվում է` նույն հանդիսատեսի համար ենք նվագում, բայց մարդիկ սիրում են։ Ես էլ իմ սիրած խմբերի երգերն անվերջ կլսեմ, եթե համերգ ունենան Երևանում։ Դու ապրում ես սիրածդ երգով»։

2018–ը «Նեմրայի» համար արդյունավետ էր։ «Դեպի Եվրատեսիլին» մասնակցությունը թեև խմբին հաղթանակ չբերեց, տվեց ավելի մեծ ճանաչում և սեր։ Վանին ու ընկերներին ոգևորում է այն փաստը, որ իրենց լսարանն ահամեմատ աճել է։ Հենց երկրպագուների քանակն է նրանց ստիպել դուրս գալ ակումբներից ու վերջին մեկուկես տարում համերգները կազմակերպել Տիկնիկային թատրոնում։

««Եվրատեսիլից» հետո նույնիսկ Տիկնիկայինն էր փոքր, 2 համերգ արեցինք։  Շատ հաճելի է, որ լսարանն աճում է։ Համալիրում համերգ անելուն դեռ չենք ձգում, որովհետև դրա համար լավ գովազդ է պետք, ինչն արվում է միայն ռաբիս երգիչների համար, բայց չենք բողքում»,– նկատեց Վանը։

Երգչից հետաքրքրվեցինք, որքանո՞վ է շահավել «Նեմրայի» գործունեությունը` հաշվի առնելով, որ նոր երգերն ու տեսահոլովակները որոշակի ծախս են ենթադրում, խմբի անդամներին էլ եկամուտ է պետք։

«Իհարկե, անհամեմատելի է հարսանեկան երգիչների հետ, բայց կարծում եմ` Հայաստանի ռոք խմբերի մեջ «Նեմրան» ամենաշատ վաստակողն է։ Տարբեր կորպորատիվներից հրավերներ ենք ունենում։ Քանի դեռ սեփական ընտանքի չենք պահում, կարողանում ենք ապրել, մեր գլուխը պահել, նաև նոր ձայնագարութոյւններո անել, տեսահոլովակներ նկարահանել։ Իհարկե, դա նաև մեր ընկերների շնորհիվ է հնարավոր դառնում»,– ասաց Վանն ու հավելեց, որ ինքն այլ աշխատանք չունի, քանի որ խմբի ադմինստրատիվ աշխատանքներով էլ է զբաղվում, իսկ Մարիաննան, Վասպուրն ու Մարեկը նաև այլ աշխատանք ունեն։

Անցնող տարին շատ հաջող էր «Նեմրայի» համար։ Խմբի անդամները հուսով են` 2019–ին «Նեմրայի» հաջողությունները կշարունակվեն։ Մինչև տարեվերջ նրանք ևս մի ակուստուկ երգ կներկայացնեն երկրպագուներին, իսկ հաջորդ տարում նպատակ ունեն համերգներով շրջագայել տարբեր երկրներով։ «Այս տարի հասցրեցինք նվագել Ուկրաինայում, Վրաստանում։ Հիանալի տպավորություններ ունենք։ Ուզում ենք շրջագայել  աշխարհով, հետո վերադառանալ Երևան»,– ասաց մենակատարը։

2018–ը որքան էլ արդյունավետ  ու հաջող տարի էր Նեմրայի համար, խմբի անդամներից երկուսի` Վանի ու Վասպուրի կյանքում վատագույնն էր։ «Իմ ու Վասպուրի կյանքում ամենավատ տարին էր։ Մեր ընտանիքում դժբախտ պատահար եղավ, հայրս մահացավ,– անկեղծացավ Վանն ու հավելեց, որ «Նեմրան» նաև օգնում է հաղթահարել դժբախտ օրերը,– Քանի որ հորս երազանքը կապված էր «Նեմրայի» հետ, մենք չդադարեցինք  գործել։ Դա մեզ մեծ ուժ տվեց, որպեսզի փորձենք հաղթահարել, թեև ինչքան ժամանակը գնում է, այնքան ցավը մեծանում է»։

Լուսանկարները` Էլեն Գասպարյանի