«Մայրս դեմ էր, որ դերասանուհի դառնամ». Ժաննա Վելիցյանը՝«Էլենի օրագրում» իր կերպարի ու խաղընկերների հետ հարաբերությունների մասին

Ուսանելու նպատակով գյուղից քաղաք տեղափոխված մի աղջիկ, որը չափազանց ակտիվ է, շարժուն, պարբերաբար փորձությունների մեջ է հայտնվում, նաև փոքր-ինչ միամիտ է. երիտասարդ դերասանուհի Ժաննա Վելիցյանի առաջին հեռուստատեսային դերը հենց այսպիսին է: «Էլենի օրագիրը» հեռուստասերիալն իրեն ճանաչում բերեց, Աննայի կերպարն էլ կարճ ժամանակում հասցրեց սիրվել:

Tert.am Life-ի հետ զրույցում Ժաննան պատմել է սերիալում հայտնվելու, իր կերպարի հետ ունեցած ընդհանրության ու խաղընկերների հետ հարաբերությունների մասին:

Դերասանուհի դառնալու ցանկությունը Ժաննայի մոտ փոքր տարիքից է եղել, երբ հետևում էր հայերեն թարգմանությամբ բրազիլական սերիալներին ու իրեն պատկերացնում էկրանից այն կողմ, սակայն Թատերական ինստիտուտն ավարտելուց հետո առաջին քայլերն արել է ու շարունակում է թատրոնում: Ժաննան խաղում է Համազգային թատրոնում, «Գոյ» թատրոնում էլ որպես հրավիրյալ դերասանուհի հանդես է գալիս մեկ ներկայացման մեջ:

«Երբ հստակ որոշեցի, որ ուզում եմ դերասանուհի դառնալ, մայրիկս դեմ էր, ասաց՝ ավելի լուրջ մասնագիտություն ընտրիր, բայց հիմա վերաբերմունքը փոխել է, իմ ամեն ներկայացմանը գալիս է ծաղիկներով, հուզված բեմ է բարձրանում, ես էլ ամեն անգամ ծիծաղելով հիշեցնում եմ, որ դեմ էր մասնագիտական ընտրությանս:)»,-պատմեց Ժաննան:

Դերասանուհին նկատեց, որ հեռուստատեսային առաջին դերն իր համար պատասխանատու է եղել, նաև որոշակի մտավախություններ է ունեցել, քանի որ պետք է ներկայանար արդեն ճանաչված կերպարների կողքին ու իր կայուն լսարանն ունեցող սերիալում:

«Ես մի փոքր ավելի ուշ մտա սերիալային ասպարեզ՝ 24 տարեկանում, որովհետև ուզում էի որոշակի դպրոց անցնել, հետո ինձ փորձել այդտեղ: Մասնակցեցի «Էլենի օրագրի» քասթինգին, երկու տարբեր կերպարի համար, բայց չէի էլ մտածում, որ կանցնեմ, ավելի ուշ՝ հրավեր ստացա ռեժիսոր Մհեր Խաչատրյանից կոնկրետ դերի համար: Բավականին երկար քննարկեցինք ու որոշեցի փորձել: Որպես դերասանուհի ինձ էլ էր հետաքրքիր տեսնել, թե թատրոնից դուրս՝ էկրանին ի՞նչ է կատարվում»,-ասաց Ժաննան:

Նա նշեց, որ իր հերոսուհու՝ Աննայի հետ ընդհանրությունը թերևս աշխույժ լինելն է, որոշ չափով նաև միամտությունը. «Ի վերջո, ես եմ խաղում այդ կերպարը ու  ինչ-որ մի բան ինձնից դնում եմ նրա մեջ: Աննան շատ հարցերում չի կողմնորոշվում, որոշ դեպքերում հասուն որոշումներ է կայացնում, այսինքն՝ ես իրեն մի գծի մեջ չեմ դրել, չեմ կաղապարել կերպարիս, կախված իրավիճակից նա տարբեր կերպ է դրսևորում իրեն»:

Ժաննայի խոսքով, ինչպես շատերի դեպքերում, իր պարագայում էլ կերպարին ու իրեն հաճախ են նույնացնում. «Մի անգամ ըներուհուս հետ խանությում ինչ-որ բան էինք նայում, ես շատ ակտիվ քննարկում էի՝ որը վերցնել: Մի կին բարի ժպիտով նայեց ինձ ու ասաց՝ դու փաստորեն իրական կյանքում էլ ես այսպիսին, ասացի՝ հա, երևի ինչ-որ նմանություն կա: Իրականում շատ դրական արձագանքներ եմ ստանում, բայց բացասականի դեպքում էլ ադեկվատ պետք է լինեմ ու դրանից էլ ինչ-որ բան քաղեմ ինձ համար»:

Դերասանուհին ասաց, որ ժամանակի ընթացքում ինտեգրվել է սերիալի ստեղծագործական թիմի ու խաղընկերների միջավայրում և ջերմ հարաբերություններ հաստատել։

«Թիիմում որևէ կոնֆիլկտ չենք ունեցել, առ այսօր ստեղծագործական մթնոլորտ է: Կարելի է ասել, բոլորի հետ էլ ջերմ հարաբերությունների մեջ եմ,- ասաց նա և ավելացրեց, որ իր հիմնական խաղընկերուոհւ՝ Անուշիկի դերակատար Իրինայի հետ հասցրել են բավականին մտերմանալ նաև կադրից դուրս,- Այնքան հավես, դրական հարաբերությունների մեջ ենք, որ առօրյա կյանքում էլ իրեն կարող եմ «չաղ» անվանել:)»:

Ի տարբերություն սերիալի մյուս կերպարների, Ժաննայի հերոսուհուն, ըստ սցենարի, բաժին է հասել սիրային գիծ ունենալ դասախոսի հետ: Դերասանուհին նկատեց, որ մասնագիտական առումով իր համար դա դժվարություն չի առաջացնում: 

«Իհարկե չկա հեշտ դեր, բայց երբ դու արդեն գտնում ես կերպարիդ, նաև որոշ չափով քո խաղընկերոջ կերպարային գիծը, ամեն բան ավելի հեշտ է դառնում: Մենք միմյանց իրավունք ենք վերապահել խորհուրդներ տալ նկարահանման ընթացքում, թե ինչպես ավելի լավ կնայվի մեր խաղը և այդպես շատ հետաքրքիր է ստացվում»,-եզրափակեց նա: