«Տաթևն ինձնից ուժեղ է լինելու». Հասմիկ Կարապետյանը՝ դստեր 2-ամյակի և իր զգացողությունների մասին

Երկու տարի առաջ այս օրը երգչուհի Հասմիկ Կարապետյանը զգաց մայր լինելու բերկրանքը դստեր՝ Տաթևի ծննդով: Երջանիկ մայրիկը փաստում է՝ Տաթևն իր հետ նոր գույներ բերեց ու իմաստ հաղորդեց իր կյանքին: Tert.am Life-ի հետ զրույցում Հասմիկը պատմել է, թե ինչպես են նշելու փոքրիկի տարեդարձը և խոսել իր մայրական նվիրվածության ու Տաթևի հանդեպ սիրո դրսևորման մասին:

Երգչուհին նշեց, որ Տաթևի տարեդարձն այս տարի կնշեն ընտանիքով, կգնան տարբեր մանկական ժամանացի վայրեր, որտեղ դուստրը հետաքրքիր ու հագեցած օր կունենա: Հասմիկի խոսքով, դստեր օրը տոնական դարձնելու լավագույն տարբերակը դա է, քանի որ նա դեռ փոքրիկ է և շատ բան չի գիտակցում:

«Քանի որ մեր բալիկը շատ ակտիվ է, աշխույժ, իր էներգիան այնքան շատ է, որ իրեն տանն այլևս հետաքրքիր չէ նույն խաղալիքներով զբաղվել, իսկ նորերից էլ շատ շուտ հոգնում է: Որոշեցինք այսօր իրեն տանել հատուկ մանկական վայրեր, որտեղ հաստատ իր համար շատ ավելի հետաքրքիր և ուրախ կլինի»,-ասաց նա:

Հասմիկն ասաց, որ Տաթևն արդեն հասցրել է բազմաթիվ նվերներ ստանալ հարազատների կողմից, իսկ ինքն ու Շանթը նախընտրել են փոքրիկի զգեստապահարանը համալրել նոր հագուստներով: «Ձմեռային տաքուկ, գեղեցիկ հագուստներ ենք գնել իր համար, նաև նոր խաղալիքներ, բայց կարծում եմ լավագույն նվերն այն է, որ ես միշտ իր կողքին եմ:): Որպես մայրիկ ինձ ամբողջովին նվիրել եմ Տաթևին, չեմ թողնում, որ նա մի վայրկյան տխրի, փորձում եմ անընդհատ իր հետ զբաղվել, խաղալ,-ասաց Հասմիկը և նկատեց, որ Տաթևին նվիրված երգն ու տեսահոլովակն էլ վերջինիս համար հիշարժան նվեր է ողջ կյանքի ընթացքում,- Ինձ թվում է դա բոլոր տարեդարձներին կարելի է նվեր համարել իրեն իմ և հայրիկի կողմից, բայց իհարկե, երբ մեծանա, շատ ավելի հետաքրքիր կընկալի և կգիտակցի այդ երգը, կհասկանա, թե ինչքան թանկ է նա մեզ համար»:

2 տարեկան Տաթևը, մայրիկի խոսքով, արդեն իսկ ունի ձևավորված բնավորություն: Թե ում է այդ տեսանկյունից ավելի շատ նման, երգչուհին դժավարացավ ասել. «Դեռ չենք կարող ասել բնավորությամբ ինձ է նման, թե Շանթին, բայց արտաքնապես հայրիկին են նմանեցնում, թեև ես Տաթևի հայացքի մեջ ինձ եմ տեսնում: Երբ նայում եմ իմ ու մայրիկիս փոքր տարիքի լուսանկարները ևս մեկ անգամ համոզվում եմ դրանում: Իր բնավորությամբ Տաթևը յուրահատուկ է: Արդեն զգում եմ, որ իր մեջ լիդերի հատկություններ կան, այսինքն նա ուր էլ գնա, հաստատ մի ելք կգտնի ինքն իր համար: Բնավորությամբ շատ ուժեղ է: Ես արդեն նկատում եմ, որ ինձնից ուժեղ է լինելու, ինչի համար շատ ուրախ եմ»:

Երգչուհին նկատեց նաև, որ Տաթևը երաժշտական ունակություններ ունի: «Արդեն զգալի է, որ ունի շատ լավ լսողություն, երաժշտական է, որովհետև նույնիսկ նախընտրած երգեր ունի և անմիջապես արձագանքում է իմ երգելուն: Երբ հղի էի, անընդհատ երգել եմ իր համար: 9 ամսվա ընթացքում նա իմ ու դաշնամուրի ձայնը լսել է»,-նշեց նա:

Երկու տարի վայելելով Տաթևի ներկայությունն իր կյանքում, երգչուհին փաստեց՝ երբեք չի մոռանում դստեր տարեդարձի օրը շնորհակալություն հայտնելու մասին.«Ես այսօր արթնացել եմ մտքումս աղոթքով և ինքս ինձ համար շնորհակալություն եմ հայտնել Աստծուն այս պարգևի համար, շնորհակալություն եմ հայտնել նաև իմ բժշկին, որը, Աստծո կամոք,  մեզ պարգևեց մեր բալիկին: Իմ մտքերում, աղոթքներում արդեն ավելի հասուն ձևով անընդհատ խնդրում եմ, որ Աստված պահի, պահպանի Տաթևին, որովհետև յուրաքանչյուր մայր ուզում է, որ իր բալիկը շատ երջանիկ լինի, կայանա, գտնի իր տեղն այս կյանքում, երբեք չընկճվի, բայց մենք բոլորս էլ գիտենք, որ կյանքը բարդ ճանապարհ է»,-եզրափակեց Հասմիկը: