«Սպասվող տարվանից նոր և ուրիշ կյանք եմ ուզում Գոռի հետ». Մարիամ Ալեքսանյանն ամփոփում է տարին

Էմոցիոնալ ու տաք. այսպես է բնորոշում ընթացիկ տարին երիտասարդ դերասանուհի Մարիամ Ալեքսանյանը: Տարեսկզբին Մարիամն հանդիպեց իր կյանքի սիրուն, որը սկզբում ընդամենը իր գործընկերն էր: «Բացիր աչքերդ» սերիալում նկարահանվելը  ճակատագրական եղավ նրա ու դերասան Գոռ Համբարձումյանի համար: 

Tert.am Life-ի հետ զրույցում Մարիամը ամփոփել է 2018-ն ու անդրադարձել Գոռի հետ հարաբերությունների ներկա փուլին:

Հետահայաց դիտարկելով անցնող տարին՝ դերասանուհին նկատեց մասնագիտական ու անձնական կյանքում ձեռքբերումներ եղել են, բայց եղել են նաև կորուստներ: «Տարին էմոցիոնալ, տաք, ակնթարթային երազ էր: Ներքին աշխարհս սոսնձել եմ ինձ ու պահում եմ գաղտնի: Կասեմ միայն, որ ունեցել եմ մարդկային կորուստներ, բայց դրանք իմն են, բաց եմ թողել, թող տարվա հետ գնա նեգատիվը: Դա պետք չէ, այն քանդում է մարդուն, պոկում քեզ ամեն ինչից»,-ասաց նա:

Դերասանուհին նշեց, որ մասնագիտական կյանքում անցնող տարին հագեցած էր: Հեռուսատասերիալներում նկարահանվելն էլ իրեն որոշակի ճանաչում բերեց: Մարիամի խոսքով, հայտնիությունը որևէ բան չի փոխել իր կյանքում, թեև հաճելի է, երբ իրեն ճանաչում են. «Հեռուստատեսություն  մտել եմ մեկ նպատակով, որը չեմ բարձրաձայնի: Դա  ոչ թե փոխեց, այլ հեղափոխեց: Փոխվեց կարծիքս ու վերաբերմունքս: Իհարկե չես կարող այս ասպարեզի բոլոր մարդկանց հետ դրական հարաբերություններ ունենալ, բայց փորձում եմ էթիկան չխախտել: Չգիտեմ ՝ դերասանի համար կարևոր է ճանաչված լինելը, բայց փառասեր չեմ, չեմ տարվում ճանաչված լինելու հիվանդությամբ: Դրական կողմերից մեկն այն է, որ երբ ինձ ճանաչում են, ժպտում են: Շնորհակալ եմ»:  

Մարիամն ու Գոռը արդեն մեկ տարի է ՝ միասին են: Դերասանուհին նշեց, որ ընթացիկ տարին իրենց համար հրաշալի է եղել և դրական սպասումներ ունեն նաև 2019-ից. «22.01 2018՝ համարյա մեկ տարի, մեկ ակնթարթ, ուղղակի չգիտեմ՝ ես եմ հայտնվել նրա երազում թե՞ նա իմ: Արթնանալ չեմ ուզում, ինձ այնտեղ տաք է»:

Թե երբ են պատրաստվում իրենց հարաբերությունները մեկ այլ փուլ տեղափոխել և օրինականցնել, Մարիամը նկատեց՝ իրենց նպատակների, ծրագրերի մասին խոսել չի սիրում և ավելացրեց՝ իրենց հարաբերությունները բնականոն զարգանում են. «Մենք միշտ ենք ասել՝ մեր հարաբերություններն օրինական են ու ամեն վայրկյան, ամեն րոպե նրանք զարգանում են, առաջ են գնում»:

Միմյանց սեր խոստովանելու հարցում, Մարիամի խոսքով, բառերն ու գործողություններն իրար հերթ չեն տալիս: Դերասանուհին կարծում է, որ մեկ տարին և առհասարակ կյանքի ողջ ընթացքը բավարար չէ մարդուն լիարժեք ճանաչելու համար:

«Մարդուն ճանաչելու համար պետք չէ նրան լսել, հետևել ժեստերին, պետք չէ վախենալ, ընդամենը անկեղծ աչքեր ու վերջ: Լիարժեք երբեք էլ չենք ճանաչի, մարդ միշտ փոփոխվում է: Վեճերից էլ չենք խուսափում: Ամեն անգամ մի նոր բան, մի նոր բացահայտում լինում է»,-ասաց նա:

Դերասանուհին նշեց, որ սիրելիի հետ նաև մասնագիտական քննարկումներ են ունենում, միմյանց խորհուրդներ տալիս, ինչու ոչ՝ նաև քննադատում. «Երկուսս էլ շատ քննադատ են, բայց դա լավ է: Օգնում ենք իրար ու սովորում ընդունել քննադատությունը: Դա շատ լավ բնավորության գիծ է, երբ ընդունում ես առողջ քննադատությունը ու լրիվ նորմալ եմ նայում այդ ամենին՝ բաց աչքերով»:

Մարիամը հագեցած 2018-ից հետո մեծ սպասելիքներ ունի նաև գալիք տարվանից. «Այս տարվանից նոր և ուրիշ կյանք եմ ուզում Գոռի հետ միասին: Մենք անցյալ տարի շնորհավորեցինք միմյանց որպես մոտ ընկերներ, այս տարի նույնպես ընկերներ): Մեր մոտ շատ ուժեղ կապ կա,-ասաց Մարիամն ու ավելացրեց, քանի որ երկուսն էլ անակնկալներիի սիրահար են  միմյանց համար տոնական հետաքրքիր նվերներ կմատուցեն,- Ես շատ եմ սիրում անակնկալներ ու Գոռը միշտ առաջինն է այդ հարցում: Նա սիրում է անակնակլներ անել: Մենք երկուսս էլ անակնկալ ենք միմյանց համար»: