«Ուզում էի Սուրբ ծննդյան հրեշտակի կերպարում լինել». Ռիփփիի նոր ֆոտոշարքը

Ամանորը երգչուհի Ռիփփիի ամենասիրելի ու սպասված տոներից մեկն է: Երգչուհին նախատոնական շնչով նոր ֆոտոշարք է իրականացրել, որտեղ ներկայացել է Սուրբ ծննդյան հրեշտակի կերպարում: Ռիփփին Tert.am Life-ին է տրամադրել լուսանկարներն ու ամփոփել անցնող տարին:

Ֆոտոշարքի մտահաղցումն ու թեման Ռիփփին է մտածել և այն իրականացնելու համար հերթական անգամ համագործակցել է լուսանկարիչ Վահե Ստեփի հետ:

«Ուղղակի ուզում էի Սուրբ ծննդյան հրեշտակի կերպարում ներկայանալ: Նկարահանման ընթացքում նաև ակապելլա կատարեցի այս տոնին նվիրված իմ ամենասիրելի երգերից մեկը՝ Mariah Carey-ի հայտնի երգը։ Դա պլանավորված չէր, պարզապես ընթացքում անընդհատ երգում էինք և որոշեցինք վիդեո անել»,-ասաց նա:

Ռիփփին հաճախ է ներկայանում տարաբնույթ ֆոտոշարքերում: Երգչուհին նկատեց, որ սիրում է լուսանկարվել և դա կապեց նաև իր դերասանի մասնագիտության հետ: Համարձակ որակումն այս ֆոտոշարքին նա տեղին չի համարում:

«Ոչ մի համարձակ բան չկա, ուղղակի կերպար է, այդ համարձակ բառի իմաստը այդքան էլ չեմ հասկանում: Ես վաղուց չեմ նկատել, որ մեզ մոտ քննարկեն բաց լինելը կամ քննադատեն: Այս դեպքում լրիվ բեմական կերպար է՝ չափի մեջ»,- նշեց երգչուհին:

Ինչպես ֆոտոշարքում, այնպես էլ առօրյայում Ռիփփին արդեն զգում է նախատոնական շունչը, թեև մի քանի տարի է` Ամանորը դիմավորում է աշխատանքի մեջ: «Դա ինձ բացարձակ չի խանգարում զգալ տոնական շունչը: Ես ամբողջ ընթացքը վայելում եմ: Իմ աշխատանքը շատ եմ սիրում և ինձ չեմ էլ պատկերացնում մեկ այլ ոլորտում»,-ասաց նա:

Շատերի նման երգչուհին ևս սպասում է և հավատում Ամանորի հրաշքին. «Ես ամբողջ տարվա ընթացքում էլ անընդհատ հրաշքների եմ սպասում: Սիրում եմ անակնկալներ, այդ իմաստով բախստ բերել է, որ իմ կյանքում միշտ հաճելի անակնկալներ են լինում, շատ հաճելի նորություններ, այսինքն անընդհատ իմ կենցաղը դրանով լի է»:

Ռիփփին նշեց, որ 2018-ն իր համար հագեցած ու հաջողակ տարի է եղել և հույս հայտնեց, որ հաջողությունները կշարունակվեն նաև գալիք 2019-ում: «Կար մի շրջան, երբ ես պասիվ էի երգարվեստում: Պատճառներն այնքան շատ են և անձնական, որ չեմ կարծում թվարկելը ճիշտ կլինի: Չեմ ուզում առաջ ընկնել ու խոսել պլանների մասին, բայց երաժշտական ասպարեզի մեջ հիմա ավելի եմ ակտիվանալու, իսկ անձնական առումով ընդամենը կասեմ, որ ինձ մոտ ամեն բան շատ լավ է»,-եզրափակեց նա: 

Լուսանկարները՝ Վահե Ստեփի