Էմմա Սապունջյանը՝ նոր ֆոտոշարքի ու նախատոնական պատրաստության մասին

Դերասանուհի Էմմա Սապունջյանի մոտ տոնական տրամադրությունն ու եռուզեռն այս տարի ավելի վաղ է սկսվել: Դերասանուհին ասում է՝ վերջին անգամ ամանորին այսքան ակտիվ նախապատրաստվել է ավելի փոքր տարիքում: Էմման անհամբերությամբ սպասում է առաջին ձյանը, որ Ամանորի հեքիաթը լիարժեք դառնա, իսկ քանի դեռ շատ չի ցրտել, նոր ֆոտոշարք է իրականացրել:

Դերասանուհին Tert.am Life-ին է տրամադրել լուսանկարներն ու խոսել նախատոնական պատրաստության, ընթացիկ տարում իր ձեռքբերումների մասին:

Էմման նոր ֆոտոշարքն իրականցրել է Մոնումենտի տարածքում: Թե՛ վայրի ընտրությունը, թե՛ կերպարային լուծումները դերասանուհին է մտածել, իսկ իրականացնել օգնել է ընկերուհին, որն էլ ֆոտոշարքի լուսանկարիչն է: «Միշտ փորձում էինք միասին ֆոտոշարք անել, պարզապես երկուսիս զբաղվածությունն էլ դա թույլ չէր տալիս: Ի սկզբանե վառ գույներով ամառային ֆոտոշարք էինք մտածել, բայց քանի որ հետաձգվեց  որոշեցի այս եղանակին համահունչ լուսանկարներ ստանալ»,-ասաց նա:

Էմման նշեց, որ թեև վաղուց տոնական տրամադրության մեջ է, բայց միայն երկու օր առաջ է տոնածառն ու տունը զարդարել: Այդ գործում իրեն օգնում են նաև ընտանիքի մյուս անդամները, անգամ՝ շունիկը. «Նոր տարին երբևէ չեմ սիրել, երևի թե մինչև 16 տարեկանն եմ սպասել այս տոնին: Դրանից հետո առանձնապես չէի ուրախանում, անգամ սրտնեղում էի, որ ձյուն էր գալիս ու ավելորդ անհարմարություն պատճառում: Այս տարի ինքս էլ չգիտեմ, թե ինչով է պայմանավորված, բայց ինձ համար տարօրինակ կերպով սպասում եմ ամանորին ու ձյանը»:

Դերասանուհին ասաց, որ ընտանիքում սովորույթ ունեն ամանորին ընդառաջ միմյանց նվերներ անել: «Որպես կանոն ամանորի գիշերն ենք հանձնում նվերները, բայց մինչ այդ արդեն բացահայտում ենք՝ ինչ ենք նվիրելու միմյանց: Երբեք չի ստացվում անակնկալ անել»,-ասաց Էմման:

Ամանորն ինչպես ամեն տարի, այս տարի ևս դերասանուհին կդիմավորի տանը, ընտանեկան միջավայրում: Հայերիս հատուկ տնից տուն գնալու սովորությունն Էմման այդքան էլ չի սիրում, թեև մասամբ պահպանում է: Նա նշեց, որ Ամանորին հատուկ օր ունեն ընկերներով հավաքվելու և միմյանց հյուր գնալու համար:

Տոնական սեղանի պատրաստությանը դերասանուհին առանձնապես չի մասնակցում, համտեսելու հարցում է ակտիվ: «Միշտ շատ քիչ է եղել այս օրերին իմ մասնակցությունը խոհանոցում: Կարծում եմ՝ այս տարի էլ չի լինի, որովհետև մայրիկս ու տատիկս են զբաղվում այդ գործով ու երբ նույնիսկ ուզում եմ գնալ խոհանոց, իրենց օգնել, ասում են՝ դու գնա, մի խանգարի :)»:

Ամփոփելով տարին՝ դերասանուհին նկատեց, այն աշխատանքային առումով ակտիվ էր, իսկ անձնական կյանքում փոփոխություն չի եղել: «Փառք Աստծո, կորուստներ չեմ ունեցել, այլ եղել են միայն ձեռքբերումներ: Դրանք աշխատանքի հետ կապված էին: Այս տարի նկարահանվեցի երկու սերիալում՝ «Թունավոր սերը», որտեղ գլխավոր հերոսուհուն էի մարմնավորում և «Էլենի օրագիրը», որտեղ շարունակում եմ նկարահանվել: Ես այդ թիմին ուշ միացա, բայց շատ հեշտ ադապտացվեցի միջավայրին ու դերասաններին: Առաջին իսկ օրվանից ինձ այնքան ջերմ ընդունեցին, որ ինձ մոտ տպավորություն էր, թե բոլորին վաղուց ճանաչում եմ, չնայած գրեթե ոչ մեկին չէի ճանաչում»,-ասաց Էմման:

Նա նկատեց, որ նոր կերպարն իր հետ որևէ ընդհանրություն չունի և հենց դրանով էլ հետաքրքիր է. «Կերպարս ամեն ինչ անում է, որ իր սիրած տղային հետ բերի, բայց ես իրականում  այդպիսի բան երբեք չեմ անի: Եթե տղայից անտարբերություն զգամ, երբեք ջանքեր չեմ գործադրի, որ նա ինձ ուշադրություն դարձնի»,-եզրափակեց նա:

Լուսանկարները՝ Գայանե Չոբանյանի