«Առաջին անգամ եմ սիրային տեսարան խաղում». Սոֆի Դևոյանը` նոր կերպարի և ուսումն արտերկրում շարունակելու մտադրության մասին

Սոֆի Դևոյան կրտսերը ներկայանում է ռեժիսոր, պրոդյուսեր Ելենա Արշակյանի նոր հեռուստասերիալում, որտեղ մարմնավորում է գլխավոր կերպարներից մեկը։ «Մոր խստումը» խորագրով հեռուստասերիալում Սոֆին ներկայանում է հեռուստատեսային որոշակի դադարից հետո։ Նոր աշխատանքի առաջին մանրամասները Սոֆին վստահել է Tert.am Life–ին, ինչպես նաև պատմել արտերկրում սովորելու մտադրության մասին։

«Երկար էի սպասում նոր նախագծում նկարահանվելուն, պարզապես զբաղվածությունս մեծ էր։ Շատ ուրախ եմ, որ ներկայանում եմ այս նախագծում։ Երբ իմացա, որ կրկին Ելենա Արշակյանի հետ եմ աշխատելու, ուրախությունս կրկնապատվեց»,– ասաց Սոֆին, որը տարիներ առաջ դերասանական առաջին քայլերն արել է ռեժիսորի «Որբերը» հեռուստասերիալում։

Այս անգամ 17-ամյա Սոֆին մարմնավորում է իրեն հասակակից մի աղջկա, որին բնավորությամբ էլ իրեն մոտ է համարում, ինչը հեշտացնում է աշխատանքը։ «Կերպարս ինձ շատ մոտ է։ Շատ համառ, ուժեղ, իր ասածին տեր կանգնող աղջիկ է։ Շատ է սիրում ընտանիքի անդամներին` քրոջը, եղբորը, պապիկին»,– ասաց պատանի դերասանուհին։

Նկարահանման հրապարակում Սոֆիի խաղընկերներից շատերը նոր են իր համար, սակայն նա նշում է, որ հասցրել են ընկերանալ և հասկանալ իրար աշխատանքում։ «Աշխատանքը խաղընկերներիս հետ շատ հեշտ է։ Մեր շփումը հեշտ ստացվեց, կարողանում ենք արագ հասկանալ իրար։ Ինչ վերաբերում է արդեն մեծ համբավ ունեցող դերասաններին` ամեն պահ իրենցից սովորելու հնարավորություն ունենք, որը փորձում ենք օգտագործել` ավելի պրոֆեսիոնալ ներկայանալու համար»,– ընդգծեց նա։

Հեռուստանովելում Սոֆին սիրային գիծ ունի երիտասարդ դերասան Աշոտ Կարապետյանի հետ։ Նա նշեց, որ առաջին անգամ է մարմնավորվելու սիրահարված աղջկա։ «Մինչև այս սիրային ոչ մի տեսարանում չեմ խաղացել։ Այստեղ էլ սիրային բաց տեսարաններ չկան, պարզապես առաջին անգամ եմ խաղում նման իրավիճակ։ Այսպիսի տեսարաններում շատ բան կախված է խաղընկերոջիցդ։ Մեզ մոտ հեշտ է ստացվում համագործակցելը։ Կարծում եմ` հանդիսատեսի համար կդառնանք սիրելի զույգ։  Չբացելով փակագծերը, ուզում եմ նշել, որ կլինեն նաև այլ դերասաններ, որոնք կհայտնվեն իմ կողքին»,– ասա Սոֆին։

Հեռուստադիտողն այս զույգին հաճախ մոտոցիկլետով տեսնելու հնարավորություն կունենա։ Այս փաստը ոգևորիչ է եղել Սոֆիի համար։ «Երբ իմացա, որ կերպարիս ընկերը մոտոցիկլետով է, շատ ոգևորվեցի։ Նկարահանման ժամանակ վարում ենք։ Կարծում եմ` ես էլ վարելու տեսարան կունենամ։ Չեմ վախենում մոտոցիկլետից, միշտ նստել եմ, ինքս էլ կարողանում եմ վարել։ Շատ եմ սիրում, պարզապես հայրիկս թույլ չի  տալիս վարել։ Կարծում եմ` մոտակա տարիների ընթացքում կունենամ իմ մոտոցիկլետը։ Այստեղ խոսում է համառությունս»,– ժպիտով ասաց նա։

Սոֆին այս տարի ավարտում է դպրոցը։ Նա վերջնականապես կողմնորոշվել է, թե որ ուղղությամբ է շարունակելու ուսումը։ Որոշել է պարուհու մասնագիտական կրթություն ստանալ, սակայն արտերկրում. «Իմ գրաֆիկը միշտ խիտ է ու հասցնելու խնդիր ունեմ։ Այս տարի պատրաստվում եմ ընդունելությանը։ Մի քիչ բարդ է, բայց հուսով եմ ամեն ինչ պատվով կանենք»։

Դիտարկմանը, որ հեռուստասերիալը երկարատև նախագիծ է և առնվազն 1 տարի է տևում, իր կերպարն առանցքային է, իսկ ընդունվելու դեպքում սեպտեմբերին արտերկիր մեկնելու խնդիր կունենա, Սոֆին արձագանքեց, որ այդ ամենը հաշվի են առել. «Փորձելու ենք համատեղել։ Կարծում եմ` կստացվի»։

Ամփոփելով 2018–ը` Սոֆին նկատեց, որ շատ բուռն, աշխատանքային տարի է ունեցել։ «Իմ տարիները երբեք հանգիստ չեն անցնում։ Այս տարի էլ շատ համերգներ ու նկարահանումներ ենք ունեցել։ Պարապմունքներս են ավելացել։ Փորձում եմ ամեն ինչ հասցնել։ Ուզում եմ հաջորդ տարին ավելի բուռն ու նպատակային լինի»,– եզրափակեց երիտասարդ դերասանուհին։