«Առաջին անգամ եմ այսպես դիմավորում Ամանորը». Ժաննա Բուտուլյանի նոր ֆոտոշարքը, 2018-–ի փոփոխությունն ու տարբերվող Ամանորը

Դերասանուհի Ժաննա Բուտուլյանի համար 2018–ը կյանքի լավագույն տարիներից մեկն էր, որը ճանապարհում է բարձր տրամադրությամբ և ոգևորությամբ սկսում 2019–ը։ Դերասանուհին Tert.am Life–ին է տրամադրել իր տոնական ֆոտոշարքն ու ամփոփել 2018–ը։

«Ինձ համար շատ խառը տարի էր՝ լի գլոբալ փոփոխություններով։ Ասում են` տարին ինչպես սկսես, այնպես էլ կավարտվի, սակայն ինձ մոտ այս անգամ հակառակը եղավ։ Տարեսկիզբը մի փոքր նեգատիվ էր, նույնիսկ առողջական  խնդիրներ ունեցա, սակայն 2018–ը շարունակվեց շատ պոզիտիվ ու հետաքրքիր, ավարտվում է առավել լավ։ Ինձ մնում է միայն շնորհակալ լինել Աստծուն այս տարվա համար»,– ասաց Ժաննան։

Նա նկատեց, որ անցնող տարին իր համար անավարտ շատ գործեր ավարտին հասցնելու և կյանքի նոր էջ սկսելու շրջան էր։ «Կյանքը նոր էջից սկսելն Աստծո թելադրանքով է լինում։ Որքան էլ փորձես նոր բան սկսել, եթե քո մեջ կան անպատասխան հարցեր, անկատար պահեր, նոր էջը երբեք չի բացվում։ Միշտ վերադառնում ես նախորդին, որպեսզի ավարտին հասցնես։ Այս տարի իմ կյանքում գեղեցիկ ձևով հասունացավ պահը, որպեսզի ես ամեն ինչ հանգուցալուծեմ»,– ընդգծեց նա։

Դերասանուհուց հետաքրքրվեցինք` 2018–ին կյանքի նոր էջ բացելը ենթադրո՞ւմ է, որ գտել է իր երկրորդ կեսին և 2019–ին գուցե կարգավիճակի փոփոխություն ունենա։ «Չգիտեմ,–  ծիծաղելով ասաց նա, ապա հավելեց,– 2019–ին կերևա` արդյոք 2018–ին եմ հանդիպել այդ մարդուն։ Չեմ կարող ինչ–որ մեկին համարել իմ երկրորդ կես, բայց չեմ էլ կարող ասել, որ չեմ ճանաչում այն մարդուն, որը, գուցե, իմ երկրորդ կեսը դառնա։ Կարգավիճակի փոփոխության մասին խոսելը բարդ  հարց է, որովհետև ինքս տատանվում եմ։ Երբեմն, լինում է իմ ընտանիքն ու ունենալու ցանկություն, սակայն առաջ են գալիս նոր փուլ չանցնելու վախերս։ Երբ շատ ես սիրում քո առօրյան, կապված ես լինում աշխատանքիդ, ազատությանդ, դա կորցնելու վախն ուղեկցում է քեզ։ Բայց ամեն բան Աստծո կամքն է։ Որպես ճշմարիտ հավատացյալ` կարծում եմ այդ պահը նույնպես պետք  է հասունանա իր բնականոն և տրամաբանական ձևով»։

Դերասանուհու խոսքով` 2019–ից հատուկ ակնկալիքներ չունի։ Այդպես ապրելն ավելի հեշտ է. «Առհասարակ չեմ սիրում սպասելիքներ ունենալ, որովհետև երբ ինչ–որ բան քո ակնկալածով չի լինում, հիասթափվում ես։ Ես, իհարկե, ունեմ ծրագրեր, բայց սպասելիքներս միայն ինքս ինձնից, իմ վարքից են»։

Ժաննան հավատում է կախարդական գիշերվա երազանքի ուժին ու, անպայման, մտապահում է բաղձալի ցանկություն։ «Դա շատ գեղեցիկ պահ է ինձ համար։ Միշտ մտապահում եմ երազանքներ` աստղերին նայելիս, մոմեր փչելիս, տոներին։ Ես հավատում եմ, որ Ամանորի գիշերը մտապահած երազանքն, անպայման, իրականանում է ու առիթը բաց չեմ թողնում,– ասաց նա, սակայն չմտաբերեց, թե 2018–ին ինչ երազանք էր մտապահել,– Վերջերս ինչ–որ հաղորդման ժամանակ լսեցի, որ շատ լավ է, երբ չես հիշում, թե նախորդ տարի ինչ երազանք էիր մտապահել։ Ասում են` մարդը հիշում է այն, ինչը չի իրագործվել։ Փաստորեն, ինչ մտապահել եմ, կատարվել է և որևէ բան  կիսատ չի մնացել»։

Ժաննան սիրում է Նոր տարին, սակայն Ամանորի նախապատրաստական օրերը շատ ավելի հաճելի է համարում։ «Շատ եմ սիրում տոնածառ զարդարել, գնումներ անել։ Մասնակցում եմ նաև տնային գործերին։ Սովորաբար, Ամանորը  դիմավորում եմ տանը, սակայն այս տարի այն ինձ համար աշխատանքային է։ Առաջին անգամ եմ տոնը դիմավորելու աշխատանքային միջավայրում, այդ իսկ պատճառով հետաքրքիր է։ Ուրախ եմ, որ այդպես է լինելու»,– ասաց նա ու հավելեց, որ հաջորդող օրերը կանցկացնի ամենամտերիմ մարդկանց հետ։

7 օր 7 գիշեր ձգվող Ամանոր Ժաննան չի սիրում։ Ասում է` հունվարի 3–ից ուզում է անցնել աշխատանքային ու սովորական առօրյային, թեև չի ստացվում։

Լուսանկարները` Շուշ Անտոնյանի