Լուիզա Մելքոնյանի պատրաստած անակնկալն իր հյուրերին` Ամանորի առթիվ

Ամանորը դերասանուհի Լուիզա Մելքոնյանի ամենասիրելի տոներից է, թեև հատուկ պատրաստվելու սովորություն չունի: Դերասանուհին այս տարի էլ տոնական զգեստի կամ դիմահարդարման մասին չի մտածել, փոխարենը ակտիվ մասնակցել է տոնական սեղանի պատրաստամանն ու ձևավորմանը:

Tert.am Life-ը Լուիզայի հետ տոնական զրույց է ունեցել։ Նա նշեց, որ ի տարբերություն նախորդ տարվա, այս տարի Նոր տարին դիմավորել է տանը, ընտանիքի հետ, ավելի ուշ՝ ընկերներով հավաքվել են:

Դերասանուհին պատմեց, որ նախորդ տարի Ամանորը դիմավորել է աշխատավայրում, թեև դա չի խանգարել զգալ տոնական շունչը: Ի դեպ, Լուիզան այն համարում է իր ամենատպավորիչ Նոր տարին: «Անցյալ տարի ես աշխատում էի որպես Սառցե թագուհի և մինչև լուսադեմ` ժամը 5-ը, աշխատավայրում էի, քանի որ մարդկանց հոսքը շատ մեծ էր: Հետաքրքիր ու տպավորիչ Ամանոր ունեցա: Առավոտյան ժամը 7-ին վերադարձա տուն ու ընտանիքիս հետ շարունակեցի նշել տոնը»,-պատմեց Լուիզան:

Նա նշեց, որ տոնական սեղանի բոլոր ուտեստներն էլ սիրում է և համտեսում, քանի որ ավելորդ կիլոգրամներ հավաքելու խնդիր չունի. «Աղցանները պարտադիր ես եմ պատրաստում: Այս տարին էլ բացառություն չեղավ: Բացի ավանդական ու հայտնի աղցանները, նաև իմպրովիզ եմ անում: Ինձ է վերապահված նաև տոնական սեղանի ձևավորումը՝ սկսած անձեռոցիկների ընտրությունից մինչև այլ դետալներ»:

Ամանորին Լուիզայի ամենասիրելի պահը կեսգիերի զանգերն ու բաժակները բարձրացնելն է, երբ բոլորը  միմյանց ջերմ մաղթանքներ են հղում: Դերասանուհին ասաց, որ իր հերթին հետաքրքիր ամանորյա ավանդույթ է հնարել, որն այս տարի նույնպես կիրառել է:

«Ամանորի գիշերն ինքս միշտ երազանք եմ մտապահում թե՛ գործնական, թե՛ անձնական հաջողության համար, բացի այդ, տարբեր մաղթանքներ եմ գրում թղթերի վրա ու լցնում գեղեցիկ տոպրակի մեջ: Մեզ հյուրընկալվող բոլոր մարդկանց առաջարկում եմ որևէ մեկը վերցնել ու պահել իրենց մոտ: Եղել է նաև, որ գրածս կատարվել է: Օրինակ` մեկին բաժին էր հասել մաղթանք, որ տվյալ տարին հաջողակ լինի ու նոր աշխատանք գտնի, հետո ինձ զանգեց ասաց՝ Լուիզ, ասածդ եղել է»,- ասաց նա ու հավելեց, որ այս տարի էլ իրենց հյուրերին ուրախացրել է իր մաղթանքներով։

Լուիզան նկատեց, որ Ամանորն իսկապես հրաշքներին հավատալու տոն է: Դերասանուհին համոզված է՝ սրտանց ցանկանալու դեպքում դրանք նույնիսկ կատարվում են: Լուիզան մինչ օրս հավատում է նաև Ամանորի հեքիաթը լիարեժք դարձնող Ձմեռ պապի գոյությանը:

«Ես չեմ դադարել հավատալ: Ինձ թվում է, եթե մի բանի մասին խոսակցություններ կան, ուրեմն այդտեղ կա նաև ճշմարտության հատիկ: Հիշում եմ, թե ինչպես ինքս բացահայտեցի Ձմեռ պապիկին, բայց դա նույնիսկ չխանգարեց, որ շարունակեմ հավատալ: Մի անգամ Ձմեռ պապիկի շորեր հագած եղբայրս եկավ մեր տուն: Նրա մորուքը մի քիչ ներքև էր ու ես գլխի ընկա, որ եղբայրս է: 12 տարեկանում էլ նամակ էի գրել ու սինթեզատոր էի ուզել Ձմեռ պապիկից, հանկարծ զանգ եկավ տուն, զանգողը ներկայացավ իբրև Ձմեռ պապ և ճշտեց իմ ցանկությունը։) Նորից հորաքրոջս տղան էր»,- հիշեց դերասանուհին:

Լուիզան ուշադրություն չի դարձնում, թե որն է տարվա խորհրդանիշն ու ինչ ցուցումներ է տալիս, առաջնորդվում է բացառապես ներքին տրամադրվածությամբ ու իր պատկերացումներով: «Իրականում ամեն բան մեզնից է կախված: Չպետք է մտածենք` խոզի կամ այլ կենդանու տարի է, ուրեմն հաջողակ կամ անհաջող է լինելու, պետք է դրական տրամադրվենք ու մեր լավ մտքերն ուղարկենք տիեզերք: Ես միշտ փորձում եմ ավելի դրական ու ջերմ լիցքերով դիմավորել տարին, բնավորությանս համաձայն հակառակը չի էլ եղել»,-եզրափակեց նա: