«Սուրբ Ծննդյան խորհուրդը շատ կարևոր է». Իննա Խոջամիրյան

Այսօր` հունվարի 6–ին, Հայ-առաքելական եկեղեցին տոնում է Սուրբ Ծնունդը։  Tert.am Life-ը թեմատիկ զրույց է ունեցել դերասանուհի Իննա Խոջամիրյանի և պարզել, թե նա ինչպես է նշում այս տոնը։ Իննան կարևորում է Սուրբ Ծննդյան խորհուրդն ու սրտնեղում, որ, երբեմն, այն չի նշվում իր համապատասխան ծիսակարգով։

Թեև հայ ընտրանքներից շատերն առավել մեծ նշանակություն են տալիս Ամանորը նշելուն` Իննան նկատեց, որ Սուրբ Ծննդյան խորհուրդը շատ մեծ է քրիստոնյանների համար, այն ևս պետք է նշել որպես մեծ տոն։

«Սուրբ ծնունդը Հայ-առաքելական եկեղեցու տոներից իմ ամենասիրելիների առաջնացուցակում է։ Եթե նույնիսկ այն նշվում է Ամանորին կից և, կարելի է ասել, երբեմն հատուկ ծիսակարգ չի իրականացնում, միևնույն է տոնն ինձ համար բարձրագույն հոգևոր արժեք ունի»,– ասաց Իննան ու հավելեց, որ իր կարծիքով պետականացված, եկեղեցական ցանկացած տոն պիտի նշվի հավուր պատշաճի։

«Երբեմն, չիմանալով Սուրբ Ծննդյան արարողակարգն ու օրենքները, օրն անց ենք կացնում ու համարում, թե նշեցինք, Սուրբ Սարգսին միայն աղի բլիթ ենք ուտում` բաց թողնելով նախորդող տասնյակ ծեսերը, որոնք պարտադիր են, ու համարում ենք, որ տոնը հաջող անցկացրինք ու այդպես շարունակ։ Հասարակ մի փաստ՝ քանի՞սը գիտեն, որ Սուրբ Ծննդյանը նախորդող մի շաբաթը պահքի շաբաթ է, երբ անհրաժեշտ է միայն բուսական ծագման սնունդ օգտագործել։)»,– ժպիտով ասաց նա` մատնանշելով Ամանորի առատ սեղանները։

Սուրբ Ծննդյան օրը Իննան, անպայման, մասնակցում է ճրագալույցի պատարագին, որն իմ ամենասիրելի ծիսակատարությունն է. «Վերջին ժամանակներում, ինչքան էլ տհաճ հնչի, մարդիկ կան միայն այդ օրն են կարծես եկեղեցի գալիս, ամեն բան շիլաշփոթի ու հրմշտոցի է վերածվում։ Մտածում ես` ինչո՞ւ օրինակ այդ հոծ բազմության գոնե 1%-ը հաջորդ առավոտ մատուցվող նույնչափ կարևոր պատարագին չի գալիս»։

Իննան կարևորում է, որ Սուրբ Ծննդյան սեղանը պատրաստ լինի հունվարի 5-ի երեկոյան՝ պատարագից հետո. «Իմ ընտանիքում այդպես է, ուզում եմ իմ ապագա ընտանիքում էլ նույնը լինի։) Ձուկը, գինին, չամիչով փլավն ու գաթան սեղանին պարտադիր են,– ասաց նա ու հավելեց, որ, երբեմն, ինքն էլ է մասնակցում նախապատրաստական փուլին,– Եթե խոհանոցն ինձ վստահեն, տակից պատվով դուրս կգամ անկասկած։)»։