Աղաս Մանուկյանը՝ Գոռ Հակոբյանի հետ համագործակցության, նոր տեսահոլովակի և արձագանքների մասին

Դերասան Աղաս Մանուկյանն օրերս ներկայացրեց տեսահոլովակ՝ հայտնի հայկական երգերի mashup տարբերակով: Նրա խոսքով` նոր աշխատանքը հումորային շեշտադրում ունի և լինելու է շարունակական:

Tert.am Life-ի հետ զրույցում Աղասն ասաց, որ գաղափարն իրականացրել է գործընկերոջ՝ դերասան, երգիչ Գոռ Հակոբյանի հետ:

Աղասը նկատեց, որ վաղուց էր ցանկանում սիրողական տարբերակով ներկայացնել հայտնի երգերի համադրությունը, սակայն Գոռի հետ գաղափարը քննարկելուց հետո որոշել են պրոֆեսիոնալ մոտեցմամբ աշխատանք անել. «Երգերի ընտրությունը, հերթականությունը միասին ենք որոշել, երաժշտական ձևավորումն ու տեսահոլովակի նկարահանման և մոնտաժային աշխատանքները Գոռն է արել: Masհup-ն անվանել ենք «Չէգերափ», որը հայտնի Check it up արտահայտության հայերեն արտասանությունն է»:

Mashup-ում ընդգրկված է 10 երգ, որոնց մի մասը հայկական ժողովրդական են, կան նաև կատարումներ Տիգրան Ժամկոչյանի և Հրագի երգացանկից: Աղասի փոխանցմամբ` հաջորդ աշխատանքը նույնպես բաղկացած է լինելու բացառապես հայկական երգերից։ Արտասահմանյան հայտնի հիթերին անդրադառնալու մասին դեռ չեն մտածել: Նա նկատեց, որ լսարանի պահանջարկն ունենալու դեպքում, գուցե, դա էլ ներառեն ծրագրում:

Դերասանը նշեց, որ դրական արձագանքներ են ստացել նոր աշխատանքի վերաբերյալ, միաժամանակ նկատեց, որ քննադատությունից չի խուսափում: Կանխելով դրանցից մեկը՝ Աղասն ընդգծեց, ունի վոկալային որոշակի տվյալներ և երգել է դեռ КВН–ում խաղալու տարիներին:

«Մեր թիմային ելույթների ժամանակ նաև երգով էինք հանդես գալիս, բայց այնպես չէ, որ կարող եմ ասել փայլուն երգում եմ: Հիմա ձայնագրության ընթացքում էլ կարող են միջամտել, ավելի որակյալ ձայն ստանալ, բայց իմ դեպքում շատ քիչ աշխատանք է արվել: Ձայնագրելիս Գոռն ասաց, որ ավելի վատ էր պատկերացնում:) Ի զարմանս մեզ, լավ ստացվեց: Իհարկե, կան մարդիկ, որոնք գրում են` Աղասն էլ երգիչ դառավ, բայց դա նորմալ և սպասելի արձագանք էր: Սա իր ձևաչափով հումորային աշխատանք է, մյուսն ավելի հումորային ենք անելու թե՛ տեսահոլովակի, թե՛ երգերի մատուցման առումով»,-ասաց նա:

Աղասը ստեղծագործական գաղտնիք բացեց և նշեց, որ երկրորդ mashup-ի տեսահոլովակը նկարահանելու են Լոս Անջելեսում, ուր մեկնելու է «Ֆուլ հաուսի» ստեղծագործական կազմի հետ։ Փետրվարի 6–ին նրանք ամերիկաբնակ հանդիսատեսին կներկայանան նոր շոու–ներկայացմամբ: