«Սկզբում կաշկանդվում էի, քանի որ խաղընկերներս ունեն կրթություն կամ նկարահանման փորձ». Անելյա Գուբրյանը՝ կյանքի նոր փուլի և «Էլենի օրագրի» մասին

Երիտասարդ դերասանուհի, մոդել Անելյա Գուբրյանը, որը հեռուստադիտողին ներկայանում է «Էլենի օրագիրը» հեռուստասերիալում, ամիսներ առաջ թևակոխեց կյանքի նոր` ուսանողական փուլ: ԵՊՀ Ժուռնալիստիկայի ֆակուլտետի ուսանողուհին անկեղծանում է՝ դասերից հաճախ է բացակայում, բայց ամեն ինչ անում է քննությունները լավ հանձնելու համար:

Tert.am Life-ի հետ զրույցում նա խոսել է քննաշրջանը հաղթահարելու, դասերն ու նկարահանումները համատեղելու և ընտրած մասնագիտությամբ` որպես լրագրող գործունեություն սկսելու հեռանկարի մասին:

Անելյան նկատեց, որ ուսանողական կյանքին հեշտ է հարմարվել: Կեսկատակ ասաց, որ համալսարանում իր ամենասիրելի վայրը բուֆետն է. «Մի փոքր տարօրինակ բան է, բայց ես սիրում եմ հետևել մարդկանց, օրինակ, ինչպես են իրենց դրսևորում առանձին կամ ընկերների շրջապատում, դա լավագույնս երևում է համալսարանի բուֆետում:) Ճիշտ էին ասում, որ ուսանողական կյանքը հետաքրքիր է: Մտնում ես նոր շրջապատ, ծանոթություններ հաստատում, նոր գիտելիքներ ստանում»:

Անելյայի խոսքով, ի տարբերություն շատ ուսանողների, իր համար քննաշրջանը կրկնակի բարդ է անցնում, քանի որ ընթացիկ բացակայությունները խանգարում են լիարժեք պատրաստվել։

«Նկարահանումների գրաֆիկով պայմանավորված ոչ միշտ եմ կարողանում հաճախել դասերին, դա փոքր-ինչ խանգարում է, որ կարողանամ պատշաճ պատրաստվել քննություններին: Սակայն այդ հարցում ինձ շատ են օգնում համակուրսեցիներս, անհրաժեշտ բոլոր նյութերը տրամադրում են, որ պարապեմ: Բոլոր միջանկյալ քննությունները հանձնում եմ ու բավականին բարձր բալեր եմ ստանում, ինչից նույնիսկ ես եմ զարմանում, որովհետև կան մարդիկ, որ բոլոր դասերին ներկա են եղել, բայց ավելի քիչ միավորներ են ստանում»,-ասաց նա:

Դերասանուհին նկատեց, որ դասախոսները զիջումների հարցում շռայլ չեն, անկախ զբաղվածությունից, փորձում է նրանց պահանջները կատարել. «Դպրոցի ներողամտությունը համալսարանում չկա: Դասախոսներս, գուցե, ինձ մի բան էլ ավելին են հարցնում, քան մյուսներին: Ամեն դեպքում, իրենք հասկանում են, որ եթե բացակայում ես, ուրեմն կարևոր պատճառ կա, ծնողին զանգել կանչելու կարիք չկա: Եղել են դեպքեր, որ ջերմություն եմ ունեցել, բայց գնացել եմ դասի, որպեսզի դրա պատճառով ավելորդ բացակայություն չունենամ»: 

Անելյան նշեց, որ դասախոսներից շատերն տեղյակ են իր դերասանական գործունեության մասին, ոմանք էլ հետևում են իր խաղին և շտապում կարծիքներ հայտնել։ «Կուրսղեկս մի անգամ ասաց՝ Անելյա, հերիք է նվնվաս կադրում, տոնայնությունդ փոխվում է, դու կյանքում էլ ես նվնվան, բայց կադրում դա այլ կերպ է ընկալվում։ Ես դա հաշվի առա ու ինչ-որ չափով շտկեցի:),-ասաց նա և ավելացրեց, որ հաճախ ինքն էլ է կարծիք հարցնում, հատկապես, այն դասախոսներից, որոնք ինչ-որ կերպ առնչվել են սերիալային ոլորտին,- Ես խնդրել եմ, որ թերություն նկատելու դեպքում ասեն ինձ, քանի որ ես չունեմ դերասանական կրթություն, խաղս հաճախ կառուցում եմ տարբեր կարծիքներ լսելով»:

Երիտասարդ դերասանուհին կարծում է, որ հիմա նկարահանման հրապարակում առավել ինքնավստահ է դարձել, իր մարմնավորած կերպարին՝ Անիին էլ ավելի ճիշտ է կարողանում ներկայացնել: «Սկզբում կաշկանդվում էի, քանի որ գրեթե բոլոր խաղընկերներս ունեն դերասանի մասնագիտություն կամ նկարահանման մեծ փորձ, բայց հիմա, երբ համեմատում եմ, բավականին մեծ առաջընթաց եմ զգում իմ խաղի մեջ: Նույնիսկ ռեժիսորը, երբեմն, ասում է ուզում էի քեզ ուղղորդել, բայց դու արեցիր այն, ինչ պետք էր: Սկզբում մտածում էի` դե իմ կերպարը խելոք աղջիկ է, հեշտ կլինի խաղալ, բայց հասկացա, որ նա չկրկնվող տեսակ է և պետք է այնպես խաղամ, որ իրեն ճիշտ ընկալեն»,-ասաց Անելյան:

Նա նշեց, որ թե՛ դերասանական, թե՛ մոդելային գործունեությանը զուգահեռ նպատակներ ունի կայանալ նաև իր ընտրած նեղ մասնագիտության՝ լրագրության ոլորտում: Անելյայի կարծիքով, պրակտիկայի փուլում հստակ կհասկանա հաղորդավարակա՞ն, թե՞ հենց լրագրողական դաշտում է ցանկանում աշխատել:

«Ես սիրում եմ միաժամանակ մի քանի բան անել: Եթե ինձ մոտ ստացվի, կլինեմ լավ լրագրող կամ գուցե լրատվական մեկնաբան, հաղորդավար: Ամեն դեպքում կանեմ այն, ինչն ինձ մոտ ավելի լավ կստացվի: Դեռ մի քանի ամիս է, ինչ սովորում եմ, փորձարկումներից հետո միայն կհասկանամ՝ որն է ինձ առավել հոգեհարազատ»,- եզրափակեց նա: