«Վաչեից նոր առաջարկ եմ ստացել». Իլոնա Նուրբեկյանը՝ «Ոսկե դպրոցից» հետո իր անելիքների և ձմեռային հանգստի մասին

Դերասանուհի Իլոնա Նուրբեկյանը տևական ժամանակ է` վայելում է ձմեռային հանգիստն ու օգտվում տարվա իր ամենասիրելի եղանակի հանգստի ձևերից: Դերասանուհին շուտով պասիվ հանգիստը կփոխարինի ակտիվ աշխատանքային առօրյայով:

Tert.am Life-ի հետ զրույցում նա պատմել է ձմեռային հանգստի նախընտրելի տարբերակի, «Ոսկե դպրոց» սիթքոմի ավարտից հետո իր անելիքների և մոդելային ասպարեզում հետագա քայլերի մասին:

Իլոնան նշեց, որ ակտիվ աշխատանքային տարվանից հետո ընթացիկ հանգիստն իր համար սպասված էր: Դերասանուհին համատեղում է հանգստի՝ակտիվ ու պասիվ տարբերակները:

«Ձմեռն իմ ամենասիրելի եղանակն է: Հանգստիս հիմնական մասն անցկացրել եմ Ծաղկաձորում, հնարավորինս փորձել եմ օգտվել ձմռանը հատուկ զբաղմունքներից՝ դահուկներով սահք,  «սնոուբորդ»: Հիմա ավելի պասիվ հանգստի մեջ եմ: Շատ հագեցած օրերից հետո անսովոր է այս վիճակը։ Կարծում եմ՝ ժամանակն է վերադառնալ ակտիվությանը: Համարում եմ, որ լրիվ հանգստացել եմ և ուժերս վերականգնել»,-ասաց նա:

Դերասանուհին այս փուլում ուզում է ճամփորդել և բացահայտել տարբեր երկրներ։ Ասում է` ծրագրել է ամառը նվիրել եվրոպական շրջագայությանը. «Եթե գործը չխանգարի, այս ամռանը հնարավորինս քիչ կլինեմ Հայաստանում: Սկսելու եմ փոքրիկ շրջագայություն դեպի եվրոպական տարբեր երկրներ: Կսկսեմ, երևի թե, Ֆրանսիայից: Ճիշտն ասած, չեմ սիրում մի երկրում երկու անգամ լինել, քանի որ կարծում եմ՝ պետք է անընդհատ նոր երկրներ բացահայտել, բայց Իսպանիան ինձ շատ է տպավորել և երկրորդ անգամ կմենեմ այնտեղ»:

Իլոնան նշեց, որ «Ոսկե դպրոց» սիթքոմի ավարտից հետո չի հասցրել կարոտել ստեղծագործական կազմին ու գործընկերներին, քանի որ իրենց առջևում նոր համագործակցությունն է արդեն գեղարվեստական ֆիլմի շրջանակում: Բացի այդ, Վաչե Թովմասյանից հեռուստատեսային նոր նախագծում նկարահանվելու ևս մեկ առաջարկ է ստացել, սակայն մանրամասներ հաղորդել առայժմ չի կարող:

««Ոսկե դպրոցի» թիմի հետ հասցրել ենք ընկերանալ և անկախ նկարահանումներ ունենալուց կապը միշտ պահում ենք: Այս ընթացքում այնքան էինք հասցրել «կշտանալ» մեկս մյուսից, որ կարոտով հրաժեշտ չենք տվել միմյանց:) Բացի այդ գիտեինք, որ մեր համագործակցությունը շարունակվելու է»:

Անդրադառնալով մոդելային ասպարեզում գործունեություն ծավալելու հեռանկարին՝ Իլոնան նկատեց, որ դեռ հստակ չի որոշել «Կոստա Բլանկա միջազգային նորաձևության դիզայներական շաբաթ» մրցույթից հետո ստացած գործնական առաջարկի հետքերով կգնա՞, թե՞ ոչ:

«Շրի Լանկայից եմ առաջարկ ստացել, որպեսզի տեղի դիզայներներից մեկի նոր հավաքածուի ցուցադրությանը մասնակցեմ որպես մոդել: Նա այժմ աշխատում է հավաքածուի պատրաստման ուղղությամբ: Ցուցադրությունը նախանշված է ամռանը, բայց դեռ հայտնի չէ, թե որ երկրում է անցկացվելու: Դեռ մտածում եմ` մասնակցե՞լ, թե՞ ոչ»,-ասաց նա:

Իլոնայի խոսքով` իրեն առավել հոգեհարազատ ու հետաքրքիր է ֆոտոմոդելինգը, ինչից էլ սկսել է քայլերն այս ասպարեզում: «Դա ինձ միշտ կհետաքրքրի և կզբաղվեմ այդ աշխատանքով,- ասաց նա և ավելացրեց, որ ֆոտոմոդելինգի դեպքում ի տարբերություն պոդիումային մոդելինգի, հստակ չափորոշիչներ չկան,- Կարևորը ֆոտոգենիկ լինելն է, այսինքն՝ պարտադիր չէ, որ դու հստակ պարամետրերով գեղեցիկ համարվես, կարող ես ունենալ ալտերնատիվ արտաքին: Սա ավելի ազատ դաշտ է, որտեղ պետք է ստեղծագործես և ասելիք ունեցող լուսանկարներ ունենաս»:

Թեև Իլոնան մասնագիտությամբ բուժքույր է, նկատեց, որ այդ մասնագիտությանը նույնքան սիրով չէր մոտենա, որքան դերասանական գործին: Նա նշեց, որ ստացած գիտելիքներն անհրաժեշտության դեպքում կիրառում է. «Կյանքի հիմքն առողջությունն է և այդ տեսանկյունից ինձ համար կարևոր գիտելիքներ եմ ձեռք բերել: Շատ է պատահել, որ ընկերներիս առաջին օգնություն եմ ցույց տվել»: