Սյուզի Մելիքյանը հիմնել է իր բիզնեսը

Երգչուհի Սյուզի Մելիքյանը, որը տարիներ առաջ սկսեց զբաղվել դիմահարդարմամբ և աշխատում էր հարսանյաց սրահում, հիմնել է իր սրահը։ Tert.am Life-ի հետ զրույցում Սյուզին պատմել է ինչպես իր բիզնեսի, այնպես էլ նորաձևության ոլորտում գործունեություն ծավալելու և երգչուհու կարիերայի մասին։

«Վաղուց էի ծրագրում դիմահարդարման իմ սրահը բացել։ Ի վերջո, իրականացրի ցանկությունս,– ասաց երգչուհին, որի համար բիզնեսի կառավարումը նոր ոլորտ է, –Սա նոր հարթակ է, որին լիարժեք տիրապետելու համար ես սովորում եմ իմ փորձառու ընկերներից։ Տեսակով այնպիսին եմ, որ երբեք չեմ դադարում սովորել։ Իհարկե, բարդություններ կլինեն, բայց ես դրանցից չեմ վախենում։ Դեռևս շատ լուրջ բարդություն չեմ ունեցել, առավել ևս, սա կանացի բիզնես է, կառավարումը շատ դժվար չէ»։

Երգչուհուց հետաքրքրվեցինք, թե սեփական բիզնեսը որքանով է շահավետ իր համար։ Սյուզին նկատեց, որ թեև սա բիզնես է, ինքն ընկալում է որպես սիրելի գործ։ «Եթե շահավետությանը նայես, ոչինչ չես հիմնի։ Ֆինանսական կողմը կա, ու մենք ամեն ինչ անում ենք, որ աճի։ Որևէ բան չի կարող հենց սկզբից մեծ ֆինանս բերել։ Կարևորն այն է, որ սիրես աշխատանքդ։ Այդ դեպքում այն սկսում է աճել։ Եթե ես ներկայացում եմ պրոդուկտ, այնպիսի աշխատանք եմ անում, որը կունենա արդյունք։ Ունեցածս եկամուտը ներդնում եմ իմ գործի մեջ,- ասաց նա, ինչ վերաբերում է ֆինանսական  կայունությանը, նկատեց, որ երգարվեստով էլ է գումար աշխատում,- Ես ինքնուրույն գումար աշխատել սկսել եմ դեռևս 16 տարեկանից, որովհետև երգարվեստով միշտ կարողացել եմ գումար վաստակել»։

Սյուզին նկատեց, որ հիմա շատերն են դիմահարդարմամբ զբաղվում։ Հայտնի գործընկերներից շատերն էլ սկսել են աշխատել որպես դիմահարդար։ Նրա խոսքով` հայտնի գործընկերների հետ չի մրցակցում, իսկ, առհասարակ, մրցակցությունից չի վախենում. «Հայերի մոտ ընդունված է. բոլորը սկսում են զբաղվել այն գործով, որը լավ է լինում։ Հիմա շատ-շատ են դիմահարդարները, բայց դա մեզ չի վախեցնում, որովհետև ես երկար քասթինգ եմ արել լավ մասնագետների հետ աշխատելու համար»։

Սյուզին նշեց, որ նորաձևության մեծ գործունեությունն այս պահին փոքր–ինչ պասիվ է, բայց այդ մասին չի մոռացել։ Նա շարունակում է թողարկել շապիկների իր գիծը, նոր մտքեր էլ ունի, բայց չգիտի, թե երբ կներկայացնի հանրությանը.

«Հագուստի հետ կապված շատ հետաքրքիր մտքեր ունեմ, ուղղակի բոլորը միասին անել չեմ կարող։ Գիտեմ, թե հաջորդիվ հագուստի ինչ գիծ եմ ներկայացնելու, բայց նախապես խոսել չեմ սիրում»,- ասաց նա։

Որպես դիզայներ` մասնագիտական կրթություն ստանալու և ավելի պրոֆեսիոնալ ներկայանալու մասին Սյուզին առայժմ չի մտածում։

«Ես սկսեցի դիզայնով զբաղվել, որովհետև ինձ  հաճախ էին հարցնում իմ հագուստը որտեղից եմ գնել, որ ոճաբանի հետ եմ աշխատել, մինչդեռ ինքս էի զբաղվում դրանով։ Հասկացա, որ հետաքրքիր կլինի իմ ոճը ներկայացնել լսարանին։ Կարծում եմ` ամեն մարդ չէ, որ պետք է նորաձևությամբ զբաղվի։ Այն պահանջում է  նուրբ ճաշակ։ Կարծում եմ՝ ես ունեմ ճաշակի զգացողություն, միշտ փորձում եմ հետաքրքիր ներկայանալ։ Եթե նորաձև ես, ուրեմն կարող ես նորաձևություն ներկայացնել, հետաքրքիր լուծումներ առաջարկել։ Մասնագիտական կրթության կարիք դեռևս չեմ զգում, քանի որ այս փուլում չեմ նախատեսում դիզայներ դառնալ։ Անում եմ այն, ինչն իմ ճաշակով է։ Գուցե հետագայում մտածեմ այդ մասին»,– ասաց նա։

Ինչ վերաբերում է երգչուհու կարիերային` Սյուզին շեշտում է, որ ոչ մի պահ չի անտեսում այն։ «Երգչուհու աշխատանքն իմ մասնագիտությունն է, ու ես երգով ապրում եմ։ Չեմ էլ կարող դադար տալ, որովհետև ինձ սիրող մարդիկ ինձ դրդում են նոր գործեր անել։ Ես երգչուհի եմ, որն իր մասնագիտությունից զատ փորձում է ունենալ իր սեփական գործը` բիզնեսը։ Դա ամբողջ աշխարհում է ընդունված։ Սակայն երգչուհու աշխատանքն ինձ համար շարունակում է մնալ  առաջնային։ «Տաշի շոու»–ի ժամանակ նոր երգ ներկայացրի։ Հիմա հետաքրքիր տարբերակներ ենք մտածում այն մատուցելու համար»,– ասաց նա, սակայն դժվարացավ հստակ ասել` երգը տեսահոլովակո՞վ կներկայացնի, թե՞ ոչ։