«Կարծում եմ՝ իմ կատարած ցանկացած աշխատանք տարբերվել է մյուսից». Մաշ Իսրայելյանը` նոր տեսահոլովակի ու գլխավոր հերոսի մասին

13:10 • 26.01.19

Շոուբիզնես

2019-ը երիտասարդ երգչուհի Մաշ Իսրայելյանը սկսում է երաժշտական նորությամբ: Փետրվարի 14-ին նա լսարանին կներկայացնի նոր տեսահոլովակ: Նոր տեսահոլովակը նկարահանվել է «Սերս քո անունով» երգի հիման վրա, որի երաժշտության և խոսքերի հեղինակը երգչուհու պրոդյուսեր Արման Անտոնյանն է:

Մաշը Tert.am Life-ին տրամադրել է լուսանկարներ նկարահանման հրապարակից ու պատմել մանրամասները:

«Սիրո տոնին ընդառաջ այս անգամ որոշեցինք ավելի մեղեդային երգ ներկայացնել: Այն գեղեցիկ սիրո պատմություն է, ինչի կարիքը, կարծում եմ, այդ օրերին բոլորը զգում են»,- ասաց երգչուհին:

Նրա խոսքով, սիրային պատմությունը փորձել են վերարտադրել տեսահոլովակում, որի ռեժիսորն Ապեր Արեգունին է: Մաշը նշեց, որ նկարահանումներն իրականացվել են ինչպես տաղավարում, այնպես էլ դրսում:

«Չեմ ուզում բացել փակագծերը, սակայն կարծում եմ՝ բավականին հետաքրքիր ու տարբերվող տեսահոլովակ է, որն ունի գեղեցիկ սյուժետային գիծ: Այն մաքուր ու գեղեցիկ սեր նկարագրող, հետաքրքիր լուծումներով հագեցած աշխատանք է»,-ասաց նա և ավելացրեց, որ տեսահոլովակի հերոսին մարմնավորել է Նորայր Եղյանը:

Երգչուհու կարծիքով՝ նոր աշխատանքը կտարբերվի նախորդներից և հանդիսատեսին հնարավորություն կտա իրեն նորովի բացահայտելու. «Կարծում եմ՝ իմ կատարած ցանկացած աշխատանք տարբերվել է մեկը մյուսից, քանի որ ժամանակին համընթաց փոխվում է նաև մարդկանց ճաշակն ու երաժշտական ոճը: Այս դեպքում էլ բացառություն չէ։ Ինչ խոսք, այս անգամ փորձել եմ է՛լ ավելի մեծ մասսայականություն վայելող ոճի մեջ հանդես գալ»:

Մաշն իրեն համարում է բազմաժանր երգչուհի, թեև չի թաքցնում՝ իր համար առավել հոգեհարազատ են սիրային, լիրիկական, մեղեդային երգերը:

Երգչուհին նկատեց, որ ընթացիկ տարին իր համար ստեղծագործական առումով բուռն է լինելու: «Այս տարին հագեցած է լինելու բազմաթիվ երգերով, շրջագայություններով, համերգներով: Իհարկե, կլինեն նաև նոր տեսահոլովակներ: Մի խոսքով, իմ հանդիսատեսը չի հասցնի ինձ կարոտել»,- եզրափակեց նա: