Նարեկ Բավեյանի ռոմանտիկ տեսահոլովակը հեղինակային երգի հիման վրա

Նարեկ Բավեյանը սիրո տոներին ընդառաջ լսարանին նոր տեսահոլովակ կներկայացնի, որը նկարահանվել է «Սիրուց առավել» երգի հիման վրա։ Նոր աշխատանքի առաջին մանրամասները Նարեկը վստահել է Tert.am Life-ին և լուսանկարներ տրամադրել նկարահանման հրապարակից:

Երգի երաժշտության հեղինակը երգիչն է, իսկ խոսքերը գրել է Գայանե Ավետիսյանը: Նարեկը պատմեց, որ երաժշտությունը գրել է դեռ երեք տարի առաջ: Արդեն մեկ տարի է` այն կա համացանցում, բայց տեսահոլովակով ներկայացնելու ցանկություն միշտ է ունեցել:

«Ճիշտն ասած, երգը տեղադրել էի Յութուբի իմ ալիքում, բայց խղճիս չէր նստում, որովհետև սիրուն երգ է, ուզում էի, որ տեսահոլովակ ունենա: Երբ իմ ընկերոջից՝ օպերատոր Գրիգոր Դավթյանից տեսահոլովակ նկարահանելու առաջարկ ստացա, միանգամից այս երգն ընտրեցի: Տեսահոլովակն արդեն մոնտաժային փուլում է։ Ամեն ինչ անում ենք, որպեսզի հասցնենք փետրվարի 14-ին պրեմիերա անել»,-ասաց նա:

Նարեկը նշեց, որ երգը մեղեդային է և նման է սիրո խոստովանության: Երգչի խոսքով, այն լայն տարածում չի գտել ու տեսահոլովակով ներկայացնելն արդարացված կլինի. «Շատ քչերն են լսել այս երգը: Այն չի էլ գովազդվել իմ կողմից: Ընդամենը մի քանի անգամ եմ երգել: Կարծում եմ՝ տեսահոլովակը կնպաստի, որպեսզի ավելի շատ մարդիկ լսեն այն»:

Երգիչն ասաց, որ տեսահոլովակը նկարահանել են մեկ օրում՝ երեք տարբեր վայրում: Այն սյուժետային գիծ չկա, պարզապես ներկայացնում է սիրահար զույգի ռոմանտիկ հարաբերությունները:

«Տեսահոլովակում հերոսը ես եմ, հերոսուհին` մոդել Իզաբելլան, որին հրավիրել է ռեժիսորը: Մենք հայտնվում ենք երեք տարբեր իրավիճակում՝ դրսում, տանը և Կոմպոզիտորների միության շենքում, որտեղ ես դաշնամուր եմ նվագում»,-ասաց Նարեկը:

Նրա խոսքով, ստեղծագործելիս պարտադիր է ինչ-որ մի բանից ոգեշնչված լինելը. «Այնպես չէ, որ որոշում եմ ու սկսում երգ գրել: Դա լինում է կյանքի տարբեր իրավիճակներում, երբ մտքիս գալիս է երաժշտություն, երբեմն նաև բառեր եմ գրում»:

Նարեկը նշեց, որ այլ երգիչների համար երբևէ չի ստեղծագործել։ «Այդպիսի առաջարկ չեմ էլ ստացել իմ գործընկերներից, որովհետև, երևի թե, բոլորն էլ գիտեն, որ միայն ինձ համար եմ ստեղծագործում: Ծրագրեր էլ չունեմ մեկ ուրիշի համար երգեր գրելու ու վաճառելու: Առհասարակ, կարծում եմ, որ եթե երգիչը նաև ստեղծագործում է, չպետք է այդ երգչին դիմել, որ իրենց համար երգ գրի։ Եթե մի լավ բան գրի, հաստատ ինքը կերգի,– ասաց նա ու նկատեց, որ իր հեղինակած երգերն առավել զգացմունքային է կատարում,– Միանշանակ քո գրած երգը երգելիս ավելի լավ ես ընկալում, ամբողջ ներաշխարհովդ զգում ես՝ ինչի մասին ես երգում, որովհետև քոնն է։ Չնայած դա չի նշանակում, որ ուրիշի գրած երգը թե՛ ես, թե՛ այլ երգիչներ վատ ենք կատարում: Եթե կարողանում ես երգն անցկացնել քո միջով, դարձնել քոնը, լավ կերգես, բայց ավելի հեշտ է, երբ քոնն է, մարսելու խնդիր չկա»:

Երգիչը նշեց, որ մեղեդային երգերը, որոնցով լսարանն իրեն ճանաչեց ու ընդունեց, իրեն առավել հոգեհարազատ են, սակայն չբացառեց, որ կշարունակի նաև 6/8 ձևաչափում երգեր կատարել: «Դա կոմերցիոն ժանր է, որը պետք է գումար աշխատելու համար և, ինչու ոչ, եթե այդ ժանրում էլ լինեն գեղեցիկ երգեր, նաև առանց կոմերցիոն նպատակների կարելի է կատարել»,- եզրափակեց նա: