«Այնքան երջանիկ եմ, որ կզգացվի». Սիլվա Հակոբյանի առաջին տեսահոլովակն ապագա մայրիկի կարգավիճակում

Սուրբ Սարգսի տոնին ընդառաջ երգչուհի Սիլվա Հակոբյանը նոր երգ ու տեսահոլովակ կներկայացնի, պրեմիերան տեղի կունենա փետրվարի 13-ին` իր մայրիկի տարեդարձի օրը: «Գտել եմ» կոչվող երգի երաժշտության ու խոսքերի հեղինակը Մանե Հակոբյանն է, գործիքավորումն արել է Գուրոն: Սիլվան Tert.am Life-ին է վստահել նոր աշխատանքի մանրամասներն ու լուսանկարներ տրամադրել տեսահոլովակի նկարահանման հրապարակից:

Երգչուհու խոսքով` նոր երգը մեղեդային է, երջանիկ սիրո մասին: Սիլվան հայտնեց, որ երգի անվանումն ընտրել է երկրպագուների հետ` օնլայն հարցման միջոցով. «Մեծ մասը քվեարկեց «Գտել եմ» տարբերակի օգտին, այդպես էլ անվանեցինք երգը: Երգը նվիրում եմ բոլոր սիրահարներին ու նաև մայրիկիս, քանի որ փետրվարի 13-ին իր ծննդյան օրն է: Երգը շատ երջանիկ սիրո մասին է: Կարծում եմ՝ յուրաքանչյուր սիրահար իրեն կգտնի այս երգի մեջ: Հուսով եմ, որ այն իսկապես կդասվի սիրո մասին այն երգերի շարքում, որոնք ամենից շատն են ճանաչվել ու սիրվել»:

Սիլվան նշեց, որ երգը ծնվել է դեռ երկու ամիս առաջ, սակայն  որոշել են տարեվերջին տեսահոլովակ չնկարահանել: Երգչուհին նկատեց, որ նկարահանումն հանպատրաստից է ստացվել:

«Որոշել էինք նկարահանել, բայց ես մտածում էի` պատրաստվելու համար ժամանակ կունենամ, մինչդեռ նկարահանման նախորդ օրը հայրիկս զանգեց ինձ ու ասաց՝ վաղը` ժամը 11-ին, նկարահանում ենք: Ոչինչ պատրաստ չէր, անգամ հագուստներս: Այդ օրվա կեսը տրամադրեցի հագուստներիս ընտրությանը: Ոճերն ընտրեցինք քույրիկիս հետ,- ասաց նա և ավելացրեց, որ տեսահոլովակը սյուժետային գիծ չունի,- Տեսահոլովակի մատուցման գեղեցիկ ձև ընտրեցինք և որոշեցինք նկարահանել նաև երաժիշտներին: Նկարահանումներն արվել են Seducation Photoroom-ում, օպերատորը` Անդրանը, բոլորիս գաղափարները վերարտադրեց հետաքրքիր կադրերով»:

Տեսահոլովակի նկարահանման ողջ ընթացքում երգչուհու կողքին է եղել նաև ամուսինը: Սիլվան նկատեց, որ ամուսնու ներկայությունն իրեն լրացուցիչ լիցքեր է հաղորդում ու ոգևորում: «Ինքն ամեն ինչով փորձում է օգտակար լինել, անգամ տեխնիկական հարցերում է աջակցում։ Առհասարակ, երբ թիմային ինչ-որ բան ենք անում, լինի տեսահոլովակ, ֆոտոշարք կամ այլ բան, ընտանիքիս բոլոր անդամները ներկա են լինում: Շատ կարևոր է, որ ոչ միայն ընտանիքիդ անդամներն են կողմ ընտրածդ մասնագիտությանը, այլև երկրորդ կեսդ է այդ ամենն ընդունում, հարգում, սիրում: Այդ առումով բախտս շատ է բերել»:

Հղիության շրջանում գտնվող երգչուհու համար նոր ու գեղեցիկ կարգավիճակում սա առաջին աշխատանքն է: Սիլվան նկատեց, որ այդ առումով էմոցիաները միանգամայն այլ էին: «Անգամ ձայնագրության ժամանակ ինձ մոտ այլ էմոցիաներ էին, տեսահոլովակի նկարահանման ժամանակ այլ էին և՛ իմ տեսքը, և՛ զգացողությունները: Միշտ հիշում էինք, որ կա փոքրիկ, որին չպետք է մրսեցնել:) Հիմա այնքան երջանիկ եմ, այնպիսի էմոցիաներ են ինձ պարուրել, որոնք հաստատ կարտացոլվեն նաև տեսահոլովակում»,-ասաց նա:

Երգչուհին երկրպագուներին տեղեկացրեց, որ ստեղծագործական դադարի չսպասեն: «Շատերը մտածում են, եթե բալիկի եմ սպասում, կարող է դադար լինի, հատկապես, փոքրիկի ծննդից հետո։ Ես այն արտիստներից եմ, որ զգացնել չեմ տա բացակայությունս: Մեր կոլեգաներից շատերն են հղիության փուլում շարունակել ստեղծագործել, ճամփորդել, ես էլ եմ այդպիսին լինելու: Փառք Աստծո, հղիությունս շատ ծանր չի անցնում, այնպես որ դադար չի լինի: Մենք երկուսով կստեղծագործենք:)»,-եզրափակեց երգչուհին: