«Եթե կարող եմ ինքս անել, ավելորդ ծախսի իմաստ չեմ տեսնում». Նիկ Էգիբյանը` հայտնիների հետ համագործակցության և իր երգերի հեղինակը, ռեժիսորն ու պրոդյուսերը լինելու մասին

Նիկ Էգիբյան. երգիչ, երգահան, որն իր լսարանին երկար սպասեցնել չի տալիս և պարբերաբար նորություններով է ներկայանում: Tert.am Life-ը երգչի հետ զրուցել է վերջին տեսահոլովակի, սպասվող նորությունների և համագործակցությունների մասին:

«Այս պահին ունեմ 3 նոր երգ, որոնց աշխատանքներն արդեն վերջացնում եմ: Շուտով նաև 2 նոր տեսահոլովակ եմ նկարահանելու։ Առաջինը կներկայացնեմ երկու շաբաթից, երկրորդը՝ մարտի վերջին»,-նշեց Նիկը և հավելեց, որ շուտով մանկական երաժշտական  նախագիծ է սկսվելու, որտեղ ունենալու է իր մասնակցությունը, սակայն մանրամասներ հայտնել առայժմ չի կարող:

Նիկն աշխատում է նաև այլ արտիստների հետ, երգեր է գրում, գործիքավորում։ Նա հայտնեց, որ շուտով պատրաստ կլինեն Սոֆի Մխեյանի, Գայա Արզումանյանի, Արամ MP3-ի, Ռոզա Ֆիլբերգի և այլոց համար գրված երգերը: Նիկի խոսքով՝ երգիչներից ոչ ոքի հետ աշխատելը հեշտ չէ, բոլորն էլ ունեն բարդ կողմեր. «Չկա արտիստ առանց որևէ հետաքրքիր խնդրի: Ես էլ ինձ տարօրինակ մարդ եմ համարում։ Եթե էքստրաօրդինար չլինես, այս բնագավառում չես գոյատևի»:

Երգիչը պատմեց, որ անգլերենից հայերեն երգեր գրելու անցումը եղավ այն ժամանակ, երբ հասկացավ, որ անգլերեն հասկանում է երկրի 1%-ը, իսկ երաժշտասեր է այդ 1%-ի 0,00001-%ը: Նիկը նշեց նաև, որ փորձում է ավելի մատչելի, հասանելի և մասսայական սեր վայելող ոճով հանդես գալ, թեպետ անգլերեն երգեր հիմա էլ գրում է, cover-ներ է անում, ուղղակի իմաստ չի տեսնում տեսահոլովակ նկարահանել. «Եթե ինձ համար եմ անում, ինձ լսելն էլ է հերիք»:

Երգչի վերջին տեսահոլովակը նկարահանվել է «Գտա» երգի հիման վրա, ասում է` երգի բառերն իր հետ կապ չունեն, պարզապես ռոմանտիկ, դրական էներգիայով երգ է գրել՝ սիրո տոներին ընդառաջ, հաջորդը կլինի պարային ստեղծագործություն։

Նիկն իր տեսահոլովակների և՛ ռեժիսորն է, և՛ պրոդյուսերը, և՛ ոճաբանը, ինչը, ըստ նրա, ֆինանսապես ավելի հարմար է: «Ես անում եմ այն, ինչ կարող եմ անել, ինչից գլուխ չեմ հանում, թողնում եմ ուրիշներին, օրինակ՝ ոչ մի տեսահոլովակի մոնտաժ չեմ անում, որովհետև իմ խելքի բանը չէ։ Եթե մի բան քիչ, թե շատ ստացվում է, անում եմ: Միևնույն է, պետք է քիթս մտցնեմ ու անեմ այնպես, ինչպես ինձ է հարմար, դուրեկան։ Այդ դեպքում համագործակցության և ավելորդ ծախսի իմաստ չեմ տեսնում»,- անկեղծացավ երգիչը՝ հավելելով, որ մարդկանց վստահելու խնդիր էլ ունի:

Անի Թորոսյան