«Աղջիկս երեք րոպեն մեկ երգում էր «Ազիզյաններ»». Գարիկը` սիթքոմի նոր եթերաշրջանի, Հայկ Մարությանի բացակայության և կադրից դուրս մնացող պատմությունների մասին

Հումորիստ-դերասան Գարիկ Պապոյանը 5–րդ եթերաշրջանում միացավ «Ազիզյանների» ընտանիքին։ Եթե Tert.am Life-ի նախորդ զրույցի ժամանակ Գարիկի պատկերացումներն իր դերակատարան մասին ինչ–որ առումով նախնական էին, հիմա հնարավորություն կա ամփոփելու իր մասնակցությամբ եթերաշրջանն ու խոսելու Հայկ Մարությանի գնալուց հետո գլխավոր կերպարի բացը լրացնելու, պատասխանատվության ու սիթքոմում Ջիվանի կոլորիտային կերպարը մարմնավորելու բարդությունների մասին։

«Իմ առջև խնդիր դրված չի եղել, որ «Ազիզյանները» սիթքոմում լրացնեմ Հայկ Մարությանի բացակայությունը։ Հայկ Մարությանի բացակայությունը լրացնելու համար ուրիշ ֆորմատով, ուրիշ կերպարով պետք է լրացվեր,  նոր հետաքրքրություններ ու զարգացումներ պետք է ստեղծվեին։ Իմ առջև դրված էր այդ խնդիրը, ինչն էլ փորձում եմ կատարել»,- նշեց Գարիկը։

Ռուսաստանից Հայաստան ժամանած Ջիվանը որևէ նմանություն, անգամ, ընդհանրություն չունի Գարիկի հետ։ Հետաքրքիր մի բացահայտում. կերպարը ստեղծելու նախնական փուլում օգնության է հասել «Одноклассники» սոցիալական ցանցը։ «Մենք նկարիչ ունենք, որը զբաղվում է կերպարների հագուստով, տաղավարով։ Իր հետ երկար քննարկեցինք՝ ինչպիսի կերպար ենք պատկերացնում, օրինակներ նայեցինք, մտանք «Одноклассники» սոցիալական ցանց, նկարներ նայեցինք և հասկացանք, որ Ջիվանը հենց այսպիսին պետք է լինի։ Ընտրեցինք շորեր, հագանք, ուրախացանք, բայց իմ հագով չեղավ ու իմ տան շորերով եկա,- ծիծաղելով ասաց Գարիկն ու շարունակեց կատակել, թե իրոք իր հագուստն է,– տանն այսպես եմ հագնվում՝ գիշերանոցս է»։

Առանց կատակների Ջիվանի մասին զրույցը հեշտ չէ պատկերացնել։ Նկարահանումներն էլ բարդանում են, երբ խաղընկերները տեսնում են Ջիվանին։ Պարզվում է` նրանք դժվարությամբ են զսպում ծիծաղն ու մի քանի դուբլ է պահանջվում, որպեսզի ունենան ցանկալի արդյունքը։

Գրված սցենարին զուգահեռ իմպրովիզներ անելն այնքան էլ հեշտ չէ՝ մինչև այդ երկար քննարկումներ են լինում ռեժիսոր Արման Մարությանի հետ։

«Մեր ռեժիսորի հետ շատ բարդ է իմպրովիզների հարցում, որովհետև ինքը սիրում է հստակ սցենարով աշխատանք։ Ես դա շատ եմ գնահատում, բայց դե ճղվում եմ միջիցս, ուզում եմ իմպրովիզներ անել։) Այդ հողի վրա ռեժիսորի հետ խնդիրներ ենք ունենում, ինձ չորս անգամ սիթքոմից հանել են, նորից հետ եմ եկել ու էլ չեմ փորձում,- կատակեց Գարիկն ու ավելացրեց,– Սցենարը կարդալիս, երբ ինչ-որ բան է մտքիս գալիս, մոտ երկու ժամ համաձայնեցնում եմ ռեժիսորի հետ, հետո նա հանձնվում է»։

Մինչև սիթքոմում նկարահանվելը ու անգամ հիմա Գարիկն այն չի դիտել, զարգացումներին հետևում է նկարահանման հրապարակում։ «Ես չեմ նայել սիթքոմը, բայց աղջիկս շատ էր նայում ու ամեն երեք րոպեն մեկ երգում «Ազիզյաններ»։ Այդտեղից գիտեի, որ նայում են։ Ինքս չեմ նայել, ոչ յն պատճառով, որ նախընտրել եմ այլ սիթքոմ, պարզապես չունեմ դրա ժամանակը»,- ասաց դերասանը, ապա կատակեց, որ իր մոտ մինչև վերջին սերիայի զարգացումները կան, կարող է հրապարակել։

Մինչը սիթքոմում որպես հիմնական կերպար ընդգրկվելը Գարիկին այստեղ տեսել ենք էպիզոդիկ դերով։ Դերասանը նշում է, որ անգամ այդ փոքրիկ դերը երկար են մշակել` փորձելով ստանալ վառ, հիշվող դրվագ։ Համագործակցության առաջարկն էլ հումորիստը գործնական չի ընկալել։

«Ես ուզում եմ շեշտել, որ սա ինձ համար ոչ թե գործնական միջավայր է, այլ ընկերական, որովհետև գաղափարի հեղինակներն ու իրականացնողներն ընկերներս են։ Ինձ համար հաճույք է նրանց մասնակցությամբ ինչ-որ մի տեղ հանդես գալը»,– ասաց նա։

Լուսանկարները՝ Շաքե Հովհաննիսյանի

Զառա Ղազարյան