«Չեմ սիրում կրել այն, ինչ բոլորն են հագնում». Լիլի Սարգսյանը` ոճի և Եվրոպա մեկնելու մտադրության մասին

Կար ժամանակ, երբ բոլորը նրա մասին էին խոսում, քննարկում, քննադատում կամ պաշտպանում. 2017–ին նա ստացավ Հայաստանի ամենագեղեցիկ աղջկա տիտղոսը, դրանից հետո մոդելային որոշակի կարիերա ծավալեց, բայց ակտիվ գործունեության մասին առայժմ չենք լսել։ Խոստանում է` դեռ կլսենք։ 

Tert.am Life–ը զրուցել է «Միսս Արմենիա 2017» Լիլի Սարգսյանի հետ ու պարզել, թե ինչով է զբաղվում հիմա։ Ապագա դիզայները խոսել է նաև ոճային իր լուծումների, իր համար մոդելավորած զգեստների ու սիրելի բրենդների մասին։

Մշակույթի քոլեջի Դիզայնի բաժնի ուսանողուհու հիմնական զբաղվածությունը հիմա լրացնում են ուսումը, մարզումներն ու նկարահանումները։ Թեև նրա մասնակցությամբ նախագծեր շատ չենք տեսնում` վստահեցնում է` մոդելինգով կարողանում է գումար վաստակել։

Լիլիի խոսքով` մոդելային կարիերան անտեսել չի պատրաստվում։ Հիմա աշխատում է  Եվրոպա մեկնելու ուղղությամբ, որտեղ պատրաստվում է մոդելային որևէ դպրոցում սովորել։ Առաջին այցը Եվրոպա կլինի տուրիստական, ինչից հետո կվերադառնա Հայաստան ու նորից կմեկնի արդեն մասնագիտության մեջ հմտանալու նպատակով։

«ԱՄՆ–ից առաջարկ ունեի, բայց ուզում եմ Եվրոպա մեկնել։ Եվրոպա կգնամ իմ նախաձեռնությամբ, առաջարկով չեմ մեկնում։ Միշտ ասել եմ, որ Փարիզում լինելու ցանկություն ունեմ։ Հանգիստս կհամատեղեմ մասնագիտական գործունեության հետ,– ասաց նա ու վստահեցրեց, որ մասնագիտական առաջարկներ ունենում է, այլ հարց է, որ ոչ բոլորն է ընդունում,– Մի քանի առաջարկ մերժել եմ, մյուսների վերաբերյալ դեռ մտածում եմ։ Կան առաջարկներ, որոնց շուրջ համաձայնության ենք եկել»։

Հիմա բավականին տարածված երևույթ  է, երբ մոդելները նաև նկարահանվում են ֆիլմերում, սերիալներում։ Լիլիի խոսքով` ինքն էլ ստացել է նման առաջարկներ, սակայն չի ընդունել. «Կարծում եմ` դա իմ ուղին չէ։ Թեև չեմ բացառում, որ օրերից մի օր նկարահանվեմ։ Մոտ ժամանակներս, կարծում եմ, տեսահոլովակում կնկարահանվեմ»։

Հայտնիությունը պետք է ճիշտ օգտագործել` չմոռացվելու համար։ Լիլիի հայտնիությանը հետևեց պասիվության շրջան։ Մոդելից հետաքրքրվեցինք` իր գնահատմամբ` իր հանդեպ հետաքրքրությունը մարե՞լ է` հաշվի առնելով, որ հիմա ավելի քիչ է մարդկանց տեսադաշտում։ Լիլին հասցրել է հասկանալ, որ հայտնի դառնալը դժվար չէ , կարգավիճակը պահելն է բարդ ու  աշխատատար։

«Ես լինում եմ տարբեր միջոցառումների և նկարահանումների, պարզապես էջումս ակտիվ չեմ։ Շուտով կվերսկսեմ իմ գործունեությունը ավելի մեծ մասշտաբով։ Պասիվություն, որպես այդպիսին, չկա, ուղղակի շատ էի բացակայում դասերից, որոշեցի  ամբողջ ժամանակս նվիրել ուսմանս։ Ես միշտ շարժվում եմ առաջ, եթե տեղում կանգնեցի, ինքնաբերաբար հետ կընթանամ»,– ասաց նա։

Ապագա դիզայները դեռ չի զբաղվում զգեստների մոդելավորմամբ, միայն իր համար է երբեմն հագուստներ հեղինակում։ Լիլին հետևում է նորաձևությանը, բայց ոչ կուրորեն։ Եթե ինչ-որ բան սեզոնին հակաթրենդային համարվի, բայց իրեն դուր գա, կհագնի։

«Հետևում եմ թրենդին, սակայն եթե հագուստն ինձ դուր է գալիս, կկրեմ։ Ավելի լավ է ինձ դուրեկան ոչ թրենդային զգեստ կրեմ, քան լինեմ թրենդային զգեստով, որն ինձ համար չէ ստեղծված և նմանվեմ կլոունի»,– կարծում է նա։

Արտաքին կերպարը ստեղծելիս Լիլին ուշադրություն է դարձնում կոկիկությանն ու օծանելիքին։ Ասում է`մեծ թուլություն ունի օծանելիքների հանդեպ։ Նրա խոսքով` սիրում է ունենալ բրենդային իրեր, սակայն կարևորություն չի տալիս անընդմեջ բրենդային իրեր գնելուն։ Մոդելի սիրելի բրենդներն են Cristian Dior, Chanel, Prada, Ralph Lauren , Louis  Vuitton:

Հագուստի գինը Լիլին չի կարևորում։ Նրա համոզմամբ`չի սիրում նաև հոսքի հետևեց գնալ։ «Երբ մի իր շատ են գովում և բոլորը վազում այդ իրի հետևից, ես այդ կողմ չեմ գնա։ Չեմ սիրում կրել այն, ինչ բոլորն են հագնում»,– շեշտեց նա։ Լիլին դժվարացավ ասել, թե ամսվա կտրվածքով միջինում որքան գումար է ծախսում հագուստի վրա. «Մի փոքր բարդ հարց է , իրերիս մեծ մասը արտերկրից է կամ իմ ստեղծագործածը»։