«Աղջկա դաստիարակությունը նուրբ և բարդ գործընթաց է». Նարինե Սուլթանյանը` կանացիության բանաձևի և դստեր հետ հարաբերությունների մասին

Կանացիության բանաձևերը տարիներ շարունակ հեռուստադիտողների համար բացահայտում է  «Նանե» հաղորդաշարը։ Tert.am Life-ը նախագծի հաղորդավարուհի Նարինե Սուլթանյանի հետ զրուցել է ինչպես կանանց հուզող հարցերի, այնպես էլ դստեր հետ հարաբերությունների մասին։

Տարիներ առաջ դստեր լույս աշխարհ գալուց հետո Նարինեն թողեց հեռուստատեսային ակտիվ առօրյան և կարիերայում երկարաշունչ դադար վերցրեց։ Հաղորդավարուհին անկեղծանում է, որ կյանքի այդ փուլում աշխատանքի մասին չի էլ մտածել, թեև վստահ էր, որ վերադառնալու է սիրելի գործի։

«Դա մի նոր շրջան էր` լի նոր էմոցիաներով, որն ուզում էի լիարժեք վայելել, տրվել երեխայիս ժամ առ ժամ մեծանալու գործընթացին` քաջ գիտակցելով, որ այս ակնթարթներն էլ չեն կրկնվի, իսկ աշխատանքը կսպասի»,-  ասաց հաղորդավարուհին, որն արդեն հաջողում է համատեղել ընտանեկան կյանքը, հեռուստատեսային հագեցած առօրյան և միշտ խնամված ու գեղեցիկ լինելը։

Նարինեն նկատեց, որ դա բարդ է, բայց կարողանում է։ Աղջիկն արդեն դպրոցական է, առանց այն էլ խիտ գրաֆիկին ավելացել են նաև տարբեր խմբակները, որոնց հաճախում է դուստրը։ «Հոգսերն ավելի են շատացել, բայց կարողանում եմ օրս այնպես կազմակերպել, որ երեխաս չտուժի, աշխատանքս` նույնպես: Որքան լեցուն է առօրյադ, այդքան շատ բան ես հասցնում»,- համոզված է Նարինեն։

Խոսելով դստեր հետաքրքրությունների մասին` հաղորդավարուհին նշեց, որ աղջիկը հետաքրքրվում է քիմիական փորձարկումներով, ապա ժպիտով ավելացրեց, որ ինքը դարձել է դեղատների և գրենական պիտույքների խանութների մշտական հաճախորդը։ Այնուամենայնիվ, առայժմ նա դժվարանում է ասել, թե հետագայում ինչի կբերեն այդ փորձարկումները:

Հաղորդավարուհու խոսքով` դուստրը՝ Միլան, դեռ  փոքր տարիքից է հետաքրքրություն դրսևորել ճանաչողական խաղալիքների նկատմամբ, հաճախում է երաժշտական դպրոց, անգլերենի դասընթացների, շախմատի և գեղարվեստական մարմնամարզության: Նարինեն անկեղծացավ, որ շատերն իրեն մեղադրում են բալիկին ծանրաբեռնելու համար, բայց ինքը կարծում է, որ երեխային պետք է տալ շատ հնարավորություններ, որպեսզի հասկանա՝ որն է իսկապես իրենը:

Հաղորդավարուհի մայրիկը վստահ է՝ յուրաքանչյուր կնոջ համար դստեր ծնունդը Աստծո պարգև է, քանի որ ողջ կյանքի ընթացքում ձեռք է բերում իր ամենակարևոր ընկերուհուն և իր  շարունակությունը: «Աղջիկը , այսպես ասած, տոնուսի մեջ է պահում մորը։ Աղջկա դաստիարակությունը բավականին նուրբ և բարդ գործընթաց է, ինչը կնոջ առաջնային խնդիրն է: Կինն է ձևավորում դստեր անհատականությունը, կանացիությունը, ինչու չէ, նաև բնավորությունը, բայց չմոռանանք տոկունության, ներքին ուժի և կամքի մասին: Այս ամենը պետք է լինի կնոջ, մոր առաքելությունը` անկախ ժամանակի թելադրանքից»,- ասաց Նարինեն` ավելացնելով, որ վերջին շրջանում շատ է խոսվում ֆեմինիզմի, կանանց էմանսիպացիայի, գենդերային հավասարության մասին, բայց ինքն ամեն ինչ անում է, որպեսզի Միլան, մեծանալով այս արժեքային համակարգը կրող հասարակության մեջ, երբեք չկորցնի կանացի ճիշտ սկիզբը, կնոջը բնորոշող նրբությունները:

Կանանց միամսյակի շրջանակում խոսեցինք նաև մարտի 8-ի խորհրդի մասին։ Հաղորդավարուհու համար այն չի փոխվել մանկուց ի վեր՝ հիշում է, թե ինչպես էր մայրիկի համար ամեն տարի բացիկներ պատրաստում և գեղեցիկ բարեմաղթանքներ հղում: Նարինեն նկատեց, որ հիմա նույնն ինքն է ստանում դստեր կողմից, ինչն ամենաթանկ նվերն է։

«Այդ փոքրիկ բացիկների մեջ ընթերցում եմ երեխայիս բարեմաղթանքները և «ներքին բողոքները», որոնք ապագայում ազդակ են դառնում ինձ համար, կարողանում եմ հասկանալ երեխայիս ներաշխարհը։ Աղջիկս հաճախ է իր ասելիքներն ու ցանկությունները մեզ հայտնում բացիկներով, ինձ սենյակից սենյակ է ուղղորդում, որտեղ ես գրություններ եմ գտնում իմ հաջորդ քայլերի մասին: Հասկացա, որ նա «Քուեստ» խաղի սիրահար է»,- ժպիտով նշեց Նարինեն՝ հավելելով, որ ապրիլի 7-ն ավելի է նույնականացնում մայրության խորհրդի հետ:

Հաղորդավարուհին ասաց, որ միամսյակին առանձնակի կարևորություն չի տալիս, քանի որ կարծում է, որ կինը ամբողջ տարի պետք է լինի ուշադրության, հոգատարության և սիրո մեջ: Հաղորդավարուհին, որը տարիներ շարունակ էկրանից խոսել է կանանց հետաքրքրությունների մասին, կարծում է, որ ժամանակի ընթացքում կինն իր հետաքրքրություններով և ցանկություններով շատ է փոխվել։

«Իմ դիտարկմամբ` այսօր կանայք ավելի բաց և համարձակ են իրենց ինքնաարտահայտման, ինքնադրսևորման մեջ: Ուրախալի է փաստը, որ նրանք սկսել են ավելի մեծ դեր ու նշանակություն տալ իրենց անձին,  հասարակական կյանքին: Բացի այդ, կանայք սկսել են ավելի ուշադիր լինել իրենց առողջության և արտաքնի հանդեպ, ինչում բազմիցս համոզվում եմ, երբ շրջում եմ երևանյան փողոցներով»,- ասաց հաղորդավարուհին:

Ըստ Նարինեի` իր օտարերկրյա հյուրերը հաճախ են նշում, թե որքան խնամված և կոկիկ են հայ կանայք` անկախ իրենց սոցիալական կարգավիճակից. «Հաղորդման շրջանակներում մենք ստանում ենք բազմաթիվ հեռախոսազանգեր, որոնք փաստում են, որ գեղեցկությունը, առողջությունը և հոգեբանի խորհուրդները մշտապես արդիական են կնոջ դինամիկ կենսակերպն ապահովելու համար: Չէ՞ որ ցանկացած անհատի կյանքում տարիների ընթացքում  փոխվում են նախապատվությունները, սակայն կան թեմաներ, որոնք հետաքրքիր են կանանց` անկախ տարիքից»:

Հաղորդավարուհու հետ զրուցելիս չէինք կարող անտեսել գեղեցիկ լինելու և որպես կին ժամանակը ճիշտ կառավարելու իր բանաձևը։ Ըստ Նարինեի` կինը պետք է որոշի իր առաջնահերթությունները, որոնք կարող են ժամանակի ընթացքում փոփոխվել:

«Ժամանակը, երբեմն, մեր դեմ է աշխատում, բայց պետք չէ ինքնանպատակ դարձնել գերկանոնակարգված ապրելակերպը, ի վերջո սա կարող է առողջությանն էլ վնաս հասցնել: Ուղղակի կարելի է սևեռվել հենց այս պահի առաջնային խնդիրների վրա: Կարծում եմ` «հոգս» բառը պետք է փոխակերպել «կենսակերպ» բառով և դրանից կփոխվի կնոջ տրամադրվածությունը»,- ասաց Նարինեն, ապա ավելացրեց, որ ցանկանում է՝ կանայք փորձեն մի քիչ ավելի թեթև նայել կենցաղային խնդիրներին և կարողանային հաճույք ստանալ թեկուզ ամենափոքր առիթներից:

Հաղորդավարուհին վստահ է, որ կենցաղն անհրաժեշտություն է, բայց այն կարող է դուրս գալ կնոջ դեմ, եթե նա չարաշահի դրա դերը. «Շատ դեպքերում կենցաղը կարող է փչացնել զույգի շատ գեղեցիկ սկսված հարաբերությունները: Այդ պատճառով` պետք է չդառնալ դրա գերին, թեթև վերաբերվել առօրյա «հոգսերին» և աշխատել կյանքը լիացնել ոչ կենցաղային հույզերով»:
Նարինեն կարևորում է խնամքի մասին չմոռանալը, ըստ հաղորդավարուհու, խնամված արտաքինը և առողջ մտքերն ամբողջացնում են կնոջ կերպարը և ստեղծում անհրաժեշտ ներդաշնակ մթոլորտը:

Զառա Ղազարյան