Սրբուկի եվրատեսիլյան երգի ընտրության և տեսահոլովակի նկարահանման մանրամասները

12:39 • 11.03.19

Շոուբիզնես

Tert.am Life-ն իր ընթերցողներին ներկայացրել է Սրբուկի եվրատեսիլյան երգի տեսահոլովակը։ Walking out երգի երաժշտության հեղինակներն են Lost Capital-ը (Հովհաննես Հովհաննիսյան, Աշոտ Պետրոսյան) և Tokionine-ը (Դավիթ Բադալյան), խոսքերի հեղինակը Գարիկ Պապոյանն է։

«Երբ առաջին անգամ լսեցի երգի մեղեդին, աչքերիս առաջ կյանքիս որոշ դրվագներ անցան, որոնք ակտուալ են մինչև այսօր, դեպքեր, որոնք հիշողություն դեռ չեն դարձել, շատ թարմ են։ Ու ես հասկացա, որ հենց այդ ներսիս կռիվն ու զգացողություններիս պայքարը պետք է լինի այն երգում, որով շատերին ու ինքս ինձ ուզում եմ ասել` մի՛ սպանիր սերը, բայց մի՛ թող, որ այն սպանի քեզ»,- ասաց Սրբուկը` հավելելով, որ երգում զգացողությունների պայքար է, սիրող սրտի մենախոսություն, որն ամեն վայրկյան կարող է վերածվել երկխոսության, հնչում են անպատասխան հարցեր, համոզմունք` մինչև այդ կետը հասցնել չի կարելի։

Տեսահոլովակը նկարահանել է Factory production ընկերությունը. ռեժիսորն Արթուր Մանուկյանն է, օպերատորը` Արտյոմ Աբովյանը, ոճաբանը` Անի Մեսրոպյանը, պարուսույցը` Հովհաննես Սարգսյանը։

Սրբուկի խոսքով, երբ երգն արդեն պատրաստ էր և քննարկվում էր, թե ինչ մոտեցմամբ պետք է ստեղծվի տեսահոլովակը, ինչ կերպով պետք է ներկայացվեն երգում առկա գաղափարները, ստեղծագործական խմբի հետ միանգամից որոշվել է այլաբանորեն ներկայացնել այն զգացողությունները, որում հայտնվում է սիրող խաբված մարդը։

Ստեղծագործական թիմը փորձել է տեսահոլովակի միջոցով փոխանցել միտքը, որ երբ սիրտդ ենթադրաբար պետք է ուրախությունից պատռվի, բայց շնչելու համար անգամ բավարար օդ չկա, երբ պլանավորում էիր ամբողջ աշխարհին պատմել երջանկությանդ մասին, բայց ստիպված ես փակվել ինքդ քո մեջ` հեռու աշխարհից, ձեռքերը կապված, դեմքը փոխված, ծամածռված, շարունակելով ձևանալ` միայն թե չմեռնի սերը։ Իսկ օդում կախված հարց կա` մինչև ե՞րբ, որքա՞ն ես դեռ պատրաստ ապրել այդ կանոններով։

Տեսահոլովակում կան բազմաթիվ սիմվոլներ, որոնք, նկարահանող խմբի համոզմամբ, յուրաքանչյուր դիտող յուրովի կկարողանա մեկնաբանել. չէ՞ որ ներկայացված զգացողությունները ընդհանուր են շատերի համար, բայց հանգուցալուծումը` միանգամայն տարբերվող։