«Սիրում եմ ներքին փոփոխություններ, որոնք աչքերի մեջ են արտացոլվում»․ Արևիկ Գևորգյանի նոր ֆոտոշարքն ու եթեր վերադառնալու որոշումը

Դերասանուհի Արևիկ Գևորգյանին ժամանակին հեռուստաեթերում հաճախ կարող էինք տեսնել, սակայն վերջին շրջանում դերասանուհու մոտ հեռուստատեսային դադար է։ Արևիկը նոր ֆոտոշարք ունի, որը տրամադրել է Tert.am Life-ին ու խոսել եթերից բացակայելու պատճառների, գեղարվեստական նոր ֆիլմի և եթեր վերադարձի որոշման մասին։

Նախագծերից բացակայությունը, դերասանուհու խոսքով, գիտակցված է եղել և իր որոշմամբ, առաջարկներ ստացել է ու շարունակում է ստանալ։

«Մի քանի տարի առաջ ինձ մոտ բավականին հագեցած գրաֆիկ էր՝ ուսանողական տարիներ, ներկայացումներ, նկարահանումներ։ Սակայն եկավ պահ, երբ բոլոր սլաքները տանում էին դեպի դադար։ Հիմա գիտակցված վերադարձի ժամանակն է»,- ասաց դերասանուհին՝ հավելելով, որ այս փուլում իր մոտ գարուն է և զարթոնք ամեն ինչում՝ թե՛ մտքում, թե՛ սրտում, թե՛ շուրջբոլորը:

Մինչև ստեղծագործական կյանքում տևական դադարը՝ Արևիկ Գևորգյանը հնարավորություն ունեցավ համագործակցելու Ալեքսեյ Գերման կրտսերի հետ՝ նկարահանվելով նախորդ տարի բեռլինյան կինոփառատանում «Ոսկե արջ» գլխավոր անվանակարգի նոմինանտ «Դովլաթով» ֆիլմում։

Դերասանուհու խոսքով` յուրաքանչյուր հաջորդ ֆիլմ նոր նշաձող է սահմանում, որն ամեն անգամ պարտադիր է հաղթահարել: Այս ֆիլմի նկարահանման հարապարակում գտնվելն արդեն իսկ փոխել է դերասանուհու կյանքը։ Ասում է` նման մասշտաբային նկարահանման հրապարակում գտնվելը յուրաքանչյուրի համար երազանք է, որն իր պարագայում կատարվել է։

«Այն թևերը, որը մեզ տալիս են թատերականի մեր վարպետները, ճիշտ օգտագործելու դեպքում կարող ենք ազատ ճախրել թե՛ մեր երկրի սահմաններում, և թե՛ մեր սահմաններից դուրս»,- ասաց Արևիկը՝ ավելացնելով, որ «Դովլաթով» ֆիլմին հաջորդել է մասշտաբային մեկ այլ նախագիծ, որում նկարահանվել է` համագործակցելով Արման Նշանյանի հետ։

«Նկարահանվել եմ գեղարվեստական ֆիլմում, որն իր տեսակով և՛ բարդ էր, և՛ էմոցիոնալ, և՛ պարտավորեցնող: Ֆիլմի հիմքում ընկած է իրական պատմություն, որտեղ մարմնավորում եմ գլխավոր հերոսուհուն: Առաջարկը ստանալուց հետո երկար եմ ապրել կերպարիս հետ, շատ անգամ հենց նա է ինձ ապրեցրել: Շատ զգույշ եմ մոտեցել կերպարիս, և փորձել շատ նուրբ ներկայացնել նրան»,- ասաց Արևիկն ու հավելեց, որ առաջին անգամ էր համագործակցում Արմանի հետ, հիմա անհամբերությամբ սպասում է ֆիլմի պրեմիերային։

Դեռ տարիներ առաջ իր հարցազրույցներից մեկում Արևիկը նշել էր, որ իր ցանկությունն է լինել պահանջված,  ոչ թե հայտնի։ Հիմա Արևիկն ասում է, որ  այդ տողերն ասելիս այսչափ հասունություն, գուցե, չի ունեցել, բայց տարիների փորձն ու անցած ճանապարհն իրեն կրկին հանգեցրել են այն մտքին, որ ինքն այն դերասանուհիների թվին չի պատկանում, որոնց համար կարևոր է մասնագիտության միայն փայլը։

«Ինձ համար կարևոր չէ մարդկանց վիզուալ հիշողությունը, որն ինձ կտանի հայտնիության՝ կարևոր է, որ ես կարողանամ իմ կերպարի միջոցով տանը կամ դահլիճում նստած մարդուն պոկել իր առօրյա հոգսերից և իր հոգուն հասցնել այն հաղորդագրությունը, որն ունի տվյալ կեպարը»,– նկատեց նա։

Ներկայացված ֆոտոշարքում Արևիկ Գևորգյանին տեսնում ենք տարիներ շարունակ հեռուստադիտողին հայտնի կերպարով և նույն ոճով՝ երկար վարսեր, քիչ դիմահարդարում։ Ասում է` ոճափոխության չի դիմում, որովհետև  ինքն իր հետ ներդաշնակ է։

«Արտաքինիս հետ կտրուկ չեմ՝ ներդաշնակ եմ ինձ հետ և իմ մեջ: Եթե կերպարս է պահանջում փոփոխություն, համարձակ կգնամ այդ քայլին, իսկ կյանքում սիրում եմ ներքին փոփոխություններ, որոնք աչքերի մեջ են արտացոլվում»,- փիլիսոփայական մոտեցմամբ պատասխանեց դերասանուհին։ Հարցազրույցի սկզբում էլ Արևիկը խոսեց ներքին զարթոնքի մասին։ Թե որքանո՞վ է այն կապված դերասանուհու անձնական կյանքի հետ, մեկնաբանել չցանկացավ։

Զառա Ղազարյան