«Բալիկս ամեն տեղ գալիս է ինձ հետ»․ Աննա Սիմոնյանը՝ 8 ամսական որդու և իր նոր նախագծի մասին

Պարուհի, դերասանուհի Աննա Սիմոնյանի աշխատանքային գրաֆիկն այս ընթացքում հագեցած է։ «Նռան հատիկ» հեռուստասերիալում երկարատև զբաղվածությունից հետո նա  որոշել է փոքրիկ դադար վերցնել։ Չնայած նորից նկարահանվելու ցանկություն ունի, հիմա զբաղվածությունը փոքր-ինչ այլ ուղղվածություն ունի։

Tert.am Life-ը զրուցել է Աննայի հետ ոչ միայն ներկայիս զբաղվածության, այլև իր և դերասան Մովսես Երեմյանի որդու` Անրիի մասին։ Թեև վերջին շրջանում ամուսինները սկսել էին հրապարակել փոքրիկի լուսանկարները, մայրիկն առաջին անգամ է խոսում որդու մասին։

Այս փուլում Աննան նախատեսում է սկսել պարային դասընթացներ՝ ջազային, դասական, հայկական և այլ ոճերում։ Աշխատելու է միայն աղջիկների հետ։ «Լինելու են սիրողական և պրոֆեսիոնալ խմբեր։ Փակագծերը բացել հիմա չեմ ցանկանում, բայց կարող եմ ասել, որ արձագանքները սպասվածից ավելի շատ էին»,- ասաց նա՝ ավելացնելով, որ բացի այս նախագծից, փորձում է գործունեություն ծավալել նաև գովազդային ոլորտում։

Պարուհի-դերասանուհի մայրիկի գրաֆիկը հագեցած է, բայց վստահեցնում է, որ կարողանում է ամեն բան համատեղել։ Ավելին, նրա խոսքով, օրվա զգալի մասն անցկացնում է ութ ամսական որդու՝ Անրիի հետ։

«Հասցնում եմ այնպես, ինչպես բոլոր կանայք։ Ես հիմա էլ շատ ժամանակ եմ տրամադրում երեխայիս, գործով փորձում եմ զվաղվել օրվա միայն մի հատվածում՝ մնացած մասը բալիկինն է։ Ամեն ինչ հասցնում եմ անել օրվա առաջին կեսին։ Զբաղվածությունս շատ է ասելով նկատի ունեմ թե՛ ընտանիքիս տրամադրված ժամանակը, թե՛ աշխատանքը։ Բալիկս դեռ փոքրիկ է ու շատ բան չի հասկանում, երբ արդեն հասկանա, սկսի նեղվել, փոփոխություններ կանեմ իր համար, հիմա դեռ աշխատելու ժամանակն է»,- ասաց Աննան։

Պարուհին նկատեց, որ որդու մոտ հիմա մոտ զարգանում են խոսքն ու շարժունակությունը, ինքն ու ամուսինը շատ են կարևորում բալիկին տրամադրված ժամանակը։

«Աշխատում ենք երեխային զբաղեցնել միայն մեկ խաղով, չենք տալիս զբաղմունքի միանգամից մի քանի առարկա, որպեսզի կողմնորոշվելու և ընտրելու խնդիր չլինի։ Վերցնում ենք մի խաղ ու դրանով ենք խաղում։ Իհարկե, շատ ուշադրություն ենք դարձնում նաև զարգացնող խաղերին։ Եթե այն շրջանն է, երբ պետք է աշխատեն ոտքերը, մենք անում ենք վարժություններ ոտքերի համար, պետք է աշխատի միտքը, անում ենք մտավոր զարգացմանը նպաստող վարժություններ։ Չնայած փոքր է, ես մեծ ուշադրություն եմ դարձնում նման բաներին,– ասաց Աննան ոը հավելեց,– անչափ սիրում եմ նրա հետ խաղալ, խոսել և դա մեզ մոտ շատ լավ է ստացվում։ Իսկապես անչափ հետաքրքիր է հետևել, թե ամեն օրվա հետ Անրիս ինչ նորությամբ է արթնանում։ Ի միջի այլոց, արդեն ասում է «մամա», «պապա», բայց ոչ թե մեզ, այլ խաղալիքներին։ Արդեն սպասում ենք առաջին ատամիկին»։

Մայրիկը կարևորում է նաև երեխայի հետ զբոսանքները։ Օրական երկու ժամ տրամադրում են զբոսանքին։ «Ակտվությունն էլ է կարևոր։ Բնականաբար, գնում ենք տարբեր տեղեր, բալիկս ամեն տեղ գալիս է ինձ հետ, նրա հետ ինչ-որ տեղ գնալը շատ հարմար է, քմահաճ  չէ»,- ասաց Աննան։

Զառա Ղազարյան