«Խուսափում եմ որևէ հարաբերություն ունենալ». Աննա Մանուչարյանը` միայնակ կյանքի և դստեր հետ հարաբերությունների մասին

«Նռան հատիկ» հեռուստասերիալում դրամատիկ կերպար մարմնավորելուց հետո Աննա Մանուչարյանը եթեր կվերադառնա նոր դերով, այս անգամ՝ հումորային ժանրում:

Դերասանուհին նկարահանվում է «Մեծից փոքր» սիթքոմում, որի շրջանակում համագործակցում է վրաց դիզայներ Ավթանդիլի հետ: Դերասանուհին նոր ֆոտոշարք ունի,  որը տրամադրել է  Tert.am Life-ին ու զրուցել ոչ միայն նախորդ կերպարի թողած հետքի, այլև նորությունների, կյանքի և դստեր հետ հարաբերությունների մասին:

Աննան նկատեցմ որ «Նռան հատիկում» մարմնավորած Մեգիի կերպարն առաջինն է իր ստեղծագործական կյանքում, որ այդքան բացասական վերաբերմունքի է արժանանացել: Աննան սա կապում է հերոսուհու բնավորության հետ. «Իրական կյանքում, բնականաբար, շատ զուսպ կգտնվեի, որովհետև ինձ համար այդ հարցը սկզբունքային է՝ որևէ մեկին չէի գայթակղի՝ իմանալով, որ ընտանիք ունի: Իհարկե, աշխարհում կան շատ տարբեր մտածողության մարդիկ, և ես չեմ քննադատի որևէ մեկին»:

Շարունակելով իրական կյանքի ու անձնական զգացողությունների մասին թեման՝ Աննան անկեղծացավ ունի սիրո կարիք, ինչպես բոլորը, բայց դեռ չի սիրահարվում. «Սերն իր հետ բերում է հազար ու մի ինտրիգ,- ասաց Աննան ու նշեց, որ  իրեն լիարժեք զգալու համար որևէ մեկի կարիքը չունի՝սովորել է հանգիստ ու խաղաղ կյանքին։ –Խուսափում եմ որևէ հարաբերություն ունենալ, մտքովս էլ չեմ անցկացնում, որ կարող է հայտնվել ինչ-որ մեկը: Որքան էլ նա իր հետ գունավոր և յուրահատուկ զգացողություններ բերի, միևնույն է, կբերի նաև խոչընդոտներ: Եթե մի օր ինչ–որ բան փոխվի իմ կյանքում, դա կլինի Աստծո կամոք»:

Սա մի հոգեվիճակ ու կարգավիճակ է, որին, ըստ դերասանուհու, հասել է երկար ժամանակի ընթացքում: Նա նկատեց, որ դժվար է լինել մայր, խնամված կին, աշխատել ու ընտանիք պահել։

«Հետ նայելով` տեսնում եմ, որ իսկապես երկար ճանապարհ եմ անցել: Կյանքը քեզ կոփում է, սովորեցնում, տարբեր փորձությունների միջով անցնելով, շատ հարցերի պատասխաններ ես վերանայում ու փորձում ես կյանքիդ մյուս մասն այլ կերպ ձևակերպել»,- ասաց դերասանուհին։

Աննան ընդգծեց, որ կանայք միշտ փորձում են իրենց հոգսերի, խնդիրների պատասխանները փնտրել տղամարդու մեջ, ակնկալում են, որ ինչ-որ մեկը պետք է ձեռք մեկնի իրենց: Աննան առաջարկում է գլխից ջնջել այդ միտքն ու հասկանալ, որ յուրաքանչյուր ոք միայն ինքը կարող է օգնել իրեն։

«Իրականում ոչ մի օգնություն անշահախնդիր չի լինում: Պետք է բոլորը հասկանան, որ իրենց լիարժեք կզգան, եթե ապրեն իրենց ուժերին համապատասխան, բավարարվեն իրենց վաստակով և դրա մեջ փնտրեն երջանկությունը»,- ասաց Աննան:

Դերասանուհու համար 2018 թվականը բեղմնավոր տարի է եղել, որի ընթացքում իրականացրել է իր երազանքը` ծնողների օգնությամբ և իր աշխատանքով սեփական բնակարան է ձեռք բերել:

Աննան շեշտեց, որ իր կյանքում գրանցած հաջողություններն ու անձնական երջանկությունը լրացնում և ամբողջական է դարձնում 12-ամյա դուստրը՝ Արփին: Մայրիկը նշեց, որ դուստրն իր համար բաց դաշտ է, նրան հինգ մատի նման գիտի: Նրա խոսքով` մինչև օրս չի եղել դեպք, որպեսզի աղջիկը որևէ բան անի առանց իր իմացության։

«Աղջկաս հետ որևէ կոնֆլիկտ չունեմ: Նա արդեն դեռահասության շրջանում է, բայց  իր հետաքրքրություններն իր տարիքին համապատասխան են: Իրականում ես որևէ հատուկ քայլեր չեմ անում Արփիին այս կամ այն բանը սովորեցնելու համար: Նա իմ աչքի առաջ է մեծանում և եթե նկատեմ մի բան, որն ինձ դուր չգա, կզրուցեմ իր հետ»,- ասաց դերասանուհին՝ հավելելով, որ դաստիարակության ընթացքում բարդություններն առաջ են գալիս, երբ սիրահարվելու կամ շրջապատի ազդեցության հարցերն են լինում:

Աննան նկատեց, որ երեխային միայնակ դաստիարակելն ավելի հեշտ է. դստեր համար ինքն աշխարհը բացահայտում է իր տեսանկյունից։ «Նման դեպքում խոչընդոտներ, կարծիքների բախումնեմ չեն լինում: Այսպես ավելի հեշտ է, քան անգամ, տատիկ-պապիկի կամ քեռի-հորեղբոր միջամտությամբ»,- ասաց դերասանուհին:

Լուսանկարները՝ Pro Image-ի

Զառա Ղազարյան