Մի նախագծում ժյուրի, մյուսում՝ մասնակից․ «փոքրիկ ղարաբաղցի» Միշան Ռուսաստանի «Ձայնը» նախագծի, Մելաձեի ընտրության և I like it-ի ժյուրի լինելու մասին

«Փոքրիկ ղարաբաղցի» Միշան ռուսական «Ձայնը» նախագծում ժյուրիին հիացրեց իր կատարմամբ և արժանացավ լավագույն գնահատականին։ Հետաքրքիր զուգադիպությամբ նույն ժամանակահատվածում «Արմենիա TV»-ի I like it նախագծում նա ներկայանում է որպես ժյուրի։

Tert.am Life-ը զրուցել է Միշայի և նրա պրոդյուսեր Լիրա Քոչարյանի հետ և հետաքրքիր բացահայտումներ արել։ 

10-ամյա Միշան «Ձայնը» նախագծում կատարեց Բրունո Մարսի Versace On The Floor երգը, չպտտվեց միայն երգչուհի Պելագեան, որը, սակայն, Վալերի Մելաձեի և Լոբոդայի գովասանքներից հետո ասաց՝ կներեք։ Միշային անվանեցին «պատրաստի արտիստ»։ 10-ամյա պատանին ժյուրիի կազմից ընտրեց Վալերի Մելաձեին։

Ժյուրիի պտտված երկու անդամներից Միշայի ընտրությունը կանգ առավ Վալերի Մելաձեի վրա․ «Մելաձեն ավելի մոտ է իմ երաժշտական ոճին։ Ինձ համար շատ հաճելի էր լսել ժյուրիի լավ խոսքերը։ Իմ կողքին ունենալով Լիրա Քոչարյանի նման պրոդյուսեր և մարդ՝ ես արդեն որպես պատրաստի արտիստ եմ բարձրացել բեմ»։

Միշան իր հետագա ելույթների վերաբերյալ փակագծերը չի բացում, բայց խոստանում է՝ թեժ է լինելու։ Թեժություն խոստացավ նաև նրա պրոդյուսերը՝ Լիրա Քոչարյանը, որը նշեց, որ օրական 10-15 երգի ձայնագրություն են անում և ուղարկում Միշայի մարզչին՝ Մելաձեին, որպեսզի կարողանան հաջորդ փուլի համար երգ ընտրել։

«Մեզ հաջողվեց զարմացնել ժյուրիին պրոֆեսիոնիալիզմի, խարիզմայի, անկեղծ ու ի սրտե կատարման շնորհիվ։ Իսկապես դժվար կլինի մյուս փուլերում, բայց միայն մեզ համար չէ, որ դժվար է լինելու։ Հիմա արդեն եզրափակչի երգի ընտրության փուլում ենք, մարզիչները նույնպես շատ լուրջ են վերաբերվում այդ հարցին՝ իրենք էլ հասկանալով, որ Միշան բազմաժանր կատարող է, լուրջ երգիչ և ընտրությունն իր դեպքում կատարվում է 50-ից ավելի երգերի մեջ։ Կարծում եմ՝ Մելաձեն Ռուսաստանում լավագույն երաժիշտներից է»,- ասաց Լիրան և ավելացրեց, որ համատեղ ուժերով կգտնեն երգ, որով կկարողանան զարմացնել և ուրախացնել հանդիսատեսին։

Միշան արդեն մասնակցել է «Եվրատեսիլ» և «Նոր ալիք» մրցույթներին։ Պրոդյուսերից հետաքրքրվեցինք՝ որքանո՞վ են այս նախագծերը նշաձող սահմանել մրցութային տեսանկյունից։ Լիրան նշեց, որ իրենք կանգ չեն առնելու և անկախ ձեռքբերումներից շարունակելու են մասնակցել տարբեր նախագծերի․ «Արտիստներն իրավունք չունեն իրենց կարիերայում որևէ պահ կանգ առնել՝ հատկապես, եթե խոսքը երեխա արտիստի մասին է և հատկապես, որ նա տղա է։ Քանի որ ձայնափոխման շրջանում տղաներն ուզած-չուզած մեկուկես-երկու տարի դադար են վերցնում, պետք է առավելագույնս ճիշտ օգտագործենք մեր ժամանակը։ Որոշեցի, որ պետք է Միշան դիմի ռուսական «Ձայնը» նախագծին, ունենք նաև մի քանի ծրագիր, եթե հաջողվի, «Ձայնից» հետո նա կներկայանա նաև այդ դրանց շրջանակում։ Չնայած Միշան դեռ 10 տարեկան է, բավականին պրոֆեսիոնալ է ու հուսով ենք, որ իր ելույթներով հաճույք կպատճառի հանդիսատեսին, իր հայրենակիցներին էլ կուրախացնի և՛ Հայաստանում, և՛ Արցախում, և՛ սփյուռքում»,- ասաց Լիրան՝ ավելացնելով, որ իրենք փորձում են օգտագործել հնարավոր բոլոր հարթակները։

Շարունակելով խոսել Միշայի մասնակցած նախագծերի մասին՝ պրոդյուսերն ավելացրեց, որ «Եվրատեսիլը» և «Ձայնը» իրարից շատ տարբեր են և մեկը մյուսին լրացնող. «Ինքս Միշային տվել եմ հարցը, թե ինչով են տարբերվում «Եվրատեսիլը», «Ձայնը» և «Նոր ալիք», նա պատասխանեց, որ կարծում է՝ «Ձայնը» նախագիծն ավելի մասշտաբային է։ Ես բան չեմ կարող ասել՝ երեխան այդպես է զգում:) Ինչ վերաբերվում է նշաձողին, յուրաքանչյուր մրցույթից հետո արտիստի առջև պետք է դրվի նոր խնդիր, նոր նպատակ՝ որպես մոտիվացիոն կետ։ Միայն դրա շնորհիվ է կատարողը զարգանում, մեծանում, աճում և այս նախագծի դեպքում, կարծում եմ, ֆորմատն այդքան էլ կարևոր չէ»։

Միշայի խոսքով՝ իր մասնակցությամբ երկու նախագծերից փորձում է քաղել առավելագույնը։ «Ես, որպես մասնակից, լսելով, ընդունելով «Ձայնը» նախագծի ժյուրիի անդամների կարծիքները, խորհուրդները, փորձում եմ դրանք կիրառել որպես ժյուրի։ Որպես ժյուրի՝ վերցնում եմ այն ամենը, ինչն իմ կարծիքով ինձ կօգնի արդեն որպես մասնակից, այսինքն՝ նկատի եմ ունենում, թե որ պահվածքը կարող է դուր գալ ժյուրիին,-ասաց Միշան ու ավելացրեց, որ ժյուրի լինելն իսկապես շատ բարդ է։ –Ժյուրի լինելու բարդությունն այն է, որ գրեթե բոլոր մասնակիցներն իմ տարիքին են, իմ պարտականությունն է գնահատել ու քննադատել նրանց։ Որպես մասնակից՝ բարդ է այնքանով, որ պետք է փորձեմ իմ պրոդյուսեր Լիրա Քոչարյանի խորհուրդներն առավելագույնս լավ կատարել»։

Լիրան էլ նշեց, որ  երկու նախագծերում կատարողի մասնակցությունն ունի շատ առավելություններ: «Շատ եմ սիրում և իսկապես հավանում եմ «Արմենիա» հեռուստաընկերության նախագծերը, աշխատակազմին և համագործակցելու առիթը բաց չեմ թողնում։ I like it նախագիծը ևս բացառություն չէ, միակ խոչընդոտը նկարահանումների գրաֆիկն է, բայց փորձում ենք հասցնել, մինչև հիմա հաջողվում է։ Ճիշտ է, արդյունքում Միշան շատ քիչ ժամանակ է ունենում հանգստի, խաղալու, դասերի և փորձերի համար, բայց, ինչ արած, դա է արտիստի կյանքը։ Ինչ վերաբերվում է հոգեբանական կողմին, կարծում եմ, այն օգնում է նրան և շատ լավ է, որ նույն ընթացքում երկու նախագծում է՝ որպես ժյուրի և որպես մասնակից։ Նա ունի հնարավորություն ունի զգալ, թե ինչը դուր կգա ժյուրիի կազմում ներգրավված արտիստին և կհասկանա, թե ինչպես պետք է անի, որպեսզի ժյուրին իրեն ձայն տա»,- ասաց Լիրա Քոչարյանը։

Զառա Ղազարյան