«Իմ բաց կերպարները կմնան սոցցանցերի իմ էջերում». Սյուզաննա Սեդրակյանը` նոր նախագծի, Արտավազդ Ամիրյանի հաղորդմանը նմանության և հայտնիների հետ հարաբերությունների մասին

Հայտնիներն իրենց մեկ օրվա անելիքները հեռուստադիտողներին կներկայացնեն «Հինգերորդ ալիք»-ի նոր «Day off Սյուզաննա Սեդրակյանի հետ» հաղորդաշարի շրջանակում։ Հաղորդավարուհին Tert.am Life-ին պատմել է նոր նախագծի մանրամասներն և խոսել Արտավազդ Ամիրյանի` «1 օրը 30 րոպեում» հաղորդմանը նմանության մասին։

«Հեռուստադիտողներին հասանելի չէ իրենց սիրելի հայտնիների առօրյան՝ ինչպես են սկսում նրանք իրենց օրը, ինչպես անցկացնում երեկոները: Մենք ներկայացնելու ենք այդ ամենը՝ կփորձենք հասանելի դարձնել այն, ինչն անհասանելի է։ Հեռուստադիտողը հնարավորություն կունենա ավելի խորը ճանաչելու իր սիրելի արտիստին, բացահայտելու նրան թե՛ լավ, թե՛ վատ կողմից»,- նշեց հաղորդավարուհին ու ավելացրեց, որ ամեն հաջորդ հյուրին ընտրում է տվյալ օրվա հերոսը։

Գայա Արզումանյանն առաջինն է վերցրել Day off՝ հեռուստադիտողին ներկայացնելով օրվա իր անելիքները։ «Գայան շատ պոզիտիվ մարդ է, ժամանակը նրա հետ հետաքրքիր է անցնում, վստահ եմ, հեռուստադիտողը նույնպես կվարակվի իր դրական էներգիայով: Կարևոր էր, որպեսզի առաջին հյուրը լիներ առանց կոմպլեքսների և աշխույժ մարդ։ Գայան հենց այն մարդն է, որն ունի հագեցած ու դրական Day off»,- ասաց Սյուզաննան:

Հաղորդավարուհու համար ամենազվարճալի դրվագը եղել է նախագծի շապիկի նկարահանումների ժամանակ, երբ բարձրացել էին կտուր. «Ես բարձրակրունկներով պետք է նկարահանվեի։ Կտուրի ծածկը չփչացնելու համար քայլում էի թիմի տղաների օգնությամբ: Նրանք ստիպված էին ստվարաթուղթ դնել ոտքերիս տակ, որպեսզի կարողանամ քայել: Նախագծի պրոդյուսերը կատակում էր, որ իմ ոտքերի տակ մարդիկ կարմիր գորգ են փռում, իրենք՝ ստվարաթուղթ»։

Բաց կերպարներով հայտնի Սյուզաննայի խոսքով` հեռուստադիտողն իրեն այս անգամ զուսպ կերպարով է տեսնելու։ «Իմ ընդգծված կերպարները կմնան իմ սոցցանցերի էջերում: Ներկայանալու եմ լիովին այլ կողմից, Day off-ը նման չէ իմ նախկին նախագծերին: Այստեղ ինքս հաշվի եմ առնելու ամեն դետալ, սա իմ սոցիալական էջերից մեկը չէ, հաղորդումը դիտելու են թե՛ մեծահասակները, թե՛ փոքրերը,– ասաց նա, իսկ դիտարկմանը, մտավախություն չունի՞, որ նոր կերպարը կարող է չընդունվել, պատասխանեց,– ոչ, քանի որ համարձակ կերպարը չի մնում պատմության մեջ, այն միշտ լինելու է ճիշտ տեղում, ճիշտ մատուցված: Յուրքանչյուր բան, ինչպես մատուցես, այնպես էլ կընդունվի և կսիրվի»։

Day off–ի կոնցեպտը հիշեցնում է տարիներ առաջ «ԱրմենԱկոբ» հեռուստաալիքով հեռարձակվող Արտավազդ Ամիրյանի «Մեկ օրը երեսուն րոպեում» հաղորդաշարը։ «Մենք հեռուստադիտողի դատին կհանձնենք «Day off Սյուզաննա Սեդրակյանի հետ» նախագիծը նոր ասելիքով: Ես նախագծի շրջանակում օրն անցկացնելու եմ աստղի հետ և մաքսիմալ մասնակից եմ դառնալու նրա օրվա անելիքներին, ոչ թե պարզապես հարցազրույց եմ վերցնելու նրանից, սակայն նախագծում կա նաև այդ հատվածը»,- մեկնաբանեց Սյուզաննան։

Հաշվի առնելով, որ «Մեկ օրը երեսուն րոպեում» հաղորդաշարը, ըստ էության, նույն բանն էր անում՝ հաղորդավարուհուց հետաքրքրվեցինք, թե ո՞րն է իրենց նոր ասելիքը և կոնկրետ ինչո՞վ է տարբերվելու․ «Նոր ասելիքը՝ գաղտնիք է ոչ միայն հեռուստադիտողի, այլև մեր հյուրերի համար: Մենք միշտ հայտնվելու ենք տարբեր վայրերում, չենք կանգնելու մի կետում, մեր հյուրերն են հայտվելու այնպիսի իրավիճակներում, որոնք իրենց Day off-ի պլաններից դուրս են: Միայն լայվ ֆորմատով չենք ներկայացնելու մեր հերոսներին: Կա առանձին հարցազրույցի հատված, որտեղ բացահայտում ենք հյուրի ներքին աշխարհը: Day off-ը հետաքրքիր է լինելու, այն սովորական ժամանցային հաղորդման կոնցեպտներից դուրս է»:

Թե որքանով է հետաքրքիր հայ հայտնիների առօրյան, հեռուստադիտողն արդեն հնարավորություն ունի բացահայտելու։ Ամեն ինչ իրական է լինելու՝ վստահեցրեց հաղորդավարուհին ու ավելացրեց, որ իրենց նախագծում բեմադրված ոչինչ չկա․ «Հայտնիների առօրյան միշտ է հետաքրքիր, ավելին, երբ հայտնիների առօրյայում կան այլ հայտնի մարդիկ՝ ավելի դիտարժան է»:

Նման հաղորդումների ձևաչափում կարևոր է նաև հյուրերի հետ ջերմ հարաբերություններ ունենալը: Սյուզաննայի խոսքով` գրեթե բոլորին անձամբ ճանաչում է, թե ում հետ է մտերիմ՝ չի բացահայտում։ «Ավելի մտերմիկ և անմիջական եթերներ են ստացվելու, ինչը հաստատ շատ ավելի հաճելի կլինի հեռուստադիտողի համար, երբ չլինի լարված շփում իմ և հյուրի միջև: Անուններ նշելիս միշտ մտածում եմ՝ հիմա մեկի անունը կնշեմ, մյուսինը` ոչ, ու էլի կասեն Սյուզին ինձ մոռացավ: Ես բոլորի հետ շատ լավ հարաբերությունների մեջ եմ ու այս պահին, չեմ հիշում թեկուզ մեկ մարդու անուն ում հետ մոտ չեմ: Կարծում եմ` հաղորդումները դիտելիս արդեն իսկ պարզ կլինի ում հետ էի ես ավելի մոտ, ում հետ` ոչ այդքան»,- ասաց հաղորդավարուհին։

Զառա Ղազարյան