«Բանակում»-ի դերասանները համախմբվել են ու «7 տարի անց» նոր նախագիծ ունեն

«Շանթ» հեռուստաընկերությամբ 2009-2014 թվականներին հեռարձակված «Բանակում», ապա «Քաղաքում» հեռուստասերիալներից հայտնի դարձած դերասանները համախմբվել են նոր նախագծի շուրջ ու հանդիսատեսին ներկայանալու են բեմադրությամբ։

Tert.am Life-ը զրուցել է դերասան Էմիլ Գալստյանի հետ, որի կերպարը` Համբարձումը, հեռուստասերիալի առանցքային դեմքերից էր և իր ընթերցողներին է պատմում նախագծի առաջին մանրամասները։

Դեռ 2011-2012 թվականներին «Բանակում» հեռուստասերիալի դերասաններից մի քանիսը փորձեցին հանդես գալ նաև ներկայացման ձևաչափով, սակայն նախագիծը երկար կյանք չունեցավ։ Տարիներ հետո հեռուստասերիալի շրջանակում ընկերներ դարձած դերասանները հանդիսատեսին կներկայացնեն «7 տարի անց» խորագրով բեմադրությունը։

Նրանք համագործակցել են «Բանակում» և «Քաղաքում» հեռուստասերիալների սցենարիստ Անդրանիկ Իսահակյանի հետ։ Նախագծում ընդգրկված են դերասաններ Էմիլ Գալստյանը, Արթուր Բարսեղյանը, Արմեն Զախարյանը, Վազգեն Ծատինյանը, Գևորգ Չուլյանը, Գոռ Մարտիրոսյանը և Վահե Պետրոսյանը։

Էմիլը հայտնեց, որ հանդիսատեսը բեմում հեռուստասերիալի հերոսներին չի տեսնի, իրենք ներկայանալու են  նույն կազմով, բայց նորովի․ «Այնքան ենք խաղացել «Բանակում»-ի հերոսներին, որ ցանկություն չունեինք նույն կերպարներով ինչ-որ բան անել։ Ներկայացումը կապ չունի  ոչ «Բանակում»-ի, ոչ էլ «Քաղաքում»-ի հետ։ Ասում ենք «7 տարի անց», բայց ոչ թե հեռուստասերիալի, այլ  հերոսներ համար, որովհետև նույն կազմով կլինենք։ Շատ հետաքրքիր նյութերով, քաղաքական թեմաներով համեմված ներկայացում է սպասվում»,- ասաց Էմիլը։

«7 տարի անց» ներկայացման թեման հիմնականում քաղաքականությունն է։ Նկատառմանը, որ վերջին շրջանում քաղաքական բովանդակությամբ հումորային ներկայացումներ շատ են եղել, թեմայի սպառման կամ կրկնության խնդիր չունե՞ն, Էմիլը պատասխանեց․ «Ամեն դերասան ունի իր մոտեցումը՝ թե՛ հումորի, թե՛ մատուցման, թե՛ գաղափարի, թե՛ խաղի առումով։ Չենք ուզում նմանվել քաղաքական ներկայացում արած որևէ դերասանի և չենք նմանվի։ Չենք վախեցել, որ դաշտում լիքը մարդիկ այսօր քաղաքական հումոր են անում։ Մեր ներկայացումը հաստատ տարբերվող է՝ շեշտը դրել ենք խաղարկայինի վրա։ Չենք մտածել` բոլորը քաղաքական հումոր են անում, մենք էլ անենք։ Քաղաքական հումորի տեսանկյունից յուրաքանչյուր մարդ ունի իր հայացքները, մերն ուրիշ է, լրիվ այլանդրադարձ ունենք այդ ամենին՝ ներառյալ վերջին շրջանի դեպքերը, հեղափոխությունը»։

Էմիլը հայտնեց, որ ներկայացման վրա աշխատում արդեն 2 ամիս։ Եթե Էմիլին «Քաղաքում»–ից հետո տեսել ենք «Քարե դարդ» սիթքոմում, ներկայացման մեջ ներգրավված մյուս բոլոր դերասանների զգալի մասի մոտ հեռուստատեսային դադար է եղել։

Հարցին` անհանգստություն կամ մտավախություն չունե՞ն, որ հանդիսատեսն իրենց մոռացած կլինի, Էմիլն արձագանքեց, որ ոչ, ավելին, ըստ նրա, իրենց պահանջարկը մինչ օրս էլ կա։ «Ընդհանրապես անհանգստություն չկա, որ մեզ մոռացած կլինեն։ Երկար ժամանակ է անցել, ինչ եթերում չենք, բայց մարդիկ թե՛ փողոցում, թե՛ սոցցանցերով պարբերաբար հարցնում են` ինչո՞ւ ենք կորել, ինչո՞ւ չկանք եթերում։ Կարող ենք ենթադրել, որ պահանջարկ կա, զգացվում է, որ լսարանի համար սպասված ենք։ Մոռացված լինելու կամ չընդունվելու մտավախություն չունենք»,- ասաց դերասանը` հավելելով, որ նույն կազմով ներկայանալը շատ ավելի կհետաքրքիր հանդիսատեսին։ Էմիլը նկատեց, որ իրենց մասնակցությամբ «Բանակում» և «Քաղաքում» հեռուստասերիալներից շատ հատվածներ մինչ օրս տարածվում են համացանցում։

Հարցին՝ նախագծից հետո այսքա՞նն են ընկերներ մնացել, թե՞ դերասանական կամզը հավաքվել է այլ սկզբունքով, Էմիլը պատասխանեց․ «Բոլորս մինչ օրս շատ լավ շփում ունենք։ Քանի որ ներկայացումն ավելի շատ հյուրախաղերով է լինելու, փորձել ենք և՛ սեղմ կազմով լինել, և՛ հաշվի ենք առել մյուս դերասանների զբաղածությունը։ Նրանցից մեկը երկրում չէ, մյուսը հագեցած գրաֆիկ ունի։ Ինչ վերաբերում է Հովհաննես Դավթյանին, նա սթենդ ափ ժանրի մեջ մոնո-ներկայացումներ է ունենում։ Ո՛չ մենք, ո՛չ ինքը չցանկացանք, որ նրա տարիներով ստեղծած աշխատանքը, կերպարը փոխվի։ Ինքն իր ժանրով է հանդես գալիս, մենք էլ որոշեցինք այս կազմով, այս ժանրով ներկայացնել մեր ասելիքը»։

Տղաները ներկայացումը խաղալու աշխարհագրությունը սկսելու են սահմանամերձ գոտիներից, հասնելու են մայրաքաղաք։ «7 տարի անց» բեմադրության պրեմիերան նախատեսել են ապրիլի 12-ին` Նոյեմբերյանի մշակույթի պալատի բեմում:

Զառա Ղազարյան