Արամեի և Սարոյի զուգերգի տեսահոլովակի մանրամասներն ու ընտանիքների ընկերությունը

Սարոն ու Արամեն զուգերգ ունեն, որի հիման վրա օրերս տեսահոլովակ են նկարահանել։ Նոր աշխատանքի առաջին մանրամասները նրանք վստահել են Tert.am Life–ին։ «Արի Հայաստան» երգի տեսահոլովակի ռեժիսորը Սյոմա Կոդաբաշյանն է։ Վերջինս նշեց, որ նոր տեսահոլովակն իր ձևաչափով նորություն կլինի և կսկսվի տղաների համացանցային ուղիղ միացմամբ։

Այս տեսահոլովակն անսպասելի էր հենց արտիստների համար, սակայն հասկացել են, որ երգն արժանի է ավելիերկար կյանք ունենալ։

«Փորձը ցույց է տալիս, որ տեսահոլովակ ունեցող երգերն ավելի լայն տարածում են գտնում։ Քանի որ այս երգը շատ գեղեցիկ էր, որոշեցինք տեսահոլովակով ներկայացնել լսարանին։ Արամեի նոր տեսահոլովակը վերջերս ենք ներկայացրել լսարանին։ Այսքան շուտ նոր աշխատանք ներկայացնել չէինք պատրաստվում, բայց որոշեցինք շեղվել մեր ծրագրերից, քանի որ երգն արժանի էր տեսահոլովակ ունենալ»,– ասաց Սյոման ու հավելեց, որ նոր երգի հեղինակը Վաչե Ավեյանն է։

Ռեժիսորը հայտնեց, որ տեսահոլովակում ներկայացնում են Հայաստանի տեսարժան վայրերը։ Տղաների համար սա լավ առիթ էր ռուսաստանյան շրջագայությանն ընդառաջ վայելելու Հայաստանի գեղեցկությունը։ Սյուժետային գիծ, որպես այդպիսին, չկա. երգիչները մեքենայով ճանապարհ են ընկնում ու հայտնվում Հայաստանի գեղատեսիլ վայրերում։

Առաջիկայում Սարոն և Արամեն կմեկնեն շրջագայության և 22 համերգ կունենան Ռուսաստանի տարբեր քաղաքներում։ Սյոման նշեց, որ համատեղ համերգների մեկնարկը տվել են Գյումրիում, եղել են տարբեր մարզերում, հաջորդ կանգառը Ռուսաստանն է։ Երգիչները նոր ծրագիր են կազմել երկրպագուների համար, հիթերի կողքին կներկայացնեն նոր ստեղծագործություններ։

Մենեջերը նկատեց, որ 5 տարի է` Արամեն պարբերաբար մեկնում է համերգային շրջագայությունների։ Նախորդ երկու տարում շրջագայություններն իրականացրել են Սիլվա Հակոբյանի հետ, հիմա` Սարոյի։ Նա հիշեց, որ շրջագայությունները հոգնեցուցիչ են, սակայն սովորել են այդ գրաֆիկին։

«Մենք արդեն փորձված ենք։ Շրջագայությունները հաճախ լարված են անցնում, քանի որ մենք քնելու ժամանակ պրակտիկորեն չենք ունենում, հաճախ հանգստի համար նախատեսված ժամանակն անցնում է ճանապարհների վրա, լինում են անհաջողություններ` կարող է մեքենան փչանալ կամ այլ բան լինել, բայց սովորել ենք այդ ամենին թեթև նայել»,– ասաց Սյոման։

Շոու բիզնեսում հաճախ արտիստների ընկերությունը պայմանավորված է լինում տվյալ փուլում համատեղ աշխատանքով։ Ըստ Սյոմայի` Արամեին ու Սարոյին համատեղ համերգների շարքը չէ, որ միավորել է։ «Նրանք վաղուց են ընկերություն անում, ընդ որում` ընտանիքներով։ Վստահ եմ` համագործակցությունը միայն կջերմացնի հարաբերությունները։ Սիլվա Հակոբյանի հետ էլ այս պահին չենք համագործակցում, բայց նախկինի պես ջերմ հարաբերություններ ունենք»,– ասաց Սյոման։