«Մտածում էի` վերջ, չեմ անցնի». Տյոմը` Հայաստանը «Նոր ալիքում» ներկայացնելու և Իգոր Կրուտոյի արձագանքի մասին

X Factor-ում նա 5-րդն էր, «Դեպի Եվրատեսիլ» նախագծում փորձեց ուժերը Հայաստանը «Եվրատեսիլում» ներկայացնելու համար, սակայն  չստացվեց, իսկ ահա «Նոր ալիք» միջազգային մրցույթին հայտ ներկայացնելու ցանկություն, անգամ, չուներ։ Երգչուհի Սյուզաննա Մելքոնյանի հորդորով վերջին պահին ուղարկված հայտը, սակայն, ճակատագրական դարձավ Արտյոմ Հակոբյանի` Տյոմի համար։ Նախընտրական փուլից հետո Հայաստան վերադարձած երգիչն առաջինը Tert.am Life-ին է պատմել, թե ինչ եղավ «Նոր ալիքում» ու ինչպես ստացվեց մասնակցությունը։

«Հուզմունքից չոքերս թուլացել էին». սա առաջին արձագանքն է, որ տվեց Տյոմը` մտաբերելով ելույթը, ապա նկատեց, որ կողքից դա չեն նկատել, բայց ինքը հուզմունքից դողում էր ամբողջ ելույթի ընթացքում։ Նախնական լսումներին, որոնց ընթացքում «Նոր ալիքի» ժյուրին ընտրում է երկրների ներկայացուցիչներին, Հայաստանից եղել է 10 դիմորդ։

«Որպես կանոն` նախնական լսումների առաջին օրը երկրից ընտրում են 4 մասնակցի, երկրորդ օրը ևս մեկ անգամ լսում են նրանց ու ընտրում երկրի ներկայացուցչին։ Այս տարի առաջին օրը միայն ինձ ընտրեցին, ինչը շատ պարտավորեցնող էր։ Եթե երկրորդ լսումներին վատ ներկայանայի, Հայաստանն այս տարի ներկայացուցիչ չէր ունենա «Նոր ալիքում»։ Այդ պատասխանատվությունից ավելի էի հուզվում»,– պատմեց Տյոմն ու ասաց, որ ժյուրին չի մեկնաբանում ելույթը, դժվար է հասկանալ` ինչ կարծիք ունեն ելույթի մասին և, ըստ այդմ, կանխատեսումներ անել։

Առաջին լսումներին երգիչը ներկայացրել է միջազգային հիթ և հեղինակային երգ։ Երկրորդ լսումներին ներկայացրել է նաև երկրի հիթ։ «Ասացի, որ կերգեմ «Երազ իմ հայրենի» երգը։ Հարցրեցին` դա ինչ երգ է, պատասխանեցի, որ մեր բանակի հիմնն է։ Այդ պահին Իգոր Կրուտոյն ասաց` մեզ քաղաքականություն պե՞տք է։ Երկու տող թողեցին երգել ու մտածում էի` վերջ, չեմ անցնի։ Ուրախությանս չափ չկար, երբ անցած մասնակիցների մեջ լսեցի իմ անունը։ Ես մեն–մենակ գնացի մրցույթին մասնակցելու ու հաստատ կարող եմ ամեն ինչ արդար էր»,– պատմեց Տյոմը։

Մրցույթի մասնակցության հայտը Տյոմը վերջին պահին է ուղարկել։ Նա շնորհակալություն հայտնեց «Նոր ալիք 2017»–ին երկրորդ տեղը զբաղեցրած Սյուզաննա Մելքոնյանին, որն իրեն ստիպել է հայտ ուղարկել մրցույթին։ «Սյուզաննայի հետ պատրաստվում էինք իր ակումբային համերգին զուգերգ կատարելուն, երբ ասաց, որ հայտ ուղարկեմ «Նոր ալիքին»։ Ասացի, որ չեմ ուզում, բայց ինքը վստահ էր, որ մասնակցության դեպքում ինձ կընտրեն։ Կարելի է ասել, «ստիպեց», որ հավատամ ու վերջին պահին մասնակցության հայտ ուղարկեցի»,– պատմեց Տյոմը։

Հիմա երգիչը ոգևորությամբ պատրաստվում է մրցույթին։ «Նոր ալիքն» այս տարի նվիրված է լինելու Ալլա Պուգաչովայի 70–ամյակին։ Երգչի խոսքով` քննարկվում է ձևաչափը լիովին փոխելու հարցը, սակայն փոփոխությունները կհաստատվեն մայիսին, մինչև այդ, որպես մասնակից, շատ անելիք ունի, բայց դրանց մասին խոսելու իրավասություն առայժմ չունի։