«Առաջին ալիքը» կստուգի քվեարկության արդարացիությունը, մարզիչը` Լոբոդան, չի շնորհավորել Ալսուի դստերը. «Ձայնը. երեխաներ» նախագծի շուրջ սկանդալը չի հանդարտվում

12:26 • 27.04.19

Շոուբիզնես

Համացանցում գիշերվանից բուռն քննրակվում է մանկական «Ռուսաստանի ձայնը» հեռուստանախագծի վեցերորդ եթերաշրջանում երգչուհի Ալսուի 10-ամյա դստեր՝ Միկելլա Աբրամովայի հաղթանակը: Մեկնաբանություններում նրա հաղթանակը «վաճառված» են անվանել, ելույթները՝ խայտառակություն:

РБК–ն գրում է, որ իր աղբյուրների համաձայն` Ռուսաստանի առաջին ալիքը կստուգի քվեարկությունը, քանի որ նկատելի է եղել մի մասնակցի օգտին ձայների անոմալ հոսք։

Առաջին ալիքի հասարակայնության հետ կապերի բաժնից այս տեղեկությունը չեն մեկնաբանել, միաժամանակ, չեն հերքել այն։ Մեկնաբանություններ չեն տվել նաև նախագծի մարզիչները` Վալերի Մելաձեն, Լոբոդան և Պելագեան։

Հատկանշական է Միկելլայի թիմի ղեկավարի` Լոբոդայի արձագանքը. եզրափակչից հետո Լոբոդան Ինստագրամի իր էջում տեղադրել է իր թիմի 2 մյուս անդամների` Ռոբերտ Բագրատյանի և Նինո Չեսների լուսանկարները և ոչ մի լուսանկար հաղթող Միկելլա Աբրամովայից։

Հայ տղայի` Ռոբերտի ելույթից հետո էլ Լոբոդան ասել էր. «Նայում եմ ու հասկանում, որ նա սուպերաստղ է»։ Թեև Լոբոդան բավականին ակտիվ է սոցցանցերում, իր էջում նույնիսկ չի շնորհավորել Ալսուի դստերը։

Նշենք, որ նախագծի հաղթողը որոշվել է հեռուստադիտողների քվեարկությամբ։ Հայ մասնակիցները՝ Վալերի Մելաձեի թիմից «փոքրիկ ղարաբաղցի» Միշան և Լոբոդայի թիմից Ռոբերտ Բագրատյանն էլ սուպեր եզրափակչից դուրս մնացին հանդիսատեսի քվեարկության արդյունքում:

Համացանցի օգտատերերը կասկածի տակ են դրել հաղթանակի արդարացիությունը։ Հեռուստադիտողները մեկնաբանություններ են թողել YouTube-ում տեղադրված տեսագրությունների տակ:

«Սիրտս ցավում է մյուս երեխաների համար: Հերթական անգամ հաղթեց գումարը»,- գրել է օգտատերերից մեկը:

«Խայտառակությո՛ւն, դեռ երբեք մանկական «Ձայն»-ում այսպես չէր հաղթել գումարը»,- գրել է մեկ այլ օգտատեր:

«Ուզում ես ուղղակի հայհոյել: Ինչպե՞ս կարելի է տաղանդավոր երեխաներից գողանալ հաղթանակը»,- գրել է մեկ ուրիշը:

Մի օգտատեր էլ գրել է. «Այսօր Ալսուի ընտանիքը գնեց «Ձայնը. երեխաներ» հեռուստանախագծի հուղարկավորությունը»: