«Ֆինանս խնայելու խնդիր չենք ունեցել». Արա Բաղդասարյանը՝ Հայաստանում Տիմատիի նկարահանած տեսահոլովակի ու բյուջեի մասին

Այսօր կայացավ Տիմատիի և Նազիմայի «Нельзя» երգի տեսահոլովակի պրեմիերան, որի նկարահանումները կայացել են Հայաստանում։ Տեսահոլովակի ռեժիսորն ու օպերատորը` Զաուր Զասեևն ու Պյոտր Բրատերսկին, Տիմատիի թիմից էին, թիմի մյուս անդամները հայեր էին։ Տիմատին համագործակցել է հայկական Film Factory ընկերության հետ, որի պրոդյուսեր Արա Բաղդասարյանը Tert.am Life-ին մանրամասներ է պատմել և լուսանկարներ տրամադրել նկարահանման հրապարակից։

«Հիմնականում շեշտը դրել ենք Հայաստանի տեսարժան վայրերում նկարահանումներ իրականացնելու վրա, քանի որ սա հրաշալի հնարավորություն էր մի քանի տասնյակ կամ հարյուր միլիոն մարդու մի քանի րոպեում ներկայացնել  Հայաստանը։ Ի սկզբանե, իրենք ներկայացրել են սցենար, որին համապատասխան տեղեր պետք է ընտրեինք, սակայն մենք էլ մեր միջամտությունն ենք ունեցել։ Օրինակ` սցենարում գրված  Նազիմայի ու Տիմատիի տան համար պետք էր ուղղակի  ընտրել գեղեցիկ տուն, սակայն մենք ընտրեցինք այնպիսի տեղ, որ կարողանանք նաև Սևանը ցույց տալ»,– ասաց Արան։

Տիմատին համարվում է ռուսական շոու բիզնեսի ամենապահանջկոտ արտիստներից մեկը։ Արան հայտնեց, որ ստեղծագործական քննարկումները հիմնականում ռեժիսորի հետ են եղել, սակայն ռեփերն էլ իր մասնակցությունն է ունեցել քննարկումներում։ «Մի հրաշալի անձնավորություն էր»,– ծիծաղելով Տիմատիին բնորոշեց Արան ու շեշտեց, որ նրա հետ որևէ բարդություն չեն ունեցել։

Տեսահոլովակը նկարահանվել է 4 օրում։ 3 նկարահանման օրն անցել  է Տիմատիի մասնակցությամբ, 1 օրը նկարահանվել են միայն Նազիմայի տեսարաները։ Նկարահանումները բավականին մասշտաբային էին, ինչը ենթադրում է նաև մեծ բյուջե։

«Բյուջեն բավականին մեծ էր, սակայն կոմերցիոն տեսանկյունից սխալ կլինի թիվ հնչեցնել։ Ես իրավասու չեմ բյուջե նշել, սակայն կարող եմ ասել, որ ֆինանսական խնդիր չի եղել։ Եթե այլ դեպքերում խնայելու խնդիր կա, այս դեպքում նման հարց չի առաջացել, առաջին պլանում եղել է որակը»,– շեշտեց Արան, ապա հավելեց, որ իրենց թիմն ի սկզբանե մի նպատակ ուներ նախագծի հիմքում տեսնել ոչ թե բիզնեսը, այլ այն, որ սա բացառիկ հնարավորություն է մեծ լսարանի ներկայացնելու Հայաստանը։ «Եթե առաջին պլան ես մղում ոչ թե գումարը, այլ գաղափար, որակական արդյունքն այլ է լինում»,– շեշտեց նա։

Տեսահոլովակում նկարահանվել են Լևոն Հարությունյանը, Գևորգ Գրիգորյանը, Արտաշես Ալեքսանյանը և այլք։ Պրոդյուսերը հայտնեց, որ հայ դերասանների նախնական ընտրությունն իրենք են արել, վերջնական հաստատումն արել է Տիմատիի թիմը, քանի որ բեմադրող ռեժիսորն իրենց կողմից էր։

Նկարահանումներից հետաքրքիր դրվագներ առանձնացնել Արան դժվարացավ, միայն նշեց Տիմատիի անվտանգության հարցը։ «Մենք գործ ունեինք մեծ պահանջարկ ունեցող մարդու հետ, մի քիչ անվտանգության առումով էր բարդ, որովհետև, օրինակ, Թումանյան փողոցում նկարահանումների ժամանակ անցորդներն իմանում էին, որ Տիմատին է նկարահանվում, ուզում էին մոտենալ իրեն։ Բարդանում էր իր անվտանգության աշխատակիցների գործը»,– ասաց Արան։

Ինչ վերաբերում է նկարահանումների ժամանակ առաջ եկած խոչընդոտներին` նա ասաց. «Ընթացիկ խնդիրներ եղել են, սակայն մենք տրամադրել էինք շատ պրոֆեսիոնալ նկարահանող կազմ, իրենց ստեղծագործական կազմն էլ շատ պրոֆեսիոնալ էր, ինչի արդյունքում ցանկացած խնդիր արագ լուծվում էր։ Բավականին տպավորված ենք։ Շատ եմ կարևորում համագործակցությունն այլ երկրների ներկայացուցիչների հետ, որովհետև կան բաներ, որոնք մենք ենք սովորում իրենցից, հուրախություն մեզ, կան բաներ, որ իրենք են սովորում մեզնից»։

Արայի խոսքով` համագործակցության առաջարկը եղել է Տիմատիի թիմի կողմից։ Սա իրենց առաջին համագործակցությունն էր արտերկրի շուկայի հետ, սակայն սկսում են համագործակցությունների շարք արտերկրի շուկայի գործընկերների հետ և այս տարի խոստանում են այլ նորություններ ևս։