«Ցանկանում, որ հեռուստադիտողն էլ իմանա՝ սա իմ առաջին փորձն է»․ «Անհասցե ծնվածները» սերիալի գլխավոր դերասան Թելման Խաչատրյանն իր կերպարի ու առաջին փորձի դժվարությունների մասին

Դիանա Գրիգորյանի նոր՝ «Անհասցե ծնվածները» հեռուստասերիալի գլխավոր հերոսը հեռուստադիտողներից շատերին հայտնի է որպես հաղորդավար։ Թելման Խաչատրյանը, որը սերիալում մարմնավորում է Լեոյի կերպարը, նախկինում աշխատել է «Արմնյուզ» հեռուստաընկերության առավոտյան ծրագրում։

Tert.am Life-ը դերասանի հետ զրուցել է որպես դերասան հանդես գալու առաջին փորձի, անսպասելիորեն գլխավոր դերը ստանձնելու և կերպարի մասին։

«Չնայած մասնագիտությամբ դերասան եմ, սակայն հեռուստասերիալում նկարահանվում եմ առաջին անգամ և միանգամից գլխավոր դերում։ Մասնակցելով քասթինգներին, անգամ չգիտեի, որ իմ թեկնածությունը դիտարկում են գլխավոր կերպարի համար։  Երբ իմացա՝ շատ էի ոգևորվել ու, անկեղծ, շոկի մեջ էի։ Դեռ քասթինգների շրջանից տպավորված էի Դիանա Գրիգորյանով, որովհետև բավականին մանրակրկիտ էինք աշխատում անգամ փորձերի ընթացքում։ Իրականում եշատ քասթինքների եմ մասնակցել, բայց միշտ ինչ-որ խանգարող հանգամանքներ են եղել ու չեմ համաձայնել նկարահանվել, բայց սա այդ դեպքը չէր»,- ասաց դերասանը։

Նախկինում տարբեր քասթինգների մասնակցած դերասանը կարծում է՝ այս անգամ իր մոտ հաջողվեց համոզել, որ ինքը ոչ միայն կարող է կերտել ուղղակի կերպար, այլև ստանձել գլխավոր դերը։

«Հիմա ինձ վստահել են ու ամեն ինչ պետք է անեմ, որ արդարացնեմ սպասումներն ու վստահությունը։  Հեռուստատեսությունում նոր չեմ, բայց  սա ինձ համար նորություն է՝ պատասխանատվությունն անհամեմատ ավելի մեծ է, առաջին անգամ և գլխավոր կերպար, լարվածությունն էլ է շատ։ Չնայած թե՛ հաղորդավարի, թե՛ սերյալի դերասանի դեպքում, աշխատում ենք տեսախցիկի հետ, բայց դրանք բոլորովին տարբեր են։ Հաղորդավարը կերպար ստեղծելու խնդիր չունի, հեռուստադիտողի հետ անմիջական կապի մեջ է, իսկ  դերասանի աշխատանքը տեսախցիկի հետ՝ այլ է, և այդ դեպքում տեսախցիկը բացարձակ պետք չէ նկատել։ Կարևոր է, թե ինչպես ես զգում խաղընկերոջդ»,- ասաց դերասանն ավելացնելով, որ ժամանակի հետ փորձն ու վստահությունը կգան։

Առաջին անգամ գլխավոր դերով հանդես գալու բարդությունների մասին խոսելիս՝ Թելմանը կարևորեց իր հետ աշխատող թիմին։ Դերասանի խոսքով նրանք իրեն շատ են օգնում։ 

«Չեմ ցանկանա ամեն ինչ այնպես ներկայացնել, որ հետո լինեն մեծ սպասումներ, բայց չկարողանամ հեռուստադիտողներին գոհացնել, դրա համար ամեն ինչ ընթացքում կերևա։ Ցանկանում, որ հեռուստադիտողն էլ իմանա՝ սա իմ առաջին փորձն է և գոնե նախնական շրջանում խիստ չդատի։ Իհարկե նաև ուզում եմ ընդգծել, որ դա արդարացում չէ, եթե չկարողանամ գոհացնել։ Բայց ինձ հետ նույն նկարահանման հրապարակում խաղում են մարդիկ, որոնցից չսովորելն անհնար է։  Թիմը շատ-շատ է օգնում։  Աշոտ Ղազարյանը ֆիլմում իմ հոր կերպարն է մարմնավորում ու նման պրոֆեսիոնալ մարդու կողքին աշխատելն ինձ համար աննկարագրելի հաճելի է։ Շատ այլ փորձառու դերասաններ կան, որոնց կողքին խաղալով ես ամեն րոպե, ամեն վայրկյան սովորում եմ»,- ասաց Թելմանը։  

Թե ինչպես է կերտել Լեոյի կերպարը՝ Թելմանը նշեց, որ վերջնական արդյունք առայժմ չկա, սակայն ամեն ինչ անում է հասկանալու, թե ինչ տեսակ է իր կերտած կերպարը։  

«Դերիս վրա բավականին երկար եմ աշխատել, վիդեոփորձերը մի քանի անգամ են եղել և Դիանա Գրիգորյանի հետ մենք շատ տարբեր տեսանկյուններից քննարկել ենք կերպարը՝ ինքն ամբողջությամբ ներկայացրել է իր պատկերացումները, ես՝ իմը։ Հեռուստասերիալի ընթացքում է կերպարն ամբողջությամբ ձևավորվում, որովհետև սցենարն ամբողջությամբ չենք ունենում։ Եվ ինքդ էլ քո կերպարին ամբողջական հասկանում ու ստեղծում ես, երբ գոնե մի քանի ամիս խաղում ես։ Ներկայումս ինձ մոտ հասկանալու այդ շրջանն է, երբ փորձում եմ իմ կերպարին ընկալել ամբողջությամբ»,- նշեց դերասանը։

Թելմանի խոսքով դերի վրա աշխատելիս ինքը փորձում է Լեոյի և իր մեջ նմանություններ գտնել։ Ըստ դերասանի, առաջինն այն է, որ թե իր կերպարն է մասնագիտությամբ դերասան և թե ինքը։  

«Անկեղծ կասեմ, կերպարիս դեռ ամբողջությամբ չեմ գտել, որովհետև սցենարային զարգացումներն ինձ համար նունպես անակնկալ են։ Չեմ ցանկանա հիմա ինչ-որ բնորոշումներով ինձ դնել շրջանակիր մեջ, որ հետո  չկարողանամ զարգացումները ճիշտ տանել։ Շատ հետաքրքիր բնմավորությամբ կերպար է։ Լեոն բարի է, բայց նաև պայքարող ու չվախեցող տեսակ է։ Այս ամենի հետ մեկտեղ պետք չէ մոռանալ, որ նա դերասան է՝ արվեստագետի հոգով։ Բնավորության գծերի հետաքրքիր համադրություն է, որը պետք է փորձեմ հնարավորինս լավ տեղ հասցնել»։