Գայա Արզումանյանի ոճաբանը վստահ է՝ «մենք վատ բան չենք արել», իսկ բնապահպանական կայքի խմբագիրը որակում է՝ «նման քաղքենի իրավիճակ չէի պատկերացնում»․ մեկնաբանում են կողմերը

Երգչուհի Գայա Արզումանյանը «Շանթ» Հ/Ը հեռարձակվող «Հումորի լիգա» նախագծում ժյուրիի հիմնական անդամներից է։ Վերջինս նախագծի բոլոր եթերներին ներկայացել է տարբեր կենդանիների հետ՝ կոկորդիլոս, օձ, կատու, հավ, ճուտ, ներկված մազերով շուն։ Չնայած նախագիծն արդեն ավարտվում է, ամեն դեպքում, կենդանասերներն անդրադարձել են Գայայի և նրա ոճաբան-պրոդյուսեր Արայիկ Գաբաջյանի այս մտահղացմանը։ 

Ավելի վաղ Econews.am բնապահպանական կայքում «Կենդանասերները ռեկվիզիտներ չեն․ դաժանություն և ծաղրանք՝ հեռուստատեսությամբ» խորագրի ներքո հրապարակվել էր հոդված, որտեղ այդ երևույթի մասին մասնագիտական տեսակետ է հայտնել ԱՄՆ-ում գործող «Armenian environmental network»-ի տնօրեն Սեդա Օզբերյանը։ Հոդվածը կենդանասերների կողմից արագորեն տարածվել է համացանցում։

Tert.am Life-ը կողմերի հետ զրուցել է․ Արայիկ Գաբաջյանը վստահեցնում է՝ իրենք ոչ մի վատ բան չեն արել, այն դեպքում, երբ Econews բնապահպանական կայքի խմբագիր Մարիամ Տաշչյանն այդ ամենը որակում է, որպես «քաղքենի» և «դաժան վերաբերմունք դեպի կենդանիները»։

«Կենդանիները մեզ համար ռեկվիզիտ չեն․ մենք ցանկություն ենք ունեցել հետաքրքրացնել Գայայի մուտքն ու կերպարները։ Դեռ առաջին հաղորդմանը Գայան կատվի հետ էր, ինչից հետո «Հումորի լիգայի» թիմերից մեկը նվիրեց հավ և դա դարձավ պատճառ, որ ամեն հաղորդմանը նա ներկայանա մի կենդանու ուղեկցությամբ։ Կենդանիներ կան, որոնց ընդամենը 15 րոպե ենք պահել մեզ մոտ և հասկացել ենք, որ կենդանին այդքան չի կարող դիմանալ»,- ասաց մտահղացման հեղինակը՝ Արայիկը։

Չնայած Արայիկի այն պնդմանը, որ իրենք նախապես շփվում են կենդանիների հետ, կերակրում նրանց,  Մարիամ Տաշչյանն ասաց․ «Մենք և մյուս բոլոր կենդանապաշտպան, կենդանասեր հասարակությունը միանշանակ դեմ ենք նման միջոցով կենդանիներին «օգտագործելուն», որովհետև մինչ այնտեղ հասնելը կենդանիներն անցնում են շատ դաժան  ճանապարհ, ընտելացվում են, հանգիստ պահելու համար դեղորայքներ են  ներարկում։ Եթե վայրի կենդանին  գտնվում է նման պայմաններում, նա  անցնում է շատ վատ պայմաններով և մենք, որպես  քաղաքակիրթ երկիր, չպետք է  նման մոտեցում ցուցաբերենք կենդանիներին։ Ես չեմ կարող ասել, թե իրենց ինչպես են բացատրել կենդանիներ հետ վարվելու կարգը»։

Արայիկ Գաբաջյանն ընդգծեց՝ իրենք ընտրում են կենդանիներ, խորհրդակցում տերերի հետ՝ պարզելով, թե կենդանին կարո՞ղ է եթերում մնալ, որպեսզի, ըստ ոճաբան-պրոդյուսերի, չտանջեն կենդանիներին։

«Ցանկություն ունեինք կորյունի հետ եթեր մտնել՝ առյուծի ձագի, սակայն մեզ ասացին, որ նա լույսերից վախենում է և մենք որոշեցինք այդ մտքից հրաժարվել։ Իրականում Գայան շատ է սիրում կենդանիներ։ Մենք այդ ամեն ինչին տիրապետում ենք և կենդանիներն էլ վերցնում ենք մարդկանցից, որոնք գրեթե ամեն օր նրանց հետ բեմին են լինում։ Եթե նույն տրամաբանությամբ շարժվենք, ապա կրկեսային համարներն էլ պետք է չլինեն։ Ավանակ էլ ենք ունեցել, բայց, ցավոք, կենդանին հրաժարվեց բեմ դուրս գալ և մուտքը եղավ թռչունի հետ»,- ասաց Արայիկը։

Մարիամ Թաշչյանի խոսքով իրենք դեմ են հենց երևույթին, երբ կենդանին մարդու համար վերածվում է զվարճանքի առարկայի։

«Այդ կենդանիներն, ամենայն հավանականությամբ, ծնվել են անազատության մեջ և վարժեցրած են, բայց մենք հենց  դրան ենք դեմ։ Այսինքն, կենդանուն, որպես զվարճանքի միջոց օգտագործելն առհասարակ քաղաքակիրթ աշխարհում ընդունված  տարբերակ չէ և մեր երկրում ևս, կարծում եմ, պետք է նման կերպ չվերաբերվեն կենդանիներին, առավել ևս, այդ հաղորդաշարի ընթացքում, այդ երգչուհու և այդ ոճաբանի կողմից։ Ինքս հեռուստացույց չեմ նայում, երբ տեղեկացա, իսկապես զարմացել էի, որովհետև մեզ մոտ նման բաներ վաղուց չէր նկատվում և նման քաղքենի իրավիճակում չէի պատկերացնում։ Ակնհայտ է, որ կենդանին դառնում է ծաղրանքի առարկա մարդկանց կողմից, իսկ դա անընդունելի է»,- նշեց Մարիամը։

Արայիկ Գաբաջյանն ասաց՝ կենդանիներին վերցնում են տարբեր կազմակերպություններից ու մարդկանցից՝ այդ թվում աճպարարներ, կրկեսային տարբեր համարներ պատրաստողներ։ «Նրանք բոլորը վարժեցված են՝ ոչենք կարող ուղղակի վերցնել կենդանուն և բերել, որովհետև լույսերի տակ երկար մնալու խնդիր էլ կա։ Նրանք հաղորդմանը լինում են ընդամենը 15 րոպե՝ ոչ ավել։ Պահում ենք ու հանձնում տիրոջը։ Դեպքեր են եղել, որ կենդանիների տերերն ասել են՝ հանգիստ կարող եք հանել բեմ, պահել որքան պետք է, բայց երբ ասվել է, որ չի մնա կամ կվախենա՝ մենք չենք հանել։ Ի՞նչ է նշանակում ռեկվիզիտ՝ ռեկվիզիտ լիներ կատվի  գլխով աքսեսուար կսարքեինք, կկրեր, կբարձրանար բեմ»,- ասաց Արայիկը։

Մարիամ Թաշչյանը հիշեցրեց՝ այս ընթացքում էլ Ազգային ժողովում քննարկումներ են ընթանում «Կենդանու նկատմամբ պատասխանատու վերաբերմունքի մասին» օրենք ունենալու հետ կապված․ «Տարածաշրջանում մենք միակ երկիրն ենք, որ չունենք նման օրենք։ Օրենքում նախատեսվում է նաև ընդունել առաձին հոդվածներ, որտեղ անդրադարձ կլինի նաև կենդանուն որպես զվարճանքի միջոց օգտագործելու հարցին։ Եվ այդ ամենը շուտով կկանոնակարգվի արդեն օրենքով»։

Հարցին թե այս աղմուկից հետո Արայիկն ու Գայան կշարունակեի՞ն կրկին ներկայանալ կենդանիների հետ՝ Արայիկն արձագանքեց․ «Ցավոք հաղորդումն արդեն ավարտվում է և հիմա պատրաստվում ենք վերջին եթերին, այլապես, իհարկե կշարունակեինք, որովհետև դա շոու է, իսկ շոուներին պետք է ներկայանալ համապատասխան կերպով։ Մյուս եթերաշրջանում, եթե լինենք հյուր, ապա մեծ սիրով կշարունակենք մեր շոուն։ Կարծում եմ վատ բան չենք արել։ Կան կենդանիների հանդեպ հիվանդագին սիրով տառապող մարդիկ, որոնք արձագանքում են և մենք ընդունում ենք դա»,- ամփոփեց իր խոսքը Արայիկ Գաբաջյանը։