«Մեր շոու բիզնեսում ամեն ինչ շատ սխալ ուղղությամբ գնաց». «Մեծ Հայքի» Նարեկը՝ նոր աշխատանքների ու եկամտաբերության մասին

Ռեփեր Նարեկը վերջին մեկ ամսվա կտրվածքով իր լսարանին  երկու տեսահոլովակ է ներկայացրել: Եվս երկու աշխատանք հասանելի կլինի շուտով: Tert.am Life-ը Նարեկի հետ զրուցել է ոչ միայն վերջինիս նորությունների, այլև երիտասարդ ռեփերիների պասիվության, ոլորտի եկամտաբեր լինել-չլինելու մասին:

«Գրեթե միշտ փորձում եմ պահել աշխատանքային ակտիվությունը: Ամեն ամիս էլ փորձում եմ ինչ-որ նոր աշխատանքով ներկայանալ: Երկու նոր աշխատանք մոնտաժային փուլում է, համագործակցություններ են  այլ արտիստների հետ, մեկը մեր երգչի հետ է, մյուսը` DJ-ի: Առայժմ շատ չեմ մանրամասնի, բայց ամառային ստեղծագործություններ են»,- ասաց Նարեկը՝ շարունակելով, որ ինքն աշխատում է այն մարդկանց հետ, որոնց հետ ընդհանուր գաղափարներ ունեն:

Երիտասարդ հայ ռեփերների անունները վերջին շրջանում այնքան էլ չեն շրջանառվում: Նարեկի կարծիքով՝  հայերենը ռեփի համար «հարմար» լեզու է, սակայն ոլորտը եկամտաբեր չէ. «Որքան հին է լեզուն, այնքան բառապաշարը լայն է, բառերը շատ են և ավելի հեշտ է հետաքրքիր լուծումներով տեքստեր գրել: Այսինքն՝ դա պատճառ չէ, որ հայալեզու ռեփը պասիվ լինի: Կարծում եմ՝ այս ոլորտում երիտասարդների պասիվության հիմնական  պատաճառն այն է, որ այստեղ եկամուտ չեն տեսնում ու որոշում են չշարունակել: Կարող է երիտասարդը ռեփի համար հեռանկարային լինել, բայց չշարունակի: Ես այս տեսակետը հայտնում եմ, որովհետև ինքս նման կարծիքներ լսել եմ՝ փող չկա՝ իմաստ էլ չկա, որ շարունակենք»:

Հարցին՝ իրեն հաջողվո՞ւմ է այս ոլորտում գումար վաստակել՝ նա արձագանքեց, որ ինքն իր գործն անում է սիրով և առանց կոմերցիոն առաջնահերթության: «Ես ինձ այս ամենի մեջ լավ եմ զգում, դրա համար էլ տարիներ շարունակ մնացել եմ ոլորտում: Կարողանում եմ ռեփի միջոցով գումար աշխատել՝ ինձ դա հաջողվում է: Իհարկե, տարիների փորձն էլ իր նշանակությունն ունի, բայց հատկապես սկզբնական շրջանում, երիտասարդները չպետք է միայն փողով կողմնորոշվեն: Եթե ինչ-որ բան սրտովդ է, ուզում ես դրա միջոցով մտքերդ արտահայտել, կոմերցիան չպետք է լինի առաջնային: Գումար աշխատելու շատ ավելի արագ ձևեր կան: Համենայն դեպս, ստեղծագործող մարդու համար փողը չպետք է լինի առաջին տեղում»,- տեսակետ հայտնեց ռեփերը:

Հայկական շուու բիզնեսի ներկայացուցիչները հաճախ չեն ներկայանում ալբոմներով: Ըստ Նարեկի՝ սա ևս կապված է կոմերցիոն միտումների հետ: Նրա խոսքով՝ ինքը ոչ միայն ալբոմներ է ներկայացնում, այլև առանձին թողարկում է դրանք CD սկավառակի տեսքով: Ըստ կատարողի՝ դա մնայուն արժեք է, անկախ ոչ եկամտաբեր լինելուց:

«Մեր շոու բիզնեսում ամեն ինչ շատ սխալ ուղղությամբ գնաց: Օրինակ՝ այդ մշակույթը ժամանակի հետ կորավ, ինչը շատ վատ է: Եթե մի բան անում ես միայն կոմերցիային նայելով, բնականաբար, բիզնես տեսանկյունից ձեռնտու չէ: Եթե սիրելով չես արել, կարող ես մտածել, որ այդ նախագծի վրա ծախսված էներգիան ու գումարը կարող էիր ուրիշ տեղ օգտագործել ու ավելի շատ շահույթ ստանալ: Սակայն ալբոմ թողարկելը միանշանակ անիմաստ չէ, որովհետև մնայուն բան ես թողնում, ինչը ստեղծագործող մարդու համար շատ կարևոր է»,- ասաց Նարեկը՝ հավելելով, որ ինքը որոշել է ամեն տարի ալբոմ ներկայացնել՝ առանց դադար վերցնելու: