«Կարծում եմ՝ ինձ իբրև Հոլիվուդի երգիչ են այդ աստղը շնորհել»․ Անդին 50.000 դոլար կվճարի Հոլիվուդի Փառքի ծառուղում աստղ ունենալու համար

Tert.am Life-ն իր ընթերցողներին տեղեկացրել է, որ 2020 թվականին Հոլիվուդի Փառքի ծառուղում աստղ ստանալու հնարավորություն կունենա նաև իրանահայ երգիչ Անդի Մադաթյանը։ Վերջինս իր աստղը կստանա «Ձայնագրություն» անվանակարգում՝ Ալիշա Քիզի, 50 cent-ի ու մի շարք այլ հայտնի արտիստների հետ։ Աստղը, սակայն, կհայտնվի Փառքի ծառուղում միայն սահմանված 50.000 դոլարը վճարելուց հետո:

Հայ լսարանին իր «Գարուն», «Գնանք Հայաստան» երգերով հայտնի Անդին Tert.am Life-ին պատմել է իրականություն դարձած «ամերիկյան երազանքի» ու դրա համար 50․000 դոլար վճարելու մասին։

Հոլիվուդի փառքի ծառուղում աստղ ստանալու համար արտիստներն իրենք են հայտ ներկայացնում: Հոլիվուդի առևտրի պալատի կողմից այն հաստատվում, մերժվում կամ մնում է սպասման մեջ։  Անդին դիմել է դեռ 2016 թվականին, սակայն մերժում չի ստացել, մնացել է սպասողների շարքում։ Վերջինիս խոսքով՝ դիմելուց երեք տարի անց իր անունը լսելը որքան սպասված, նույնքան էլ անսպասելի է եղել։  

«Այս տարիների ընթացքում գիտեի, որ հերթի մեջ եմ: Նախորդ տարի մեծ կատարող Շարլ Ազնավուրն արժանացավ աստղի, իսկապես, անչափ ուրախացել էի իր համար։ Այս տարի արդեն զգում էի, որ իմ հերթն է եկել։ Հունիսի 20-ին, երբ տարածվել էր այդքան սպասված անոնսը, իմացա, որ Ջուլիա Ռոբերտսի, 50 cent-ի ու շատ հայտնիների անվան կողքին կա նաև Անդի Մադաթյան անուն-ազգանունը։ Սա իսկապես մեծ պարծանք էր ինձ համար, որ իմ հայկական անունն այնտեղ հնչեց։ Հիմա իրոք ես շատ ուրախ եմ և, միևնույն ժամանակ, անչափ հպարտ»,- նշեց կատարողը։

Ըստ Անդիի՝ սա բացառիկ դեպք է, քանի որ Հոլիվուդից դուրս գործող հայտնիները հաճախ չեն կարողանում ստանալ իրենց աստղը։ «Հարյուրավոր արտիստներ ամեն տարի դիմում են, սակայն ԱՄՆ-ից դուրս գործող արտիստներին շատ քիչ են արժանացնում այդ պարգևին՝ կարող է, օրինակ, հազարներից միայն մեկին հաջողվի ստանալ իր աստղը։ Այնպես որ, մի քիչ դժվար էր պատկերացնելը, որ հնարավոր է ինձ էլ հերթ հասնի։ Անկախ ամեն ինչից՝ ես հույս ունեի և սպասում էի, գուցե Աստծո կամոք որոշվեց, որ ես պետք է արժանանամ»,- ասաց Անդին։

Կատարողից հետաքրքրվեցինք, թե իր կարծիքով ինչո՞ւ են հենց իր հայտը հաստատել․ «Տարիներ շարունակ ես ամերիկյան երգիչների հետ զուգերգերով եմ հանդես եկել, ամերիկյան ֆիլմերի սաունդթրեքներ եմ կատարել, մի քանի անգամ Kodak թատրոնում համերգ եմ ունեցել։ Վերջին տարիներին ամերիկյան շուկայում շատ եմ գործեր արել, կարծում եմ՝ դրանք աչքի են ընկել։ Ըստ իս՝ ինձ իբրև Հոլիվուդի երգիչ են այդ աստղը շնորհել (Անդին համագործակցություններ է ունեցել Մայքլ Ջեքսոնի ավագ քրոջ՝ Լա Տոյա Ջեքսոնի, ամերիկյան հայտնի  «Բոն Ջովի» խմբի անդամներ Ջոն Բոնջովիի, Ռիչի Սամբորայի հետ, 2005 թվականին նկարահանվել է ամերիկյան «Օմար Խայամի լեգենդը» ֆիլմում, հեղ․): Ուրախ եմ, որ, որպես հայ, ստացել եմ այն»։

Ըստ Անդիի՝ բոլոր տեխինիկական հարցերն արդեն լուծվել են, իրեն մնում է միայն Հոլիվուդի առևտրի պալատի ներկայացուցիչների հետ որոշել իր աստղի համար փողոցն ու արարողությունն իրականացնելու օրը։ Այս ամենը, սակայն, արտիստների համար անվճար չէ, նրանք կամ նրանց հետ համագործակցող ընկերությունները հայտը հաստատելուց հետո պետք է վճարումներ իրականացնեն։

«Ամեն արտիստ պետք է 50․000 դոլար վճարի։  Օրինակ՝ Ջուլիա Ռոբերտսը, որն այս տարի է իր աստղը ստանալու, կարող է դիմել իր ֆիլմընկերությանը, որպես հովանավոր, այդ գումարը փոխանցելու համար։ Հիմնականում այդ գումարը յուրաքանչյուրի համար տալիս է իր հովանավորը։ Հոլիվուդի իմ աստղի համար 50․000 դոլարը ես չեմ վճարելու, կվճարեն իմ հովանավորները»,- ասաց երգիչը:

Նշենք, որ կատարողն այս օրերին Հայաստանում է։ Չնայած ֆուտբոլային ընկերեկան խաղի ժամանակ ձեռքը կոտրելուն՝ Անդին, որպես հյուր, ելույթ է ունեցել Ձախ Հարութի մենահամերգին։